ਮੱਤੀ 11

11 ¹ਜਦੋਂ ਯਿਸੂ ਆਪਣੇ ਬਾਰ੍ਹਾਂ ਚੇਲਿਆਂ ਨੂੰ ਹਿਦਾਇਤਾਂ ਦੇ ਹਟਿਆ, ਤਾਂ ਉਹ ਉੱਥੋਂ ਉਨ੍ਹਾਂ ਦੇ ਨਗਰਾਂ ਵਿੱਚ ਸਿੱਖਿਆ ਦੇਣ ਅਤੇ ਪਰਚਾਰ ਕਰਨ ਲਈ ਤੁਰ ਪਿਆ।

ਕੈਦਖ਼ਾਨੇ ਵਿੱਚੋਂ ਯੂਹੰਨਾ ਦਾ ਸਵਾਲ

²ਯੂਹੰਨਾ ਨੇ ਕੈਦਖ਼ਾਨੇ ਵਿੱਚ ਮਸੀਹ ਦੇ ਕੰਮਾਂ ਬਾਰੇ ਸੁਣ ਕੇ ਆਪਣੇ ਚੇਲਿਆਂ ਦੇ ਰਾਹੀਂ ਸੁਨੇਹਾ ਭੇਜਿਆ, ³ਅਤੇ ਉਸ ਨੂੰ ਪੁੱਛਿਆ, “ਕੀ ਤੂੰ ਉਹੀ ਹੈਂ ਜਿਸ ਨੇ ਆਉਣਾ ਹੈ, ਜਾਂ ਅਸੀਂ ਕਿਸੇ ਹੋਰ ਦੀ ਉਡੀਕ ਕਰੀਏ?”

⁴ਯਿਸੂ ਨੇ ਉਨ੍ਹਾਂ ਨੂੰ ਉੱਤਰ ਦਿੱਤਾ, “ਜਾਓ ਅਤੇ ਜੋ ਕੁਝ ਤੁਸੀਂ ਸੁਣਦੇ ਅਤੇ ਵੇਖਦੇ ਹੋ, ਉਹ ਯੂਹੰਨਾ ਨੂੰ ਦੱਸੋ:

⁵“ਅੰਨ੍ਹੀਆਂ ਅੱਖਾਂ ਵੇਖਦੀਆਂ ਹਨ, ਲੰਗੜੇ ਤੁਰਦੇ ਹਨ, ਕੋੜ੍ਹੀ ਸ਼ੁੱਧ ਕੀਤੇ ਜਾਂਦੇ ਹਨ, ਬੋਲੇ ਸੁਣਦੇ ਹਨ, ਮੁਰਦੇ ਜਿਵਾਲੇ ਜਾਂਦੇ ਹਨ, ਅਤੇ ਗ਼ਰੀਬਾਂ ਨੂੰ ਖ਼ੁਸ਼ਖ਼ਬਰੀ ਸੁਣਾਈ ਜਾਂਦੀ ਹੈ। ⁶ਅਤੇ ਧੰਨ ਹੈ ਉਹ ਜਿਹੜਾ ਮੇਰੇ ਕਾਰਨ ਠੋਕਰ ਨਹੀਂ ਖਾਂਦਾ।”

