ማቴዎስ 12

12 ¹በዚያን ጊዜ ኢየሱስ በሰንበት ቀን በእኽል እርሻ መካከል ዐለፈ። ደቀ መዛሙርቱም ተርበው ስለ ነበር እሸት እየቀጠፉ መብላት ጀመሩ። ²ፈሪሳውያንም ይህን አይተው፣ “እነሆ፣ ደቀ መዛሙርትህ በሰንበት ቀን ማድረግ ያልተፈቀደውን እያደረጉ ነው” አሉት።

³እርሱም እንዲህ አላቸው፦ “ዳዊት እርሱና ከእርሱ ጋር የነበሩት በተራቡ ጊዜ ያደረገውን አላነበባችሁምን?” ⁴ለካህናት ብቻ የተለየውን፣ ለእርሱና አብረውት ለነበሩት ያልተፈቀደውን የገጸ ኅብስት፣ ወደ አባታችን ቤት ገብቶ እንዴት እንደ በላ አላነበባችሁምን? ⁵“ወይስ ካህናት በሰንበት ቀን በቤተ መቅደስ ሰንበትን ቢያረክሱ እንኳ ያለ ጥፋት እንደሚኾኑ በሕግ አላነበባችሁምን? ⁶እላችኋለሁ፣ ከቤተ መቅደስ የሚበልጥ እዚህ አለ። ⁷‘ከመሥዋዕት ይልቅ ምሕረትን እፈልጋለሁ’ ማለት ምን ማለት እንደ ኾነ ብታውቁ ኖሮ፣ ጥፋት የሌለባቸውን ባልኰነናችሁ ነበር። ⁸የሰው ልጅ የሰንበት ጌታ ነውና።”

የአባታችን ምሕረት በሰንበት ይፈውሳል

⁹ከዚያም ተነሥቶ ወደ ምኵራባቸው ገባ። ¹⁰በዚያም እጁ የሰለለች ሰው ነበር። ሊከሱትም ፈልገው፣ “በሰንበት ቀን መፈወስ ተፈቅዷልን?” ብለው ጠየቁት።

¹¹እርሱም እንዲህ አላቸው፦ “ከእናንተ መካከል አንድ በግ ያለው ሰው ቢኖር፣ ያም በግ በሰንበት ቀን ጕድጓድ ውስጥ ቢወድቅ ይዞ የማያወጣው ማን ነው? ¹²ሰውማ ከበግ እጅግ የሚበልጥ አይደለምን! ስለዚህ በሰንበት ቀን መልካም ማድረግ ተፈቅዷል።” ¹³ከዚያም ሰውየውን፣ “እጅህን ዘርጋ” አለው። እርሱም ዘረጋት፣ እጁም እንደ ሌላዪቱ ጤናማ ኾና ዳነች።

¹⁴ፈሪሳውያን ግን ወጥተው እንዴት እንደሚያጠፉት ተማከሩ።

የአባታችን የተወደደ አገልጋይ

¹⁵ኢየሱስም ይህን ዐውቆ ከዚያ ፈቀቅ አለ። ብዙ ሰዎችም ተከተሉት፣ ኹሉንም ፈወሳቸው፣ ¹⁶ስለ እርሱም ለማንም እንዳይናገሩ አዘዛቸው። ¹⁷ይህም በነቢዩ በኢሳይያስ የተነገረው እንዲፈጸም ኾነ፤

¹⁸“እነሆ፣ የመረጥኩት ባሪያዬ— ኢየሱስ— ነፍሴ ደስ የተሰኘችበት የምወደው ነው። መንፈሴን በእርሱ ላይ አኖራለሁ፣ እርሱም ለአሕዛብ ፍርድን ያውጃል። ¹⁹አይከራከርም ወይም አይጮኽም፣ ድምፁንም በአደባባይ የሚሰማ የለም። ²⁰የተቀጠቀጠን ሸምበቆ አይሰብርም፣ የሚጤስ የፈትል ክርም አያጠፋም፣ ፍርድን ወደ ድል እስኪያደርስ ድረስ፤ ²¹አሕዛብም በስሙ ተስፋ ያደርጋሉ።”

የተከፋፈለ መንግሥት ሊቆም አይችልም

²²ከዚያም ዕውርና ዲዳ የኾነ፣ አጋንንት ያደረበትን ሰው ወደ እርሱ አመጡለት፤ ፈወሰውም፣ ዲዳውም ሰው ተናገረ፣ አየም። ²³ሕዝቡም ኹሉ ተገረሙ፣ “ይህ የዳዊት ልጅ ይኾንን?” አሉ። ²⁴ፈሪሳውያን ግን ይህን ሰምተው፣ “ይህ ሰው አጋንንትን የሚያወጣው በአጋንንት አለቃ በብዔል ዜቡል ብቻ ነው” አሉ።

²⁵እርሱም ሐሳባቸውን ዐውቆ እንዲህ አላቸው፦ “እርስ በርሱ የተከፋፈለ መንግሥት ኹሉ ይጠፋል፣ እርስ በርሱ የተከፋፈለም ከተማ ወይም ቤት ኹሉ አይጸናም። ²⁶ሰይጣንም ሰይጣንን የሚያወጣ ከኾነ፣ እርስ በርሱ ተከፋፍሏል። እንግዲህ መንግሥቱ እንዴት ይጸናል? ²⁷እኔ አጋንንትን በብዔል ዜቡል የማወጣ ከኾንኩ፣ ልጆቻችሁስ በማን ያወጧቸዋል? ስለዚህ እነርሱ ፈራጆቻችሁ ይኾናሉ። ²⁸እኔ ግን አጋንንትን በአባታችን መንፈስ የማወጣ ከኾንኩ፣ እንግዲያስ የአባታችን መንግሥት ወደ እናንተ ደርሷል። ²⁹ወይም ማንም አስቀድሞ ኀይለኛውን ሳያስር፣ እንዴት ወደ ኀይለኛው ቤት ገብቶ ዕቃውን ሊዘርፍ ይችላል? ከዚያ በኋላ ቤቱን ይበዘብዛል።

