馬太福音 12

12 ¹嗰陣時,耶穌喺安息日經過麥田。佢嘅門徒肚餓,就開始摘麥穗嚟食。 ²法利賽人見到,就對佢講:「你睇吓,你嘅門徒喺安息日做咗律法唔准做嘅嘢。」

³耶穌對佢哋講:「大衛同佢嘅同伴肚餓嗰陣做過嘅事,你哋冇讀過咩? ⁴佢點樣入到我哋嘅父嘅殿,食咗陳設餅;呢啲餅係凈係俾祭司食嘅,佢同佢嘅同伴食係律法唔准嘅。」 ⁵「又或者,你哋喺律法上冇讀過咩?喺安息日,祭司喺聖殿裡面犯咗安息日都冇罪。 ⁶我話你哋知,喺呢度有一位比聖殿更大嘅。 ⁷如果你哋明白『我要嘅係憐憫,唔係祭物』呢句話嘅意思,你哋就唔會定啲無辜嘅人有罪。 ⁸因為人子係安息日嘅主。」

天父嘅憐憫喺安息日醫治

⁹耶穌離開嗰度,入咗佢哋嘅會堂。 ¹⁰嗰度有個人一隻手枯乾咗。佢哋問耶穌:「喺安息日醫病,律法准唔准?」佢哋咁問係想搵佢嘅把柄。

¹¹耶穌對佢哋講:「你哋當中,邊個有一隻羊,喺安息日跌咗落坑,唔會捉住佢拉返上嚟呢? ¹²人比羊貴重得多啦!所以喺安息日行善係律法准嘅。」 ¹³跟住耶穌對嗰個人講:「伸出你隻手嚟。」佢一伸出嚟,隻手就復原,同另一隻一樣咁好。

¹⁴但係法利賽人出去,商量點樣先至可以害死佢。

天父嘅愛僕

¹⁵耶穌知道呢件事,就離開嗰度。有好多人跟住佢,佢醫好晒佢哋所有人, ¹⁶又吩咐佢哋唔好將佢嘅事話俾人知。 ¹⁷呢件事係要應驗先知以賽亞所講嘅話:

¹⁸「睇吓,我揀選嘅僕人——耶穌——就係我心所喜悅嘅愛僕。 我要將我嘅靈賜俾佢, 佢要 向萬民宣告公義。 ¹⁹佢唔會爭辯,又唔會呼喊,街上都冇人聽到佢嘅聲。 ²⁰壓傷嘅蘆葦,佢唔會折斷; 將殘嘅燈芯,佢唔會弄熄;直到佢使公義得勝; ²¹萬民都要仰望佢嘅名。」

分裂嘅國企唔穩

²²跟住有人帶咗一個又瞎又啞、俾鬼附住嘅人嚟見耶穌,耶穌醫好佢,令佢又講到嘢,又睇到嘢。 ²³眾人都非常驚訝,話:「呢個會唔會就係大衛嘅子孫呢?」 ²⁴但係法利賽人聽到,就話:「呢個人趕鬼,無非係靠住鬼王別西卜嘅力量啫。」

²⁵耶穌知道佢哋嘅心思,就對佢哋講:「凡一個國自己分裂、對抗自己,就必然荒廢;一座城或者一個家自己分裂、對抗自己,就企唔穩。 ²⁶如果撒但趕逐撒但,佢就係自己分裂、對抗自己啦。噉佢嘅國點企得穩呢? ²⁷如果我係靠別西卜趕鬼,噉你哋嘅子弟又係靠邊個趕呢?所以佢哋要審判你哋喇。 ²⁸但係如果我係靠我哋父嘅靈趕鬼,噉我哋父嘅國就已經臨到你哋喇。 ²⁹再者,人點可以入到一個壯漢嘅屋,搶走佢嘅財物呢?除非佢先制服嗰個壯漢,噉先至可以搶掠佢間屋。

³⁰唔同我一齊嘅,就係敵對我;唔同我一齊收聚嘅,就係分散。 ³¹所以我話你哋知,人一切嘅罪同褻瀆嘅話都可以得到赦免,但係褻瀆聖靈嘅話就唔會得到赦免。 ³²凡講話得罪人子嘅,可以得到赦免;但係講話得罪聖靈嘅,就唔會得到赦免,今生嚟生都唔會。

³³樹好,佢嘅果子就好;樹壞,佢嘅果子就壞;因為睇果子就知樹點樣。 ³⁴你哋呢班毒蛇嘅種!你哋咁邪惡,又點講得出好嘢呢?因為心裡面充滿乜嘢,個口就講出乜嘢。 ³⁵好人由佢心裡面嘅好寶庫拿出好嘢;惡人由佢心裡面嘅壞寶庫拿出壞嘢。 ³⁶我話你哋知,喺審判嗰日,人所講嘅每一句閒話,都要為佢交代。 ³⁷因為憑你嘅話,你會被稱為義;憑你嘅話,你會被定罪。」

約拿嘅神蹟

³⁸跟住有啲文士同法利賽人講:「老師,我哋想睇你顯個神蹟。」

³⁹耶穌回答:「呢個邪惡、淫亂嘅世代要求睇神蹟。除咗先知約拿嘅神蹟之外,冇神蹟俾佢哋睇。 ⁴⁰正如約拿喺大魚肚裡面三日三夜,人子都要喺地底三日三夜。 ⁴¹尼尼微人喺審判嗰陣會同呢個世代一齊起身,定佢嘅罪;因為佢哋聽到約拿宣講就悔改咗,而家喺呢度有一位仲大過約拿嘅。 ⁴²南方嘅女王喺審判嗰陣會同呢個世代一齊起身,定佢嘅罪;因為佢由地極嚟聽所羅門嘅智慧;睇吓,而家喺呢度有一位仲大過所羅門嘅。

⁴³當一個污靈離開咗一個人,就喺乾旱嘅地方遊嚟遊去,搵地方安歇,但係搵唔到。 ⁴⁴跟住佢話:『我要返去我出嚟嗰間屋。』佢返到,見到屋係空嘅,打掃乾淨,收拾好晒。 ⁴⁵於是佢就去帶埋另外七個比佢更邪惡嘅靈返嚟,佢哋一齊入去,住喺嗰度;嗰個人到頭來嘅境況,就比之前更差。呢個邪惡嘅世代都會係咁。」

天父真正嘅家人

⁴⁶耶穌仲同眾人講緊嘢嘅時候,佢嘅母親同兄弟企喺出面,想搵佢傾偈。 ⁴⁷有人對佢講:「你睇,你嘅母親同你嘅兄弟企喺出面,想同你講嘢。」

⁴⁸耶穌回答嗰個話佢知嘅人:「邊個係我嘅母親?邊個係我嘅兄弟呢?」

⁴⁹跟住佢向住佢嘅門徒伸手,話:「你睇,呢啲就係我嘅母親同我嘅兄弟! ⁵⁰因為凡遵行我在天嘅父旨意嘅,就係我嘅兄弟、姊妹同母親。」