⁷ਜਦੋਂ ਉਹ ਜਾ ਰਹੇ ਸਨ, ਯਿਸੂ ਯੂਹੰਨਾ ਬਾਰੇ ਭੀੜਾਂ ਨੂੰ ਆਖਣ ਲੱਗਾ: “ਤੁਸੀਂ ਉਜਾੜ ਵਿੱਚ ਕੀ ਵੇਖਣ ਗਏ ਸੀ? ਹਵਾ ਨਾਲ ਹਿੱਲਦਾ ਹੋਇਆ ਕਾਨਾ? ⁸ਪਰ ਤੁਸੀਂ ਕਿਉਂ ਗਏ—ਕੀ ਨਰਮ ਬਸਤਰ ਪਹਿਨੇ ਹੋਏ ਮਨੁੱਖ ਨੂੰ ਵੇਖਣ? ਵੇਖੋ, ਨਰਮ ਬਸਤਰ ਪਹਿਨਣ ਵਾਲੇ ਰਾਜ ਮਹਿਲਾਂ ਵਿੱਚ ਹੁੰਦੇ ਹਨ। ⁹ਪਰ ਤੁਸੀਂ ਕਿਉਂ ਗਏ ਸੀ? ਕੀ ਕਿਸੇ ਨਬੀ ਨੂੰ ਵੇਖਣ? ਹਾਂ, ਮੈਂ ਤੁਹਾਨੂੰ ਆਖਦਾ ਹਾਂ, ਨਬੀ ਨਾਲੋਂ ਵੀ ਕਿਤੇ ਵੱਧ। ¹⁰ਇਹ ਉਹੀ ਹੈ ਜਿਸ ਬਾਰੇ ਲਿਖਿਆ ਹੋਇਆ ਹੈ: ‘ਵੇਖ, ਮੈਂ ਆਪਣੇ ਦੂਤ ਨੂੰ ਤੇਰੇ ਅੱਗੇ ਭੇਜਦਾ ਹਾਂ, ਜਿਹੜਾ ਤੇਰੇ ਅੱਗੇ ਤੇਰਾ ਰਾਹ ਤਿਆਰ ਕਰੇਗਾ।’ ¹¹ਮੈਂ ਤੁਹਾਨੂੰ ਸੱਚ ਆਖਦਾ ਹਾਂ: ਜਿਹੜੇ ਔਰਤਾਂ ਤੋਂ ਜੰਮੇ ਹਨ, ਉਨ੍ਹਾਂ ਵਿੱਚੋਂ ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਨਾਲੋਂ ਵੱਡਾ ਕੋਈ ਨਹੀਂ ਉੱਠਿਆ; ਫਿਰ ਵੀ ਸਾਡੇ ਪਿਤਾ ਦੇ ਰਾਜ ਵਿੱਚ ਸਭ ਤੋਂ ਛੋਟਾ ਉਸ ਨਾਲੋਂ ਵੱਡਾ ਹੈ। ¹²ਯੂਹੰਨਾ ਬਪਤਿਸਮਾ ਦੇਣ ਵਾਲੇ ਦੇ ਦਿਨਾਂ ਤੋਂ ਲੈ ਕੇ ਹੁਣ ਤੱਕ, ਸਾਡੇ ਪਿਤਾ ਦਾ ਰਾਜ ਜ਼ੋਰ-ਜ਼ਬਰਦਸਤੀ ਸਹਿੰਦਾ ਹੈ, ਅਤੇ ਜ਼ਬਰਦਸਤੀ ਕਰਨ ਵਾਲੇ ਇਸ ਨੂੰ ਖੋਹ ਲੈਂਦੇ ਹਨ। ¹³ਕਿਉਂਕਿ ਸਾਰੇ ਨਬੀਆਂ ਅਤੇ ਬਿਵਸਥਾ ਨੇ ਯੂਹੰਨਾ ਤੱਕ ਭਵਿੱਖਬਾਣੀ ਕੀਤੀ, ¹⁴ਅਤੇ ਜੇ ਤੁਸੀਂ ਇਸ ਨੂੰ ਮੰਨਣਾ ਚਾਹੋ, ਤਾਂ ਇਹੀ ਉਹ ਏਲੀਯਾਹ ਹੈ ਜਿਸ ਨੇ ਆਉਣਾ ਸੀ। ¹⁵ਜਿਸ ਦੇ ਕੰਨ ਹਨ, ਉਹ ਸੁਣੇ।

