Matiu 11

11 ¹Lẹ́yìn tí Jesu parí ìtọ́ni fún àwọn ọmọ-ẹ̀yìn rẹ̀ méjìlá, ó kúrò níbẹ̀ láti kọ́ni àti láti wàásù ní àwọn ìlú wọn.

Ìbéèrè Johanu Láti Inú Ẹ̀wọ̀n

²Johanu, nígbà tí ó gbọ́ nínú ẹ̀wọ̀n nípa àwọn iṣẹ́ Kristi, ó rán ọ̀rọ̀ nípasẹ̀ àwọn ọmọ-ẹ̀yìn rẹ̀, ³ó sì béèrè lọ́wọ́ rẹ̀ pé, “Ẹ̀yin ni ẹni tí ń bọ̀ wá, àbí kí a máa retí ẹlòmíràn?”

⁴Jesu dá wọn lóhùn pé, “Ẹ lọ sọ fún Johanu ohun tí ẹ ń gbọ́ tí ẹ sì ń rí:

⁵“Àwọn afọ́jú ń ríran, àwọn arọ ń rìn, a ń wẹ àwọn adẹ́tẹ̀ mọ́, àwọn adití ń gbọ́rọ̀, a ń jí àwọn òkú dìde, a sì ń wàásù ìhìnrere fún àwọn tálákà. ⁶Ìbùkún sì ni fún ẹni tí kò bá kọsẹ̀ nítorí mi.”

⁷Bí wọ́n ti ń lọ, Jesu bẹ̀rẹ̀ sí í sọ fún ọ̀pọ̀ ènìyàn nípa Johanu pé, “Kín ni ẹ jáde lọ sí aginjù láti wò? Esùsú tí afẹ́fẹ́ ń mì bí? ⁸Ṣùgbọ́n kín ni ẹ jáde lọ wò—ọkùnrin tí ó wọ aṣọ rírọ̀ bí? Ẹ wò ó, àwọn tí ń wọ aṣọ rírọ̀ ń gbé nínú ààfin àwọn ọba. ⁹Ṣùgbọ́n kín ni ẹ jáde lọ wò? Wòlíì bí? Bẹ́ẹ̀ ni, mo sọ fún yín, ẹni tí ó ju wòlíì lọ gidigidi. ¹⁰Èyí ni ẹni tí a kọ̀wé nípa rẹ̀ pé: ‘Wò ó, mo rán oníṣẹ́ mi ṣáájú rẹ, ẹni tí yóò tún ọ̀nà rẹ ṣe níwájú rẹ.’ ¹¹Lóòótọ́ ni mo sọ fún yín pé: nínú àwọn tí a bí láti ọ̀dọ̀ obìnrin, kò sí ẹni tí ó dìde tí ó tóbi ju Johanu Onítẹ̀bọmi lọ; síbẹ̀ ẹni tí ó kéré jù ní ìjọba Baba wa tóbi jù ú lọ. ¹²Láti ọjọ́ Johanu Onítẹ̀bọmi wá títí di ìsinsìnyí, ìjọba Baba wa ń faradà ìwà ipá, àwọn oní ipá sì ń fi agbára gbà á. ¹³Nítorí gbogbo àwọn Wòlíì àti Òfin sọ àsọtẹ́lẹ̀ títí di ìgbà Johanu, ¹⁴bí ẹ bá sì fẹ́ gbà á, òun ni Elijah tí ń bọ̀ wá. ¹⁵Ẹnikẹ́ni tí ó bá ní etí, kí ó gbọ́.

¹⁶Kín ni èmi yóò fi ìran yìí wé? Ó dàbí àwọn ọmọdé tí ó jókòó ní ọjà, tí wọ́n ń ké sí àwọn mìíràn: ¹⁷‘Àwa fun fèrè fún yín, ẹ kò sì jó; àwa kọrin ọ̀fọ̀, ẹ kò sì ṣọ̀fọ̀.’ ¹⁸Nítorí Johanu wá láìjẹun láìmumi, wọ́n sì wí pé, ‘Ó ní ẹ̀mí èṣù.’ ¹⁹Ọmọ Ènìyàn wá ní jíjẹun àti mímumi, wọ́n sì wí pé, ‘Òjẹun àti ọ̀mùtí, ọ̀rẹ́ àwọn agbowó-orí àti àwọn ẹlẹ́ṣẹ̀!’ Síbẹ̀ ọgbọ́n jẹ́ ẹni òdodo nípasẹ̀ àwọn iṣẹ́ rẹ̀.”

Ègbé Ni Fún Àwọn Ìlú Tí Kò Ronú Pìwà Dà

²⁰Nígbà náà ni ó bẹ̀rẹ̀ sí í bá àwọn ìlú tí ó ti ṣe ọ̀pọ̀lọpọ̀ iṣẹ́ ìyanu rẹ̀ wí, nítorí tí wọn kò ronú pìwà dà.

²¹“Ègbé ni fún ọ, Korasini! Ègbé ni fún ọ, Betisaida! Nítorí bí a bá ti ṣe àwọn iṣẹ́ ìyanu tí a ṣe nínú yín ní Tire àti Sidoni, wọn ìbá ti ronú pìwà dà ní ọjọ́ pípẹ́ sẹ́yìn nínú aṣọ ọ̀fọ̀ àti eérú. ²²Ṣùgbọ́n mo sọ fún yín pé: ọjọ́ ìdájọ́ yóò rọrùn láti faradà fún Tire àti Sidoni ju fún yín lọ. ²³Àti ìwọ, Kapernaumu—a ó ha gbé ọ ga dé ọ̀run bí? A ó mú ọ wálẹ̀ dé isà òkú. Bí a bá ti ṣe àwọn iṣẹ́ ìyanu tí a ṣe nínú rẹ ní Sodomu, òun ìbá dúró títí di òní. ²⁴Ṣùgbọ́n mo sọ fún yín pé: ilẹ̀ Sodomu yóò rí rere ní ọjọ́ ìdájọ́ ju ìwọ lọ.”

Baba Tí Ọmọ náà Fihàn

²⁵Ní àkókò náà, Jesu wí pé, “Mo yìn yín, Baba, Olódùmarè ọ̀run àti ayé, nítorí tí ẹ fi èyí pamọ́ kúrò lọ́dọ̀ àwọn ọlọ́gbọ́n àti àwọn olóye, tí ẹ sì fihàn fún àwọn ọmọ ọwọ́. ²⁶Bẹ́ẹ̀ ni, Baba, nítorí èyí wù yín. ²⁷A fi ohun gbogbo lé mi lọ́wọ́ láti ọ̀dọ̀ Baba mi. Baba nìkan ni ó mọ Ọmọ náà, Ọmọ náà nìkan ni ó sì mọ Baba, àti ẹnikẹ́ni tí Ọmọ náà bá yàn láti fi Baba hàn fún.

²⁸“Ẹ wá sọ́dọ̀ mi, gbogbo ẹ̀yin tí ẹ̀ ń ṣe wàhálà tí ẹrù sì ń wọ̀ yín, èmi yóò sì fún yín ní ìsinmi. ²⁹Ẹ gbé àjàgà mi wọ̀ yín, kí ẹ sì kọ́ ẹ̀kọ́ lọ́dọ̀ mi, nítorí tí mo jẹ́ ọlọ́kàn tútù àti onírẹ̀lẹ̀ ní ọkàn, ẹ ó sì rí ìsinmi fún ọkàn yín. ³⁰Nítorí àjàgà mi rọrùn, ẹrù mi sì fúyẹ́.”