ማቴዎስ 12 FHB Father's Heart Bible™

12 ¹በቲ ጊዜ እቲ ኢየሱስ ብሰንበት ብግራት እኽሊ ሓለፈ። ደቀ መዛሙርቱ ድማ ጠምዮም ስለ ዝነበሩ፥ ጉምቦ ሸዊት እናቘረፁ ክበልዑ ጀመሩ። ²ፈሪሳውያን ከዓ እዙይ ምስ ረአዩ፥ “እንሆ፥ ደቀ መዛሙርትኻ ብሰንበት ክግበር ዘይግባእ ነገር ይገብሩ ኣለዉ” በልዎ።

³ንሱ ድማ ከምዙይ በሎም፦ “ዳዊት ምስ ብፆቱ ምስ ጠመዩ እንታይ ከም ዝገበረ ኣየንበብኩምንዶ? ⁴ናብ ቤት ኣቦና ከመይ ኢሉ ኣትዩ፥ ነቲ ንእኡን ንብፆቱን ዘይግባእ፥ ንካህናት ጥራሕ ዝተዓቘረ እንጀራ ገፅ ከመይ ኢሉ በልዐ? ⁵ወይ፥ ካህናት ኣብ ቤተ መቕደስ ብሰንበት ንሰንበት ከም ዘፍርስዎ፥ ከይበደሉ ኸዓ ከም ዝተረፉ፥ ኣብ ሕጊ ኣየንበብኩምንዶ? ⁶እብለኩም ኣለኹ፥ ካብ ቤተ መቕደስ ዝዓቢ ኣብዙይ ኣሎ። ⁷‘ኣነ ምሕረት ደኣ እደሊ እምበር፥ መስዋእቲ ኣይደልን’ ዝብል እንታይ ማለት ምዃኑ እንተ ትፈልጡ ኔርኩም፥ ነቶም ንፁሃት ኣይምፈረድኩምን ኔርኩም። ⁸ወዲ ሰብ ጐይታ ሰንበት እዩ እሞ።”

ምሕረት ኣቦና ብሰንበት የሕዊ

⁹ካብኡ ኸዓ ሓሊፉ ናብ ቤተ ፀሎቶም ኣተወ። ¹⁰ኣብኡ ኸዓ ኢዱ ዝደረቐት ሰብ ነበረ። ንሳቶም ድማ ክኸስዎ ስለ ዝደለዩ፥ “ብሰንበት ምሕዋይዶ ይግባእ?” ኢሎም ሓተትዎ።

¹¹ንሱ ድማ ከምዙይ በሎም፦ “ካባኻትኩም ሓንቲ በጊዕ ዘላቶ ሰብ፥ እታ በጊዕ ብሰንበት ናብ ጕድጓድ እንተ ወደቐት፥ ሒዙ ዘየውፅኣ መን ኣሎ? ¹²ሰብ ግዳ ኻብ በጊዕ ክንደይ ኣዝዩ ይበልፅ! ስለዙይ ብሰንበት ፅቡቕ ምግባር ይግባእ እዩ።” ¹³ሽዑ ነቲ ሰብኣይ “ኢድካ ዘርግሕ” በሎ። ንሱ ድማ ኢዱ ዘርግሐ፤ ከምታ ኻልአይቲ ኢዱ ጥዕይቲ ኾይና ኸዓ ተመለሰት።

¹⁴ፈሪሳውያን ግና ወፂኦም፥ ከመይ ኢሎም ከም ዘጥፍእዎ ተማኸሩ።

ፍቑር ኣገልጋሊ ኣቦና

¹⁵ኢየሱስ ድማ እዙይ ፈሊጡ ኻብኡ ኣግለሰ። ብዙሓት ድማ ሰዓብዎ፤ ንዅሎም ከዓ ኣሕወዮም፥ ¹⁶ብዛዕባኡ ንዝኾነ ሰብ ከይነግሩ ድማ ኣዘዞም። ¹⁷እዙይ ከዓ እቲ ብነቢይ ኢሳይያስ ዝተነግረ ምእንቲ ኽፍፀም ኮነ፦

¹⁸“እንሆ፥ እቲ ዝሓረኽዎ ግዛአይ ኢየሱስ፥ እቲ ነፍሰይ ዝተሓጐሰትሉ ፍቑረይ። መንፈሰይ ኣብ ልዕሊኡ ከንብር እየ፥ ንሱ ድማ ንኣህዛብ ፍርዲ ኽእውጅ እዩ። ¹⁹ኣይባኣስን ኣይጭድርን፥ ድምፁ ኸዓ ኣብ ኣደባባያት ዝሰምዕ የለን። ²⁰ንእተቐጥቀጠ ሻምብቆ ኣይሰብሮን፥ ንዝተኖ ፈትሊ ኸዓ፥ ፍርዲ ናብ ዓወት ክሳዕ ዘብፅሕ ኣየጥፍኦን፤ ²¹ኣህዛብ ድማ ብስሙ ተስፋ ክገብሩ እዮም።”

