ማቴዎስ 11 FHB Father's Heart Bible™

11 ¹ኢየሱስ ነቶም ዓሰርተ ክልተ ደቀ መዛሙርቱ ኣዚዙ ምስ ወድአ፥ ኣብ ከተማታቶም ክምህርን ክሰብኽን ካብኡ ኸደ።

ሕቶ ዮሃንስ ካብ ቤት ማእሰርቲ

²ዮሃንስ ከዓ ኣብ ቤት ማእሰርቲ እንተሎ፥ ብዛዕባ ግብሪ ክርስቶስ ሰሚዑ፥ ብደቀ መዛሙርቱ ገይሩ ለኣኸ፥ ³ከምዙይ ኢሉ ድማ ሓተቶ፦ “ንስኻ ዲኻ እቲ ክመፅእ ዘለዎ፥ ወይ ካልእ ክንደሊ?”

⁴ኢየሱስ ድማ ከምዙይ ኢሉ መለሰሎም፦ “ኪዱ እሞ፥ ነቲ እትሰምዕዎን እትርእይዎን ንዮሃንስ ንገርዎ፦

⁵“ዕዉራት ይርእዩ፥ ሓንካሳት ይኸዱ፥ ለምፃማት ይነፅሁ፥ ፀማማት ይሰምዑ፥ ምዉታን ይትስኡ፥ ንድኻታት ከዓ ወንጌል ይስበከሎም። ⁶እቲ ብኣይ ዘይዕንቀፍ ድማ ብፁእ እዩ።”

⁷ንሳቶም ክኸዱ እንተለዉ፥ ኢየሱስ ነቶም ህዝቢ ብዛዕባ ዮሃንስ ክዛረቦም ጀመረ፦ “እንታይ ክትርእዩ ኢኹም ናብ ምድረ በዳ ወፂእኹም? ብንፋስ ዝናወፅ ሻምብቆዶ? ⁸ንምንታይ ደኣ ወፂእኹም? ልዙይ ክዳን ዝተኸድነ ሰብ ክትርእዩዶ? እንሆ፥ እቶም ልዙይ ክዳን ዝኽደኑ ኣብ ኣብያተ መንግስቲ እዮም ዘለዉ። ⁹ንምንታይ ደኣ ወፂእኹም? ነቢይ ክትርእዩዶ? እወ፥ እብለኩም ኣለኹ፥ ካብ ነቢይ ኣዝዩ ዝዓቢ እዩ። ¹⁰እቲ ብዛዕባኡ ዝተፅሓፈ እዙይ እዩ፦ ‘እንሆ፥ ነቲ ኣብ ቅድሜኻ መንገድኻ ዘዳሉ መልኣኽተይ፥ ኣብ ቅድሜኻ እልእኽ ኣለኹ።’ ¹¹ብሓቂ እብለኩም ኣለኹ፥ ካብ ኣንስቲ ኻብ ዝተወለዱ፥ ካብ መጥምቕ ዮሃንስ ዝዓቢ ኣይተስአን፤ እቲ ኣብ መንግስቲ ኣቦና ዝንእስ ግና ካብኡ ይዓቢ። ¹²ካብ መዓልቲታት መጥምቕ ዮሃንስ ክሳዕ ሕዚ፥ መንግስቲ ኣቦና ትግፋዕ ኣላ፤ ገፋዕቲ ድማ ይምንጥልዋ ኣለዉ። ¹³ኵሎም ነቢያትን ሕግን ክሳዕ ዮሃንስ ተነበዩ፤ ¹⁴ክትቕበልዎ እንተ ደሊኹም ድማ፥ እቲ ክመፅእ ዝነበሮ ኤልያስ ንሱ እዩ። ¹⁵ዝሰምዕ እዝኒ ዘለዎ ይስማዕ።

