Aikawa da Sha Biyu

An lissafa sunayen goma sha biyun, aka aike su ba kuɗi ba ƙarin tufafi, zuwa garuruwan da za su iya rufe musu ƙofa. Yesu ya faɗi a fili game da bulala, da kotuna, da iyalai da za su juya wa juna baya. Duk da haka ba gwara ɗaya da za ta faɗi ba tare da Uba ba, kuma an ƙidaya gashin kansu.

Babi na 10.

Yesu ya kira almajiransa sha biyu, ya ba su iko bisa ƙazaman ruhohi, su kore su, su kuma warkar da kowace cuta da kowane ciwo. Ga sunayen manzanni sha biyu: na fari, Siman wanda ake kira Bitrus, da ɗan'uwansa Andarawas; da Yakubu ɗan Zabadi, da ɗan'uwansa Yahaya; da Filibus da Bartalamawus; da Toma da Matta mai karɓar haraji; da Yakubu ɗan Alfa da Taddawus; da Siman mai kishin ƙasa, da Yahuda Iskariyoti, wanda kuma ya bashe shi.

Yesu ya aiki waɗannan sha biyu, ya umarce su, ya ce, “Kada ku je yankunan Al'ummai, kada kuma ku shiga wani garin Samariyawa. A maimakon haka, ku je wurin ɓatattun tumakin gidan Isra'ila. Yayin da kuke tafiya, ku yi shelar wannan saƙo, ‘Mulkin Ubanmu ya yi kusa.’ ^a Ku warkar da marasa lafiya, ku tā da matattu, ku tsabtace masu kuturta, ku kori aljanu. Kyauta kuka samu, kyauta ku bayar. Kada ku ɗauki wata zinariya ko azurfa ko tagulla a cikin ɗamararku. Kada ku ɗauki jakar tafiya, ko riga ta biyu, ko takalma, ko sanda—gama ma'aikaci ya cancanci abincinsa. Duk garin ko ƙauyen da kuka shiga, ku nemi wanda ya cancanta a wurin, ku kuma zauna a can sai kun tafi. Yayin da kuke shiga gidan, ku gaishe shi. In gidan ya cancanta, bari salamarku ta sauka a kansa; in bai cancanta ba, bari ta komo muku. In wani bai karɓe ku ba ko bai saurari maganarku ba, ku karkaɗe ƙurar ƙafafunku yayin da kuke fita daga wannan gida ko gari. Lalle hakika, ina gaya muku, za a yi wa Saduma da Gwamora sauƙi a ranar shari'a fiye da wannan gari.

Ga shi, ina aike ku kamar tumaki a tsakiyar kyarketai; saboda haka ku zama masu wayo kamar macizai, marasa ɓarna kamar kurciyoyi. Ku yi hankali da mutane; za su bashe ku ga majalisai, su kuma yi muku bulala a cikin majami'unsu. Saboda ni, za a kai ku gaban gwamnoni da sarakuna, don shaida a gare su da kuma ga Al'ummai. Amma sa'ad da suka bashe ku, kada ku damu da abin da za ku faɗa ko yadda za ku faɗe shi—gama za a ba ku abin da za ku faɗa a lokacin, gama ba ku ne za ku yi magana ba, sai dai Ruhun Ubanku ne zai yi magana ta wurinku.

Ɗan'uwa zai bashe ɗan'uwansa ga mutuwa, uba kuma ɗansa; 'ya'ya za su tayar wa iyayensu, su kuma sa a kashe su. Kowa zai ƙi ku saboda sunana, amma duk wanda ya jure har ƙarshe, shi za a cece shi. Sa'ad da aka tsananta muku a wani gari, ku gudu zuwa wancan. Lalle hakika, ina gaya muku, ba za ku gama zazzaga garuruwan Isra'ila ba sai Ɗan Mutum ya zo.

Ɗalibi ba ya fifiko a kan malaminsa, haka ma bawa ba ya fifiko a kan maigidansa. Ya isa ɗalibi yă zama kamar malaminsa, bawa kuma kamar maigidansa. In sun kira maigidan gida Ba'alzabul, balle fa mutanen gidansa!

Saboda haka kada ku ji tsoronsu. Babu wani abu a ɓoye da ba za a tona ba, ko a lulluɓe da ba za a sanar da shi ba. Abin da na faɗa muku a cikin duhu, ku faɗe shi da rana; abin da aka raɗa muku a kunne, ku yi shelarsa daga kan rufin gidaje. Kada ku ji tsoron masu kashe jiki amma ba su iya kashe rai ba; a maimakon haka, ku ji tsoron wanda yake da iko yă hallaka rai da jiki duka a cikin jahannama.

Ba a sayar da gwarare biyu a kan kwabo ɗaya ba? Duk da haka babu ɗayansu da zai fāɗi ƙasa ba tare da Ubanku ba. Gashin kanku ma, duk an ƙididdige su. Saboda haka kada ku ji tsoro; kun fi gwarare masu yawa daraja.

Saboda haka, duk wanda ya shaida ni a gaban mutane, ni ma zan shaida shi a gaban Ubana na Sama. Amma duk wanda ya mūsunta ni a gaban mutane, ni ma zan mūsunta shi a gaban Ubana na Sama.

Kada ku yi tsammani na zo ne don in kawo salama a duniya; ban zo don in kawo salama ba, sai dai takobi. Gama na zo ne domin in sa mutum yă yi gāba da ubansa, 'ya mace ta yi gāba da mahaifiyarta, matar ɗa ta yi gāba da surukarta, maƙiyan mutum za su zama mutanen gidansa. Duk wanda yake ƙaunar uba ko uwa fiye da ni, bai cancance ni ba; duk wanda yake ƙaunar ɗa ko 'ya fiye da ni, bai cancance ni ba. Duk wanda bai ɗauki gicciyensa ya bi ni ba, bai cancance ni ba. Duk wanda ya sami ransa zai rasa shi, duk kuma wanda ya rasa ransa saboda ni zai same shi.

Duk wanda ya karɓe ku, ni ya karɓa, duk kuma wanda ya karɓe ni, ya karɓi wanda ya aiko ni. Duk wanda ya karɓi annabi domin shi annabi ne, zai sami ladar annabi, duk kuma wanda ya karɓi mai adalci domin shi mai adalci ne, zai sami ladar mai adalci. Duk kuma wanda ya ba da ko da kwaf na ruwan sanyi ga ɗaya daga cikin ƙananan nan domin shi almajirina ne, lalle hakika, ina gaya muku, ba zai rasa ladarsa ba sam.”