ዝተፈላለየት መንግስቲ ደው ክትብል ኣይትኽእልን

²²ሽዑ ዕዉር በሃም ጋኔን ዝሓደሮ ሰብ ናብኡ ኣምፅኡሉ፤ ኣሕወዮ ኸዓ፥ እቲ ሰብ ድማ ተዛረበን ረአየን። ²³ኵሎም እቶም ህዝቢ ኸዓ ተገረሙ እሞ “እዝ ወዲ ዳዊትዶ ይኸውን?” በሉ። ²⁴ፈሪሳውያን ግና እዙይ ሰሚዖም “እዝ ሰብ እዙይ ንኣጋንንቲ፥ ብብኤል ዜቡል፥ ብሓለቓ ኣጋንንቲ ጥራሕ እዩ ዘውፅኦም” በሉ።

²⁵ኢየሱስ ግና ሓሳባቶም ፈሊጡ ከምዙይ በሎም፦ “ኣብ ነንሕድሕዳ ዝተፈላለየት ኵላ መንግስቲ ትጠፍእ፤ ኣብ ነንሕድሕዳ ዝተፈላለየት ከተማ ወይ ቤት ድማ ኣይትቐውምን። ²⁶ሰይጣንውን ንሰይጣን ዘውፅኦ እንተ ኾይኑ፥ ንስንሳቱ ዝተፈላለየ ኮይኑ ኣሎ ማለት እዩ። መንግስቱ ድኣ ኸመይ ኢላ ትቐውም? ²⁷ኣነ ንኣጋንንቲ ብብኤል ዜቡል ዘውፅኦም እንተ ኾይነ፥ ደቅኹም ግና ብመን እዮም ዘውፅእዎም? ስለዙይ ንሳቶም ባዕላቶም ፈረድትኹም ክኾኑ እዮም። ²⁸ኣነ ግና ንኣጋንንቲ ብመንፈስ ኣቦና ዘውፅኦም እንተ ኾይነ፥ እታ መንግስቲ ኣቦና በፂሓትኩም እያ ማለት እዩ። ²⁹ወይ፥ ሓደ ሰብ ናብ ቤት ሓያል ሰብ ኣትዩ፥ ቅድም ነቲ ሓያል ሰብ እንተ ዘይኣሲሩ፥ ኣቕሑኡ ኸመይ ኢሉ ክዘርፍ ይኽእል? ሽዑ ደኣ ንቤቱ ክዘርፋ እዩ።

³⁰ምሳይ ዘይኮነ ኵሉ ሰብ፥ መፃርርተይ እዩ፤ ምሳይ ኮይኑ ዘይእክብ ድማ ይብትን እዩ። ³¹ስለዙይ እብለኩም ኣለኹ፥ ኵሉ ሓጢኣትን ፅርፈትን ንሰብ ይቕረ ክበሃል እዩ፤ ፅርፈት ኣንፃር መንፈስ ግና ይቕረ ኣይበሃሎን እዩ። ³²ኣንፃር ወዲ ሰብ ዝዛረብ ይቕረ ክበሃል እዩ፤ ኣንፃር መንፈስ ቅዱስ ዝዛረብ ግና፥ ኣብዛ ዘመን እዚኣ ኾነ ኣብታ እትመፅእ ዘመን፥ ይቕረ ኣይበሃሎን እዩ።

³³ነታ ገረብ ፅብቕቲ ግበሩ፥ ፍሪኣ ድማ ፅብቕቲ ትኸውን፤ ወይ ነታ ገረብ ሕምቕቲ ግበሩ፥ ፍሪኣ ኸዓ ሕምቕቲ ትኸውን፤ ገረብ ብፍሪኣ ትልለ እያ እሞ። ³⁴ኣቱም ውሉድ ኣትማን! ንስኻትኩም እኩያት እናሃለኹም፥ ፅቡቕ ነገር ከመይ ኢልኩም ክትዛረቡ ትኽእሉ? ኣፍ ካብ ምልኣት ልቢ እዩ ዝዛረብ እሞ። ³⁵ፅቡቕ ሰብ ካብ ፅቡቕ መዝገቡ ፅቡቕ የውፅእ፤ እኩይ ሰብ ድማ ካብ እኩይ መዝገቡ እኩይ የውፅእ። ³⁶እብለኩም ኣለኹ፥ ሰባት በታ መዓልቲ ፍርዲ ብዛዕባ ዝተዛረብዎ ዅሉ ከንቱ ዘረባ ሕሳብ ክህቡ እዮም፤ ³⁷ብቓላትካ ክትፅድቕ ኢኻ፥ ብቓላትካ ድማ ክትፍረድ ኢኻ እሞ።”