¹⁶ਮੈਂ ਇਸ ਪੀੜ੍ਹੀ ਦੀ ਤੁਲਨਾ ਕਿਸ ਨਾਲ ਕਰਾਂ? ਇਹ ਉਨ੍ਹਾਂ ਬੱਚਿਆਂ ਵਰਗੀ ਹੈ ਜਿਹੜੇ ਬਜ਼ਾਰਾਂ ਵਿੱਚ ਬੈਠ ਕੇ ਦੂਜਿਆਂ ਨੂੰ ਪੁਕਾਰ ਕੇ ਆਖਦੇ ਹਨ: ¹⁷‘ਅਸੀਂ ਤੁਹਾਡੇ ਲਈ ਬੰਸਰੀ ਵਜਾਈ, ਅਤੇ ਤੁਸੀਂ ਨਾ ਨੱਚੇ; ਅਸੀਂ ਸੋਗ ਦਾ ਗੀਤ ਗਾਇਆ, ਅਤੇ ਤੁਸੀਂ ਨਾ ਰੋਏ।’ ¹⁸ਕਿਉਂਕਿ ਯੂਹੰਨਾ ਨਾ ਖਾਂਦਾ ਨਾ ਪੀਂਦਾ ਆਇਆ, ਅਤੇ ਉਹ ਆਖਦੇ ਹਨ, ‘ਉਸ ਨੂੰ ਭੂਤ ਚਿੰਬੜਿਆ ਹੋਇਆ ਹੈ।’ ¹⁹ਮਨੁੱਖ ਦਾ ਪੁੱਤਰ ਖਾਂਦਾ-ਪੀਂਦਾ ਆਇਆ, ਅਤੇ ਉਹ ਆਖਦੇ ਹਨ, ‘ਵੇਖੋ, ਖਾਊ ਅਤੇ ਸ਼ਰਾਬੀ, ਮਸੂਲੀਆਂ ਅਤੇ ਪਾਪੀਆਂ ਦਾ ਮਿੱਤਰ!’ ਫਿਰ ਵੀ ਬੁੱਧ ਆਪਣੇ ਕੰਮਾਂ ਦੁਆਰਾ ਸੱਚੀ ਸਾਬਤ ਹੁੰਦੀ ਹੈ।”

ਤੋਬਾ ਨਾ ਕਰਨ ਵਾਲੇ ਨਗਰਾਂ ਉੱਤੇ ਅਫ਼ਸੋਸ

²⁰ਤਦ ਉਹ ਉਨ੍ਹਾਂ ਨਗਰਾਂ ਨੂੰ ਝਿੜਕਣ ਲੱਗਾ ਜਿੱਥੇ ਉਸ ਨੇ ਆਪਣੇ ਬਹੁਤੇ ਅਚੰਭੇ ਕੀਤੇ ਸਨ, ਕਿਉਂਕਿ ਉਨ੍ਹਾਂ ਨੇ ਤੋਬਾ ਨਹੀਂ ਸੀ ਕੀਤੀ।

²¹“ਹੇ ਖੁਰਾਜ਼ੀਨ, ਤੇਰੇ ਉੱਤੇ ਅਫ਼ਸੋਸ! ਹੇ ਬੈਤਸੈਦਾ, ਤੇਰੇ ਉੱਤੇ ਅਫ਼ਸੋਸ! ਕਿਉਂਕਿ ਜਿਹੜੇ ਅਚੰਭੇ ਤੁਹਾਡੇ ਵਿੱਚ ਕੀਤੇ ਗਏ, ਜੇ ਉਹ ਸੂਰ ਅਤੇ ਸੈਦਾ ਵਿੱਚ ਕੀਤੇ ਜਾਂਦੇ, ਤਾਂ ਉਹ ਬਹੁਤ ਚਿਰ ਪਹਿਲਾਂ ਹੀ ਤੱਪੜ ਪਹਿਨ ਕੇ ਅਤੇ ਸੁਆਹ ਵਿੱਚ ਬੈਠ ਕੇ ਤੋਬਾ ਕਰ ਲੈਂਦੇ। ²²ਪਰ ਮੈਂ ਤੁਹਾਨੂੰ ਆਖਦਾ ਹਾਂ: ਨਿਆਂ ਦੇ ਦਿਨ ਸੂਰ ਅਤੇ ਸੈਦਾ ਦਾ ਹਾਲ ਤੁਹਾਡੇ ਨਾਲੋਂ ਸਹਿਣ ਯੋਗ ਹੋਵੇਗਾ। ²³ਅਤੇ ਹੇ ਕਫ਼ਰਨਾਹੂਮ, ਕੀ ਤੂੰ ਅਕਾਸ਼ ਤੱਕ ਉੱਚਾ ਕੀਤਾ ਜਾਵੇਂਗਾ? ਤੂੰ ਪਤਾਲ ਤੱਕ ਹੇਠਾਂ ਸੁੱਟਿਆ ਜਾਵੇਂਗਾ। ਜਿਹੜੇ ਅਚੰਭੇ ਤੇਰੇ ਵਿੱਚ ਕੀਤੇ ਗਏ, ਜੇ ਉਹ ਸਦੂਮ ਵਿੱਚ ਕੀਤੇ ਜਾਂਦੇ, ਤਾਂ ਉਹ ਅੱਜ ਤੱਕ ਖੜ੍ਹਾ ਰਹਿੰਦਾ। ²⁴ਪਰ ਮੈਂ ਤੁਹਾਨੂੰ ਆਖਦਾ ਹਾਂ: ਨਿਆਂ ਦੇ ਦਿਨ ਸਦੂਮ ਦੇ ਦੇਸ ਦਾ ਹਾਲ ਤੇਰੇ ਨਾਲੋਂ ਚੰਗਾ ਹੋਵੇਗਾ।”

