እቶም ዓሰርተ ኽልተ ተልኣኹ

እቶም ዓሰርተ ኽልተ ተሰምዩ፥ ብዘይ ገንዘብን ብዘይ ተወሳኺ ክዳንን ድማ ናብተን ማዕፆአን ዝዓፅዋ ኸተማታት ተለኣኹ። ኢየሱስ ብዛዕባ መግረፍቲ፥ መጋባእያን ንሓድሕዱ ዝፃላእ ስድራን ብንፁር ተዛረበ። ኰይኑ ግና ብዘይ ኣቦ ሓንቲ ዑፍ ኣይትወድቕን፥ ፀጕሪ ርእሶም ከዓ ቝፁር እዩ።

ምዕራፍ 10።

ኢየሱስ ነቶም ዓሰርተ ኽልተ ደቀ መዛሙርቱ ፀዊዑ፥ ንርኹሳት መናፍስቲ ከውፅእዎምን ኵሉ ደዌን ኵሉ ሕማምን ከሕውዩን፥ ኣብ ልዕሊ ርኹሳት መናፍስቲ ስልጣን ሃቦም። ስም እቶም ዓሰርተ ኽልተ ሃዋርያት ድማ እዙይ እዩ፦ ቀዳማይ፥ ጴጥሮስ ዝተብሃለ ስምኦንን ሓዉ እንድርያስን፤ ያእቆብ ወዲ ዘብዴዎስን ሓዉ ዮሃንስን፤ ፊልጶስን በርተሎሜዎስን፤ ቶማስን ማቴዎስ እቲ ተቐባሊ ቐረፅን፤ ያእቆብ ወዲ እልፍዮስን ታዴዎስን፤ ስምኦን ቀናኢን ይሁዳ ኣስቆሮታዊን፥ እቲ ንሱ እውን ኣሕሊፉ ዝሃቦ።

ኢየሱስ ነዞም ዓሰርተ ኽልተ ኣዚዙ ኸምዙይ ኢሉ ለኣኾም፦ “ናብ ሃገር ኣህዛብ ኣይትኺዱ፤ ናብ ከተማ ሳምራውያንውን ኣይትእተዉ። ናብተን ዝጠፍኣ ኣባጊዕ ቤት እስራኤል ደኣ ኪዱ። እናኸድኩም ከዓ፥ ‘መንግስቲ ኣቦና ቀሪባ እያ’ እናበልኩም ስበኹ። ^a ንሕሙማት ኣሕውዩ፥ ንምዉታት ኣተንስኡ፥ ንለምፃማት ኣንፅሁ፥ ንኣጋንንቲ ኣውፅኡ። ብኸምኡ ተቐቢልኩም፥ ብኸምኡ ሃቡ። ኣብ መዓጥቕኹም ወርቂ ኾነ ብሩር ኾነ ነሃስ ኣይትማልኡ። ንመገሻ ሳንጣ ኾነ ኽልተ ቐሚሽ ኾነ ኣሳእን ኾነ በትሪ ኣይትማልኡ፤ እቲ ሰራሒ ምግቡ ይግብኦ እዩ እሞ። ናብ ዝኣተኽምዋ ዝኾነት ከተማ ወይ ዓዲ፥ ኣብኣ ብቑዕ መን ከም ዝኾነ ሕተቱ፤ ክሳዕ እትወፅኡ ድማ ኣብኣ ተቐመጡ። ናብታ ገዛ ኽትኣትዉ እንተለኹም፥ ሰላም በልዋ። እታ ገዛ ብቑዕቲ እንተ ኾይና፥ ሰላምኩም ኣብ ልዕሊኣ ይውረድ፤ እንተ ዘይኮይኑ ግና፥ ሰላምኩም ናባኻትኩም ይመለስ። ዝኾነ ሰብ እንተ ዘይተቐበለኩም ወይ ቃልኩም እንተ ዘይሰምዐ፥ ካብ እታ ገዛ እቲኣ ወይ ካብ እታ ከተማ እቲኣ ክትወፁ እንተለኹም፥ ደሮና ኣእጋርኩም ንገፉ። ብሓቂ እብለኩም ኣለኹ፥ ብመዓልቲ ፍርዲ ንሰዶምን ገሞራን ካብ እታ ከተማ እቲኣ ኺቀልል እዩ።

እንሆ፥ ከም ኣባጊዕ ኣብ ማእኸል ተዃሉ እልእከኩም ኣለኹ፤ ስለዙይ ከም ኣትማን ጐራሓት፥ ከም ርግቢ ከዓ የዋሃት ኩኑ። ካብ ሰባት ተጠንቀቑ፤ ናብ መጋባእያ ኣሕሊፎም ክህቡኹም፥ ኣብ ኣብያተ ፀሎቶም ድማ ክገርፉኹም እዮም እሞ። ምእንታይ ናብ ቅድሚ ገዛእትን ነገስታትን ክትውሰዱ ኢኹም፤ ንእኣቶምን ንኣህዛብን ምስክር ምእንቲ ኽኸውን። ኣሕሊፎም ክህቡኹም እንተለዉ ግና፥ እንታይን ከመይን ከም እትዛረቡ ኣይትጨነቑ፤ እቲ እትዛረቡ በታ ሰዓት እቲኣ ክወሃበኩም እዩ እሞ፤ ነቲ ዝዛረብ ንስኻትኩም ኣይኮንኩምን፥ ብኣኻትኩም ዝዛረብ መንፈስ ኣቦኻትኩም ደኣ እዩ እምበር።