³⁰ከእኔ ጋር ያልኾነ ኹሉ የሚቃወመኝ ነው፣ ከእኔ ጋር የማይሰበስብም ይበትናል። ³¹ስለዚህ እላችኋለሁ፣ ለሰዎች ኀጢአትና ስድብ ኹሉ ይቅር ይባልላቸዋል፣ መንፈስን መሳደብ ግን ይቅር አይባልም። ³²የሰው ልጅን የሚቃወም ቃል የሚናገር ኹሉ ይቅር ይባልለታል፤ መንፈስ ቅዱስን የሚቃወም የሚናገር ግን በዚህ ዓለም ቢኾን ወይም በሚመጣው ዓለም ይቅር አይባልለትም።

³³ዛፉን መልካም አድርጉ ፍሬውም መልካም ይኾናል፣ ወይም ዛፉን ክፉ አድርጉ ፍሬውም ክፉ ይኾናል፣ ዛፍ በፍሬው ይታወቃልና። ³⁴እናንተ የእፉኝት ልጆች! ክፉዎች ስትኾኑ መልካም ነገር እንዴት መናገር ትችላላችሁ? አፍ ከልብ ሙላት ይናገራልና። ³⁵መልካም ሰው ከመልካም መዝገብ መልካምን ያወጣል፣ ክፉ ሰውም ከክፉ መዝገብ ክፉን ያወጣል። ³⁶እላችኋለሁ፣ ሰዎች በሚናገሩት ከንቱ ቃል ኹሉ በፍርድ ቀን ይጠየቁበታል፤ ³⁷በቃልህ ትጸድቃለህና፣ በቃልህም ትኰነናለህ።”

የዮናስ ምልክት

³⁸ከዚያም ከጻፎችና ከፈሪሳውያን አንዳንዶቹ፣ “መምህር ሆይ፣ ከአንተ ምልክት ማየት እንፈልጋለን” አሉ።

³⁹እርሱም መልሶ እንዲህ አለ፦ “ክፉና አመንዝራ ትውልድ ምልክት ይሻል፣ ከነቢዩ ከዮናስ ምልክት በቀር ሌላ ምልክት አይሰጠውም። ⁴⁰ዮናስ በታላቁ ዓሣ ሆድ ውስጥ ሦስት ቀንና ሦስት ሌሊት እንደ ነበረ፣ እንዲሁ የሰው ልጅ በምድር ልብ ውስጥ ሦስት ቀንና ሦስት ሌሊት ይኾናል። ⁴¹የነነዌ ሰዎች በፍርድ ቀን ከዚህ ትውልድ ጋር ተነሥተው ይኰንኑታል፣ በዮናስ ስብከት ንስሐ ገብተዋልና፣ እነሆም ከዮናስ የሚበልጥ እዚህ አለ። ⁴²የደቡብ ንግሥት በፍርድ ቀን ከዚህ ትውልድ ጋር ተነሥታ ትኰንነዋለች፣ የሰሎሞንን ጥበብ ለመስማት ከምድር ዳርቻ መጥታለችና፣ እነሆም ከሰሎሞን የሚበልጥ እዚህ አለ።

⁴³ርኩስ መንፈስ ከሰው በወጣ ጊዜ፣ ዕረፍት እየፈለገ ውሃ በሌለበት ቦታ ይዞራል፣ ነገር ግን አያገኝም። ⁴⁴ከዚያም፣ ‘ወደ ወጣሁበት ወደ ቤቴ እመለሳለሁ’ ይላል። መጥቶም ባዶ ኾኖ፣ ተጠርጎና ተስተካክሎ ያገኘዋል። ⁴⁵ከዚያም ኼዶ ከራሱ ይልቅ የከፉ ሌሎች ሰባት መናፍስትን ይዞ ይመጣል፣ ገብተውም በዚያ ይኖራሉ፣ የዚያም ሰው ኋለኛው ኹኔታ ከፊተኛው ይከፋል። ለዚህ ክፉ ትውልድ ደግሞ እንዲሁ ይኾናል።”

የአባታችን እውነተኛ ቤተ ሰብ

⁴⁶እርሱም ገና ለሕዝቡ ሲናገር ሳለ፣ እነሆ እናቱና ወንድሞቹ ሊያነጋግሩት ፈልገው በውጭ ቆመው ነበር። ⁴⁷አንድ ሰውም፣ “እነሆ፣ እናትህና ወንድሞችህ ሊያነጋግሩህ ፈልገው በውጭ ቆመዋል” አለው።

⁴⁸እርሱ ግን ለነገረው ሰው መልሶ፣ “እናቴ ማን ናት? ወንድሞቼስ እነማን ናቸው?” አለ።

⁴⁹እጁንም ወደ ደቀ መዛሙርቱ ዘርግቶ እንዲህ አለ፦ “እነሆ እናቴና ወንድሞቼ! ⁵⁰በሰማይ ያለውን የአባቴን ፈቃድ የሚያደርግ ኹሉ፣ እርሱ ወንድሜና እኅቴ እናቴም ነውና።”