John 9

9 ¹Jishuna khaung khavā tharan, pharāthang eina mik khangapeoa mi akha theihaowa. ²Awui sākhangatha̱bingna ali ngahāna, "Ojā, khipāna morei sai, mipa hina lah ava̱ avāva̱na, ana mik khangapeo eina apharākhala?"

³"Mipa hinala ava̱ avāva̱nala morei masāmana,' da Jishuna ngahānkai, 'kha ithumwui Avāwui ot chi awuili phongmi khavai hi shokkahaina. ^a a v3 Jishuna mipa chiwui mik khangapeo chi morei khamiwui tandi khamina da mahomana. Chiwui shongkatē ana ithumwui Avāli chithei, okathuina makānkhanā maningla matheiwui apam chili awui huikhamiwui ot phongmithangra. ⁴Ithumna ili kashirāta chiwui ot chi ngashun leilakha sāphalungra; ngayā kharāra, chitharan khipānakha ot masārarmana. ⁵I okathuili leilakha, I okathuiwui kahorna.'"

⁶Hi hānglaga, ana ngaleili machora̱ mashorrora, sali eina leipā sāda, mipa chiwui mikli parza̱mi.

⁷Ana ali hānga, "Vālaga, Siloam ra̱khongli ra̱vai" (chiwui kakhalata Kashirāt kajina). Chieina mipa chi vai, ra̱vai, kala mik theihaoda latunga.

⁸Khongnainao eina rida ali zāt poda theikahaibingna hānga, "Hi pamda zāt pochingakha mipa chi maningmala?" ⁹Kaikhana hānga, "Chipāna." Khangatei kaikhana hānga, "Chi maningmana, ana awui khamina thai." Kha ana hāngchinga, "I chipā laka."

¹⁰Chieina athumna ali ngahāna, "Chithākha nawui mik kathāda rak khangasakhaokhala?"

¹¹Ana ngahānkai, "Jishu da hoi mipa china leipā sāda, imikli parza̱milaga, ili hānga, 'Siloamli vālaga ra̱vai.' Chieina I vai, ra̱vai, kala mik theihaira."

¹²Athumna ali hānga, "Ana kali leikhala?" Ana hānga, "I matheimana."

¹³Athumna rida mik khangapeoa mipa chi Phariseebingli khuirai. ¹⁴Jishuna leipā sāda awui mik rak khangasak zimiksho chi Sabbathna. ¹⁵Chieina Phariseebingna ana kathada mik theihaokhala da ali ngahānlui. Ana athumli hānga, "Ana imikli leipā parza̱mi, kala I ra̱vai, kala ara I theihaira."

¹⁶Kaikhana Phariseebingna hānga, "Mipa hi Vare eina makharāmana, kaja ana Sabbath chi mamayonmana." Kha kaikhana khangatei hānga, "Morei kaphunga mi akhana kathāda hikathā matakhak kahai ot sāpairakhala?" Chieina athumwui ngachaili ning ngakai khangarok shokhaowa.

¹⁷Chieina athumna mik khangapeoa mipa chili ngahānlui, "Ana nawui mik rak khangasakhaowui vang, nana awui maramli khi hāngkhala?" Ana hānga, "Ana marānna."

¹⁸Jihudibingna, kathei samphangpai mipāwui ava̱ eina avāva̱li mahokhuiranglakha eina tangda, a mik khangapeo leikahai kala kathei samphanghaiakha kaji mashitsangmana. ¹⁹Athumna anili ngahāna, "Hi mik khangapeo eina kapharāna da nanina kahāng naniwui naomayara chila? Chithākha kathada ara ana theikhala?"

²⁰Awui ava̱ eina avāva̱na ngahānkai, "Hi iniwui naomayara kala a mik khangapeo eina kapharā kaji inina thei. ²¹Kha ara kathada ana theikhala kaji inina matheimana; lah khipāna awui mik rak ngasakhala kaji inina matheimana. Ali ngahānlu; a mapungkaphā mi ngasāhaira; ana akhalattawui vang matuira." ²²Awui ava̱ eina avāva̱na Jihudibingli ngacheehaida hi hānga. Kaja kachikathāna Jishu chi Khristana da hāngphatakha, synagoguewui eina khuishokhaipaira da Jihudibingna rida mayāngaroka. ^b b v22 Synagoguewui eina khuishokhaipai kaji hi, Jihudi yurwui eina okthui apong kala khorum apong saikorali katonga katatthat kaji hāngna. ²³Chiwui vang eina awui ava̱ eina avāva̱na hānga, "A mapungkaphā mi ngasāhaira; ali ngahānlu."

²⁴Chieina athumna mik khangapeo leikahai mipā chi latluida hokhuida hānga, "Vareli tekmatei ngasaklu. Hi mipā morei kaphungana da ithumna thei."

²⁵Ana ngahānkai, "A morei kaphunga jilala maninglala, ina matheimana. Ina ot akha thei: ina mik khangapeo leikahaina, ara ina theihaira."

²⁶Athumna ali hānga, "Ana nali khi sāhaokhala? Kathada ana nawui mik rak ngasakhala?"

²⁷Ana athumli ngahānkai, "Ina nathumli rida hānghaira, kala nathumna manganāsangmana. Khisāda nathumna chi latluida shāngaikhala? Nathumla awui sākhangatha̱bing ngasāngaila?"

²⁸Chieina athumna ali temshida hānga, "Na awui sākhangatha̱na, kha ithum Moseswui sākhangatha̱bingna. ²⁹Varena Mosesli hānga kaji ithumna thei, kha hi mipā kachiwui eina kharākhala kaji ithumna matheimana."

³⁰Mipā china athumli ngahānkai, "Hili matakhak kahai ot akha lei: a kachiwui eina kharākhala kaji nathumna matheimana, chithālala ana iwui mik rak ngasakhaira. ³¹Varena morei kaphungbingli manganāsangmana kaji ithumna thei, kha kachikathāna Vareli khangacheea awui kaphaning sāakha, Varena ali nganāsangra. ³²Mik khangapeo eina kapharā mipā akhawui mik rak ngasakhai kaji, okathui haokaphokwui eina thuida aja rāshungda akhana mashālakmana. ³³Hi mipā Varewui eina kharā maningakha, ana khikha masāpaimana."

³⁴Athumna ali ngahānkai, "Na moreilungli katonga kapharāna, chithālala nana ithumli tamchitheikhala?" da ali kayāngli horshokhaowa.

Nathum Shitsanghairala?

³⁵Athumna ali kayāngli shokngasakhaira da Jishuna chi kashā eina, ali samphangda hānga, "Miwui Naomayarali nana shitsangla?"

³⁶Ana ngahānkai, "Amei, ina ali shitsang khavai, a khipākhala?"

³⁷Jishuna ali hānga, "Nana ali theihaira, kala nali ngazekta khalei chi a laka."

³⁸Ana hānga, "Proho, ina shitsanga," kala ana ali khoruma.

³⁹Jishuna hānga, "Ina bichar sākhavai okathui hili kharāna. Chieina matheila khalei bing theira, kala katheibing chi mik khangapeoa ngasāra."

⁴⁰Ali ngasoda khalei Pharisee kaikhana chi kashā eina hānga, "Ithumla mik khangapeola?"

⁴¹Jishuna athumli hānga, "Nathum mik khangapeoakha, nathumli morei maleimara; kha nathumna 'Ithum theira' da kahāngwui vang, nathumwui morei leichinga."