Juwau 9 FHB Father's Heart Bible™

9 ¹Yezu mukhapita, aona mamuna m'bodzi wakuti akhali bofu kubulukira pakubalwa kwace. ²Anyakupfundza ace am'bvundza kuti: “Rabi, mbani adadawa, mamuna uyu peno anyakubala ace, toera iye abalwe bofu?”

³“Nee mamuna uyu nee anyakubala ace adadawa,” Yezu atawira, “mbwenye pyenepi pyacitika toera mabasa a Baba wathu aonekere mwa iye. ^a a v3 Yezu akhonda kudzindikira bofu ya mamuna ninga kutcunyuswa thangwi ya madawo. M'mbuto mwace, asapangiza kuna Baba wathu, wakuti basa yace yakuombola inadzaonekera pa mbuto ineneyi yakuti dziko yaona kucimwana basi. ⁴Tisafunika kucita mabasa a ule adandituma mukali n'dzidzi wa masikati; usiku unkudza, wakuti nkhabe munthu anakwanisa kuphata basa. ⁵Mu ndzidzi onsene wakuti ndiri pa dziko, Ine ndine ceza ca dziko.”

⁶Pidamala iye kulonga pyenepi, asenka pa ntsi, acita matope na malovu, mbaadzodza pa maso a mamuna.

⁷Iye ampanga kuti: “Ndoko, kasambe m'dziva ya Siloe” (pisabveka: Adatumwa). Na tenepo mamuna aenda, kasamba, mbabwerera mbakwanisa kuona.

⁸Anansi na ale akhamuona mbakaphemba kutoma alonga tenepa: “Si uyu tayu ule akhakhala pantsi mbaphemba?” ⁹Anango alonga kuti: “Ndiye enewo.” Anango alonga kuti: “Nkhabe, iye asaoneka ninga iye basi.” Mbwenye iye apitiriza kulonga kuti: “Ndine ine mwene.”

¹⁰Na tenepo am'bvundza kuti: “Maso ako afunguka tani?”

¹¹Iye atawira kuti: “Mamuna wakucemerwa Yezu acita matope, aadzodza pa maso anga, mbandipanga kuti: ‘Ndoko ku Siloe ukasambe.’ Na tenepo ndaenda, ndasamba, mbandikwanisa kuona.”

¹²Iwo ampanga kuti: “Ali kupi iye?” Iye atawira: “Nkhabe kudziwa.”

¹³Amuendesa kuna Afarisi mamuna ule akhali bofu. ¹⁴Ntsiku ukhacita Yezu matope mbafungula maso a mamuna, ukhali ntsiku wa Sabudu. ¹⁵Na tenepo Afarisimbo am'bvundza pontho kuti atoma tani kuona. Iye aapanga kuti: “Athira matope pa maso anga, ndasamba, mbandiona.”

¹⁶Afarisi anango alonga kuti: “Mamuna uyu nkhabe kubuluka kuna Mulungu, thangwi iye nkhabe kukoya Sabudu.” Anango alonga kuti: “Munthu wakudawa anakwanisa tani kucita pidzindikiro pyenepi?” Na tenepo apambukana pakati pawo.

¹⁷Am'bvundza pontho mamuna bofu kuti: “Iwe usalonganji thangwi ya iye, nakuti akufungulira maso ako?” Iye atawira: “Iye ndi mprofeta.”

¹⁸Ayudha nee akhakhulupira kuti iye akhali bofu mbatoma kuona, mpaka pidacemera iwo anyakubala a mamuna ule atoma kuona. ¹⁹Aabvundza kuti: “Uyu ndi mwana wanu wakuti musalonga kuti abalwa bofu? Pyenepi asakwanisa tani kuona cincino?”

²⁰Anyakubala ace atawira kuti: “Ife tisadziwa kuti uyu ndi mwana wathu, pontho kuti iye abalwa bofu. ²¹Mbwenye kuti asaona tani cincino, ife nkhabe kudziwa; peno mbani adafungula maso ace, ife nkhabe kudziwa. Mbvundzeni iye, ndi nkulu; iye anadzilongera ekhene.” ²²Anyakubala ace alonga tenepa thangwi akhagopa Ayudha, nakuti Ayudha akhadabverana kale kuti munthu onsene angabvuma kuti Yezu ndi Kirixtu, iye mbathamangiswa m'sinagoga. ^b b v22 Kuthamangiswa m'sinagoga pikhapangiza kuti munthu asasiyiswa mwakukwana m'makhaliro a anthu na m'cipembedzo m'bungwe ya Ayudha. ²³Ndi thangwi yace anyakubala ace alonga kuti: “Iye ndi nkulu; mbvundzeni iye.”

²⁴Na tenepo acemera pontho mamuna ule akhali bofu, mbampanga kuti: “Pereka mbiri kuna Mulungu. Ife tisadziwa kuti mamuna uyu ndi nyakudawa.”

²⁵Iye atawira kuti: “Khala iye ndi nyakudawa, ine nkhabe kudziwa. Cinthu cibodzi ndisaciwa: ndikhali bofu, cincino ndisaona.”

²⁶Iwo ampanga kuti: “Iye akucitira ninji? Afungula tani maso ako?”

²⁷Iye aatawira kuti: “Ndakupangani kale, mbwenye imwe nee mwabvesera. Thangwi yanji musafuna kubva pontho? Kodi imwembo musafuna kukhala anyakupfundza ace?”

²⁸Iwo an'xola, mbalonga kuti: “Iwe ndiwe nyakupfundza wace, mbwenye ife ndife anyakupfundza a Mozè. ²⁹Ife tisadziwa kuti Mulungu alonga na Mozè, mbwenye nkhabe kudziwa kuti mamuna uyu asabuluka kupi.”

³⁰Mamuna aatawira kuti: “Cinthu cakudzumisa ndi ici: imwe nkhabe kudziwa kuti asabuluka kupi, mbwenye iye afungula maso anga. ³¹Tisadziwa kuti Mulungu nkhabe kubvesera anyakudawa, mbwenye munthu angalemedza Mulungu mbacita cifuno cace, Mulungu asam'bvesera. ³²Kubulukira pidatoma dziko, cipo kubvekembo kuti munthu afungula maso a munthu adabalwa bofu. ³³Mamuna uyu angadakhonda kubuluka kuna Mulungu, nee mbadakwanisa kucita cinthu.”

³⁴Iwo antawira kuti: “Iwe wabalwa mwakudzala na madawo, mbwenye usafuna kutipfundzisa?” Na tenepo am'bulusa kunja.

Kodi Usakhulupira?

³⁵Yezu abva kuti am'bulusa kunja, pidan'gumana iye, ampanga kuti: “Iwe usakhulupira Mwana wa Munthu?”

³⁶Iye atawira kuti: “Mbani iye, mbuya, toera ndinkhulupire?”

³⁷Yezu ampanga kuti: “Iwe wamuona kale, ndiye uyu wakuti akulonga na iwe.”

³⁸Iye alonga kuti: “Mbuya, ndisakhulupira,” mbam'lambira.

³⁹Yezu alonga kuti: “Ine ndabwera pa dziko ino toera kutonga, toera ale akuti nkhabe kuona akwanise kuona, na ale akuti asaona akhale mabofu.”

⁴⁰Afarisi anango akhali na iye abva pyenepi mbalonga kuti: “Kodi ifembo ndife mabofu?”

⁴¹Yezu aapanga kuti: “Mungadakhala mabofu, nee mbamukhala na madawo; mbwenye nakuti musalonga kuti: ‘Tisaona,’ madawo anu asapitiriza.”