Sa Kapaisa ga Sabbath om Pukraangba gaye
Sabbath ni gehu ui bathamnu khatle bakut kathinu manpa sa thang damnuna koi impunu hung rwe, atiga Pharisee rwanna Baom lang ding Beelzebul bina diga rinluga, Maan to that lang maitwang bi chong katu rwe. Maanna katake, tanchatnu krwang talei ga lup se lune, chong gana sung ding indao swake, khatle tudannu ani Pa om kanwamnu tonu maan ga Baom bain gaye diga rinne.
Ani Pa na chongkhak hei bing bi kabia nge 18–21
12 1Ha chakrin bi Jisu na Sabbath ni louzam lak pi serwan hung ngaake. Baom potroi rwan chaam ngaakka gehu ui bathamluga sa thou rwe. 2Pharisee rwanna haga muluga Bakhou rinne, “Phaang ngo, Napotroi rwanna Sabbath ni za maknu chwan tonuwe.”
3Maanna bani khou rinne, “David le baom ong bachamnu rwan chaam ngaaknu kaan bi, maanna to ngaaknu ga nanina mu mak ngaakpo?” 4Maan ga ani Pa in bi khutluga meithaan bi thang damnu uilu phun ding sa ngaake, haga ga maan le baom ong bachamnu rwan lang za make, kalumsempu rwan khat tak lang khaak thang damnu gaye. 5“Naba Sabbath ni kalum in bi kalumsempu rwanna Sabbath ding braanluga le noh am maknu diga chongtan bi nanina mu mak ngaakpo? 6Eina nani khou rinnuwe, kalum in ma lian inkunu Pakhat abeiya amme. 7‘Eina phaangkriang ra-aamme, kathat lwatnu ra-aam make,’ dinu bakaan nanina theiye dabe, noh maknu rwan ding nanina koi impu mak tingnu. 8Balangbe Misa Sa Kapaisa ga Sabbath om Pukraangba gaye.”
ani Pa om Phaangkriang na Sabbath Ni Pi Sa Thangnu
9Maanna habei lana seluga bani om synagogue bi khut rwe. 10Habei ga bakut kathinu manpa pakhat am ngaake. Bating twei lang baning ngaakka banina Bakhou ngaiye, “Sabbath ni pi sa thangnu zagabo?”
11Maanna bani khou rinne, “Nani lak pi tudannu zao pakhat amnu maan ga, haba zao Sabbath ni khun bi ta thang nge dabe, choiluga lou thou thang mak tingnu mi suigabo? 12Misa pakhat ga zao ma barapka man amme! Atibriakpina Sabbath ni kasanu chwan to lang za rwe.” 13Habei ga Maanna manpa khou rinne, “Nakut swak balaanro.” Atiga maanna bakut swak balaannu nung, babaang khat ka danga pum sanuga sa bathiang lat rwe.
14Atiyeda Pharisee rwanna thou damluga Bating tatoga athat dingbo diga tup ngaak rwe.
ani Pa om Bakriang Swakmi
15Jisu na haga theiluga habei lana thou dam rwe. Atiga mi taswang khakna Bating zui ngaakka, Maanna bani khangsung ding pi sa thang rwe, 16Khatle Maanna Bating lang bi mi khatchale khou rin thang mako diga bani khou za thang rwe. 17Heiya thiamting Isaiah na rin thangnu ga pi hung tang thangnu lang towe:
18“Phaang ngo, Eina kathang swaknu Aswak Jisu, Alungning lungnwamnu Akriang. Eina Akatha Bating chung bi thanglune, khatle Maanna Gentile rwan khou chongsem pi rin thanglune. 19Maanna antiam laye khatle pao laye, mi khatchale na lampui bing bi Baraam ngaisu laye. 20Kabengnu tou sungrwan ding Maanna braan laye, khatle chongsem ding kraan ngamnu khou pi tang thang mak basaan, kameikhu ongnu mei ual ding Maanna mut laye; 21khatle Gentile rwanna Bameng bi bani om baning thanglune.”
Khak Langnu Krwang Talei Hannu Ngamlaye
22Habei ga mi khatna ri kasia khutnu mik chonu khatle paak chonu manpa pakhat ding Bakhou kalwang hung ngaake, atiga Maanna bating pi sa thang rwe, hadanga manpa haga kabia ngamluga mu le ngamme. 23Atiga mi khang khangsung kadoiluga rinne, “Heiya David Sa Kapaisa gabo?” 24Atiyeda Pharisee rwanna haga ngaisuluga rinne, “Heiba manpana ri kasia nun om bapuba Beelzebub paan bina ga ri kasia nun ding bathou satnuwe.”