ਪੁੱਤਰ ਦੁਆਰਾ ਪ੍ਰਗਟ ਕੀਤਾ ਗਿਆ ਪਿਤਾ

²⁵ਉਸ ਵੇਲੇ ਯਿਸੂ ਨੇ ਆਖਿਆ, “ਹੇ ਪਿਤਾ, ਅਕਾਸ਼ ਅਤੇ ਧਰਤੀ ਦੇ ਮਾਲਕ, ਮੈਂ ਤੇਰੀ ਉਸਤਤ ਕਰਦਾ ਹਾਂ, ਕਿਉਂਕਿ ਤੂੰ ਇਹ ਗੱਲਾਂ ਬੁੱਧਵਾਨਾਂ ਅਤੇ ਸਮਝਦਾਰਾਂ ਤੋਂ ਲੁਕਾਈਆਂ, ਅਤੇ ਬਾਲਕਾਂ ਉੱਤੇ ਪ੍ਰਗਟ ਕੀਤੀਆਂ। ²⁶ਹਾਂ, ਹੇ ਪਿਤਾ, ਕਿਉਂਕਿ ਇਹੀ ਤੈਨੂੰ ਚੰਗਾ ਲੱਗਾ। ²⁷ਮੇਰੇ ਪਿਤਾ ਨੇ ਸਭ ਕੁਝ ਮੈਨੂੰ ਸੌਂਪ ਦਿੱਤਾ ਹੈ। ਪੁੱਤਰ ਨੂੰ ਕੇਵਲ ਪਿਤਾ ਹੀ ਜਾਣਦਾ ਹੈ, ਅਤੇ ਪਿਤਾ ਨੂੰ ਕੇਵਲ ਪੁੱਤਰ ਹੀ ਜਾਣਦਾ ਹੈ, ਅਤੇ ਉਹ ਜਿਸ ਉੱਤੇ ਪੁੱਤਰ ਪਿਤਾ ਨੂੰ ਪ੍ਰਗਟ ਕਰਨਾ ਚਾਹੇ।

²⁸“ਹੇ ਸਾਰੇ ਥੱਕੇ ਹੋਏ ਅਤੇ ਭਾਰ ਹੇਠ ਦੱਬੇ ਹੋਏ ਲੋਕੋ, ਮੇਰੇ ਕੋਲ ਆਓ, ਅਤੇ ਮੈਂ ਤੁਹਾਨੂੰ ਅਰਾਮ ਦਿਆਂਗਾ। ²⁹ਮੇਰਾ ਜੂਲਾ ਆਪਣੇ ਉੱਤੇ ਚੁੱਕ ਲਓ ਅਤੇ ਮੇਰੇ ਤੋਂ ਸਿੱਖੋ, ਕਿਉਂਕਿ ਮੈਂ ਦਿਲ ਦਾ ਨਰਮ ਅਤੇ ਨਿਮਰ ਹਾਂ, ਅਤੇ ਤੁਹਾਡੀਆਂ ਜਾਨਾਂ ਨੂੰ ਅਰਾਮ ਮਿਲੇਗਾ। ³⁰ਕਿਉਂਕਿ ਮੇਰਾ ਜੂਲਾ ਸੌਖਾ ਹੈ, ਅਤੇ ਮੇਰਾ ਭਾਰ ਹੌਲਾ ਹੈ।”