ሓው ንሓዉ ናብ ሞት ኣሕሊፉ ክህቦ፥ ኣቦ ድማ ንወዱ፤ ውሉድ ኣብ ልዕሊ ወለዶም ተልዒሎም ድማ ከቕትልዎም እዮም። ኵሉ ሰብ ምእንቲ ስመይ ክፀልአኩም እዩ፤ እቲ ክሳዕ መወዳእታ ዝፀንሕ ግና ክድሕን እዩ። ኣብ ሓንቲ ኸተማ እንተ ሰጒጎምኹም፥ ናብታ ኻልእ ህደሙ። ብሓቂ እብለኩም ኣለኹ፥ ወዲ ሰብ ከይመፀ፥ ከተማታት እስራኤል ኣይትውድኡን ኢኹም።

ተማሃራይ ካብ መምህር ኣይበልፅን፥ ባርያ እውን ካብ ጐይታኡ ኣይበልፅን። ተማሃራይ ከም መምህሩ፥ ባርያ ድማ ከም ጐይታኡ ክኸውን ይኣኽሎ። ንበዓል ገዛ ብኤል ዜቡል እንተ ኢሎም፥ ንስድራ ቤቱ ግዳ ኽንደይ ዝገደደ ዘይብልዎም!

ስለዙይ ኣይትፍርሕዎም። ዘይግለፅ ዝተኸወለ፥ ዘይፍለጥ ድማ ዝተሓብአ ነገር የለን እሞ። እቲ ኣብ ፀልማት ዝብለኩም፥ ኣብ ብርሃን ተዛረቡ፤ እቲ ኣብ እዝንኹም ዝሕሾኽ ድማ፥ ኣብ ናሕሲ ኾይንኩም ስበኹ። ነቶም ስጋ ዝቐትሉ፥ ነፍሲ ግና ክቐትልዋ ዘይኽእሉ ኣይትፍርሕዎም፤ ነቲ ንነፍስን ስጋን ኣብ ገሃነም ከጥፍእ ዝኽእል ደኣ ፍርሕዎ።

ክልተ ዑፍዶ ብሓደ ሳንቲም ኣይሽየጣን? እንተ ኾነ ኻብኣተን ሓንቲ እኳ ብዘይ ኣቦኻትኩም ናብ ምድሪ ኣይትወድቕን። ፀጕሪ ርእስኹም እኳ ዅሉ ተቘፂሩ እዩ። ስለዙይ ኣይትፍርሑ፤ ካብ ብዙሓት ኣዕዋፍ ትበልፁ ኢኹም።

እምበኣር፥ እቲ ኣብ ቅድሚ ሰባት ዝእመነኒ ዅሉ፥ ኣነ ድማ ኣብ ቅድሚ እቲ ኣብ ሰማያት ዘሎ ኣቦይ ክእመኖ እየ። እቲ ኣብ ቅድሚ ሰባት ዝኽሕደኒ ዅሉ ግና፥ ኣነ ድማ ኣብ ቅድሚ እቲ ኣብ ሰማያት ዘሎ ኣቦይ ክኽሕዶ እየ።

ኣብ ምድሪ ሰላም ከምፅእ ዝመፃእኹ ኣይምሰልኩም፤ ሰይፊ ደኣ እምበር ሰላም ከምፅእ ኣይመፃእኹን። ንሰብ ካብ ኣቦኡ፥ ንጓል ካብ እኖኣ፥ ንመርዓት ካብ ሓማታ ክፈሊ መፃእኹ እየ እሞ፤ ፀላእቲ ሰብ ድማ ኣባላት ስድራ ቤቱ ባዕልቶም ክኾኑ እዮም። እቲ ካባይ ንላዕሊ ንኣቦ ወይ ንእኖ ዘፍቅር፥ ንኣይ ኣይበቅዕን፤ እቲ ካባይ ንላዕሊ ንወዲ ወይ ንጓል ዘፍቅርውን፥ ንኣይ ኣይበቅዕን። እቲ መስቀሉ ኣልዒሉ ዘይስዕበኒ፥ ንኣይ ኣይበቅዕን። እቲ ንህይወቱ ዝረኽባ ከጥፍኣ እዩ፥ እቲ ንህይወቱ ምእንታይ ዘጥፍኣ ድማ ክረኽባ እዩ።

እቲ ዝተቐበለኩም ንኣይ ይቕበል፥ እቲ ንኣይ ዝቕበል ድማ ነቲ ዝለኣኸኒ ይቕበል። እቲ ንነቢይ ከም ነቢይ ዝቕበል፥ ዓስቢ ነቢይ ይረክብ፤ እቲ ንፃድቕ ከም ፃድቕ ዝቕበል ድማ፥ ዓስቢ ፃድቕ ይረክብ። እቲ ንሓደ ኻብዞም ናእሽቱ፥ ደቀ መዝሙረይ ስለ ዝኾነ፥ ሓደ ፅዋዕ ዝሑል ማይ ጥራሕ ዝህቦ ድማ፥ ብሓቂ እብለኩም ኣለኹ፥ ዓስቡ ከቶ ኣይጠፍእን እዩ።”