25Maanna bani sung theiluga bani khou rinne, “Tudannu krwang talei bahak maitwang bi khak langnu maan ga braanne, khatle bahak maitwang bi khak langnu namlian le inkhun le hannu ngamlaye. 26Atiga Seitaan na Seitaan ding bathou sat tabe, maan bahak maitwang bi khak langnu miye. Atibriakpina bakrwang talei ga tatoga han ongnu ngamgabo? 27Eina Beelzebub paan bina ri kasia nun ding kazun sate dabe, nani sa kapaisa rwanna bani ding tu paan bina kazun satnubo? Atibriakpina bani ga nani om chongsempuba rwan tolune. 28Atiyeda Eina ani Pa om Katha paan bina ri kasia nun ding kazun sate dabe, ani Pa om krwang talei ga nani khou tang hung rwe. 29Naba pakhatchanalena balei kanatnu manpa ding khut mak tabe, tatoga bating in bi karakluga baom pot bing ding kapumnu ngamgabo? Bating khutnu nung bina maanna bain ga kapumlune.
30Tudannu Ei le ong bacham maknu maan ga Amaitwang bi ongnuwe; atiga tudannu Ei le khom karung maknu maan gana to imphaang thang nge. 31Atibriakpina Eina nani khou rinnuwe, noh khatle Rikrwang lu chung bi rin basiatnu khangsung ga mi nun lang kok thang bila rwe, atiyeda Katha ding rin basiatnu ga kok thang bilaye. 32Tudannu Misa Sa Kapaisa ding kalang swakka kabianu maan ga kok thang bila rwe; atiyeda tudannu Katha Bathiangnu ding kalang swakka kabianu maan ga, heiba talei ram bi le hung dingnu talei ram bi le kok thang bilaye.
33Thing kung ding kasanu towo, atiga ha om batheipi le kasanu towe; naba thing kung ding kasianu towo, atiga ha om batheipi le kasianu towe; balangbe thing kung ga ha om batheipina theinuwe. 34Nani brun kik taat rwan ga! Nani kasianu to ongnu nunna, kasanu bing tatoga kabia ngamgabo? Balangbe balungning bi sipka amnu bing ga bamun bina kabia swake. 35Kasanu mina baom kasanu tapaan bi gana kasanu phun swake; kasianu mina baom kasianu tapaan bi gana kasianu phun swake. 36Eina nani khou rinnuwe, chong kasemnu ni ga mi nunna bani kabianu chong khaam maknu khangsung lang katak ting lune, 37Balangbe nang om chong bina nang baze tang thanglune, khatle nang om chong bina nang koi impu thanglune.”
Jonah om Badannu
38Habei ga chongtan bachuthangnu rwan khatle Pharisee rwan kasemna rinne, “Bachuthangnupa, anina Nakhou badannu khat mu lang ra-aamme.”
39Maanna katake, “Sa maknu khatle rwan mei rwan basan laannu mikinna badannu ding rakanga zong nge, atiyeda thiamting Jonah om badan ga makka badannu khatchale pi bila rwe. 40Jonah ga nga lian bapum bi ni inthum khatle zingpha inthum ong ngaaknu ga danga, Misa Sa Kapaisa le talei om balungning bi ni inthum khatle zingpha inthum onglune. 41Chong kasemnu kaan bi Nineveh mi rwanna heiba mikin le han bachamlune khatle heiba mikin ding koi impu thanglune, balangbe Jonah om kasamnu bi bani sung le ngaake khatle phaang ngo, Jonah ma lian inkunu Pakhat abeiya amme. 42Chong kasemnu kaan bi kathwei pek la ramaanuna heiba mikin le han bachamlune khatle heiba mikin ding koi impu thanglune, balangbe maanna talei kalan lana Solomon om ningting ding ngai lang hung ngaake khatle phaang ngo, Solomon ma lian inkunu Pakhat abeiya amme.
43Bathiang maknu katha khatna mi khat khouna swak tamnu kaan bi, maan tui maaknu riak inza se rwanga basak riak zong ngaake, atiyeda khatchale zongsu make. 44Habei ga maanna rinne, ‘Eina bathan thangnu ain la ga han lat tamlune.’ Atiga maan hungnu kaan bi, haga kasaangnu, phiknu khatle to bachang thangnu ding muwe. 45Habei ga maanna seluga baraanto ma kasianu katha katei sari ding phun hungne; atiga bani habei ga karakluga ong damlune, atiga haba mi om kakhamnu ga bakaan ma kasianu lune. Hadanga heiba sa maknu mikin le tolune.”
Pa om Bazenu Insung
46Maan mi nun khou rin ong maang bi, banu le baunao rwan le Maan le diga rin nwamga pui la han ngaake. 47Mi khatna Maan khou rinne, “Phaang ngo, Nanu le naunao rwan le Nang le diga rin nwamga pui la han nge.”
48Bakhou rinnu maan khou Maanna katake, “Anu ga tubo, khatle aunao rwan ga tubo?”
49Atiga Baom potroi rwan lang Bakut balaan swakluga, Maanna rinne, “Phaang ngo, anu le aunao rwan le heiya amme! 50Balangbe tambaan la ongnu Apa om balung nwamnu to damnu maan ga aunao khatle aunao khatle anu gaye.”