Matthew 11

11 ¹After Jesus finish to teach im twelve disciples, e comot from dia go teach and preach for dem towns.

John Question From Prison

²John, wey dey for prison, hear all di work wey Christ dey do, so e send message through im disciples, ³come ask am say, “Na you be di one wey suppose come, abi na anoda one we go dey wait for?”

⁴Jesus answer dem say, “Go tell John wetin una dey hear and see:

⁵“Blind eyes dey see, lame people dey waka, di ones wey get leprosy dey clean, deaf ears dey hear, dead people dey rise, and dem dey preach di good news give poor people. ⁶And blessing dey for di person wey no go trip fall becos of me.”

⁷As dem dey comot, Jesus start to tell di crowd about John: “Wetin una go out enter di wilderness go see? Na grass wey wind dey shake? ⁸But why una go out—na to see man wey wear soft cloth? See, di ones wey dey wear soft cloth dey inside king palace. ⁹But why una go out? Na to see prophet? Yes, I dey tell una, e pass prophet well well. ¹⁰Na im be di one wey dem write about say: ‘See, I dey send my messenger go your front, wey go prepare your road before you.’ ¹¹Trully I tell una: among all di ones wey woman born, nobody wey big pass John di Baptist don rise; but di smallest one for di kingdom of our Papa big pass am. ¹²From di days of John di Baptist reach now, di kingdom of our Papa dey suffer force, and na di people wey dey use force dey grab am. ¹³Becos all di Prophets and di Law prophesy reach John time, ¹⁴and if una ready to accept am, na im be di Elijah wey suppose come. ¹⁵Whoever get ear, make e hear.

¹⁶Wetin I fit take compare dis generation? E be like children wey siddon for market, dey call di odas say: ¹⁷‘We blow flute for una, and una no dance; we sing funeral song, and una no cry.’ ¹⁸Becos John come, e no dey chop, e no dey drink, and dem talk say, ‘E get demon.’ ¹⁹Di Pikin of Man come, e dey chop and dey drink, and dem talk say, ‘See glutton and drunkard, friend of tax collectors and sinners!’ But wisdom dey prove sey e correct through di work wey e dey do.”

Trouble for di Towns Wey No Turn From Sin

²⁰Den e start to talk hard against di towns wey e do most of im miracle, becos dem no turn from dia sin.

²¹“Trouble for you, Chorazin! Trouble for you, Bethsaida! Becos if di miracle wey I do inside una, dem for do am for Tyre and Sidon, dem for don turn back tey tey, dey wear mourning cloth and put ash for body. ²²But I dey tell una: judgment day go easy pass for Tyre and Sidon than for una. ²³And you, Capernaum—you think say dem go lift you go heaven? Dem go bring you come down go inside grave. Becos if di miracle wey I do inside you, dem for do am for Sodom, e for still dey stand today. ²⁴But I dey tell una: Sodom land go fare betta for judgment day than una.”

Di Papa Wey di Pikin Show Us

²⁵For dat time Jesus talk say, “I dey praise you, Papa, Oga of heaven and earth, becos you hide dis thing from di wise and correct-head people, and you show am give small pikin. ²⁶Yes, Papa, becos na so e sweet you. ²⁷My Papa don hand everything give me. Na only di Papa know di Pikin, na only di Pikin know di Papa, and anybody wey di Pikin choose to show di Papa give.

²⁸“Come to me, all una wey don tire and dey carry heavy load, and I go give una rest. ²⁹Put my yoke for una neck and learn from me, becos I dey gentle and I get humble heart, and una go find rest for una soul. ³⁰Becos my yoke easy, and my load light.”