¹⁶ነዝ ትውልዲ እዙይ ብምንታይ ክመስሎ? ኣብ ዕዳጋታት ተቐሚጦም ንካልኦት ዝፅውዑ ቈልዑ ይመስል፦ ¹⁷‘እምብልታ ነፊሕናልኩም፥ ንስኻትኩም ግና ኣይሳዕሳዕኩምን፤ መልቀስ ኣልቀስናልኩም፥ ንስኻትኩም ግና ኣይሓዘንኩምን።’ ¹⁸ዮሃንስ ከይበልዐን ከይሰተየን መፀ፥ ንሳቶም ከዓ ‘ጋኔን ሒዝዎ’ ይብሉ ኣለዉ። ¹⁹ወዲ ሰብ እናበልዐ እናሰተየ መፀ፥ ንሳቶም ከዓ ‘እንሆ፥ ስሱዕን ሰካርን፥ ፈታዊ ተቐበልቲ ቐረፅን ሓጥኣንን!’ ይብሉ ኣለዉ። ጥበብ ግና ብግብራ ፃድቕቲ ኾይና ትርከብ።”

ወይለ ነተን ዘይተነስሓ ከተማታት

²⁰ሽዑ ነተን መብዛሕትኡ ተኣምራት ዝገበረለን ከተማታት፥ ስለ ዘይተነስሓ ክገንሐን ጀመረ።

²¹“ወይለኺ ኮራዚን! ወይለኺ ቤተ ሳይዳ! እቲ ኣባኺ ዝተገብረ ተኣምራት ኣብ ጢሮስን ሲዶንን ተገይሩ እንተ ዝኸውንስ፥ ቅድም ኢለን ወጮ ለቢሰን ኣብ ሓሙዅሽቲ ኮፍ ኢለን ምተነስሓ ነይረን። ²²ግና ብመዓልቲ ፍርዲ ንጢሮስን ሲዶንን ካባኽን ከም ዝቐልለለን እብለኽን ኣለኹ። ²³ንስኺኸ ቅፍርናሆም፥ ናብ ሰማይዶ ልዕል ክትብሊ ኢኺ? ናብ ሲኦል ክትወርዲ ኢኺ። እቲ ኣባኺ ዝተገብረ ተኣምራት ኣብ ሰዶም ተገይሩ እንተ ዝኸውንስ፥ ክሳዕ ሎሚ ምተረፈት ነይራ። ²⁴ግና ብመዓልቲ ፍርዲ ንምድሪ ሰዶም ካባኺ ኸም ዝቐልለላ እብለኺ ኣለኹ።”

ኣቦ ብወልድ ይግለፅ

²⁵በቲ ጊዜ እቲ ኢየሱስ ከምዙይ በለ፦ “ኦ ኣቦ፥ ጐይታ ሰማይን ምድርን፥ ነዝ ነገር እዙይ ካብ ጥበበኛታትን መስተውዓልትን ሰዊርካ፥ ንህፃናት ስለ ዝገለፅካዮ፥ ኣመስግነካ ኣለኹ። ²⁶እወ፥ ኦ ኣቦ፥ ከምዙይ ኣብ ቅድሜኻ ባህ ስለ ዝበለካ እዩ። ²⁷ኵሉ ነገር ካብ ኣቦይ ተውሂቡኒ እዩ። ንወልድ ብዘይ ኣቦ ዝፈልጦ የለን፤ ንኣቦውን ብዘይ ወልድ፥ ከምኡ ድማ ወልድ ክገልፀሉ ዝደለዮ ሰብ፥ ዝፈልጦ የለን።

²⁸“ኣቱም ዝደኸምኩምን ዝተፅዓንኩምን ኵላትኩም፥ ናባይ ንዑ፥ ኣነ ድማ ከዕርፈኩም እየ። ²⁹ኣርዑተይ ፀዓኑ፥ ካባይውን ተምሃሩ፤ ኣነ ለዋህን ብልቢ ትሑትን እየ እሞ፥ ንነፍሳትኩም ዕረፍቲ ኽትረኽቡ ኢኹም። ³⁰ኣርዑተይ ቀሊል፥ ፆረይ ድማ ፈኵስ እዩ እሞ።”