ምልክት ዮናስ

³⁸ሽዑ ገለ ኻብ ፃሓፍትን ፈሪሳውያንን “መምህር፥ ካባኻ ምልክት ክንርኢ ንደሊ ኣለና” በሉ።

³⁹ንሱ ኸዓ ኸምዙይ ኢሉ መለሰሎም፦ “እዝ እኩይን ዘማውን ትውልዲ እዙይ ምልክት ይደሊ ኣሎ፤ ብዘይ እቲ ናይ ነቢይ ዮናስ ምልክት ግና፥ ካልእ ምልክት ኣይወሃቦን እዩ። ⁴⁰ከምቲ ዮናስ ሰለስተ መዓልትን ሰለስተ ለይትን ኣብ ከብዲ እቲ ዓብዪ ዓሳ ዝነበረ፥ ከምኡ ድማ ወዲ ሰብ ሰለስተ መዓልትን ሰለስተ ለይትን ኣብ ልቢ ምድሪ ክነብር እዩ። ⁴¹ሰብ ነነዌ ብመዓልቲ ፍርዲ ምስዝ ትውልዲ እዙይ ተንሲኦም ክዅንንዎ እዮም፤ ብስብከት ዮናስ ተነሲሖም እዮም እሞ። ካብ ዮናስ ዝዓቢ ግና፥ እንሆ ኣብዙይ ኣሎ። ⁴²ንግስቲ ደቡብ ብመዓልቲ ፍርዲ ምስ እዝ ትውልዲ እዙይ ተሲኣ ክትኵንኖ እያ፤ ንሳ ኻብ ወሰን ምድሪ ተበጊሳ፥ ጥበብ ሰሎሞን ክትሰምዕ መፂኣ እያ እሞ። እንሆ ኸዓ፥ ካብ ሰሎሞን ዝዓቢ ኣብዙይ ኣሎ።

⁴³ርኹስ መንፈስ ካብ ሰብ ምስ ወፀ፥ ዕረፍቲ እናደለየ ብንቑፅ ቦታታት ይዘዋወር፤ ኣይረኽብን ድማ። ⁴⁴ሽዑ ‘ናብታ ዝሓደግኳ ቤተይ ክምለስ እየ’ ይብል። ምስ መፀ ድማ፥ ጥርሑ ተዀስቲሩን ተመዓራርዩን ይፀንሖ። ⁴⁵ሽዑ ይኸይድ፤ ካብኡ ዝገደዱ ኻልኦት ሸውዓተ መናፍስቲ ድማ የምፅእ፤ ኣትዮም ከዓ ኣብኡ ይሰፍሩ፤ ነቲ ሰብ እቱይ ከዓ ካብ ቀዳማዩ ዳሕረዋዩ ዝገደደ ይኸውን። ነዝ ክፉእ ትውልዲ እዙይ ድማ ከምኡ ክኾኖ እዩ።”

ናይ ሓቂ ቤተሰብ ኣቦ

⁴⁶ንሱ ነቶም ህዝቢ ገና እናተዛረበ እንተሎ፥ እኖኡን ኣሕዋቱን ክዛረብዎ ደልዮም ኣብ ደገ ደው በሉ። ⁴⁷ሓደ ሰብ ድማ “እንሆ እኖኻን ኣሕዋትካን ምስኻ ክዛረቡ ደልዮም ኣብ ደገ ደው ኢሎም ኣለዉ” በሎ።

⁴⁸ንሱ ድማ ነቲ ዝነገሮ “እኖይ መን እያ? ኣሕዋተይ ድማ መን እዮም?” ኢሉ መለሰሉ።

⁴⁹ኢዱ ናብ ደቀ መዛሙርቱ ዘርጊሑ ድማ “እንሆ እኖይን ኣሕዋተይን! ⁵⁰እቲ ፍቓድ እቲ ኣብ ሰማያት ዘሎ ኣቦይ ዝገብር ኵሉ፥ ንሱ ሓወይ፥ ሓፍተይ፥ እኖይ ድማ እዩ እሞ።”