Leikashina Mijang Mavaimana
Kashānga mili kaphāpamli pamngasak kala kachāma mili ngaleili pamngasakakha, kazippam chi makaphā ningngai eina bichar sākhame ngasāra, kaja ithumwui Avāna shitkasangli kashānga ngasā khavai kachāmabingli kapangkhui. Kathaia avānaoli tuimāng eina kazāt ngasak shitkasang chi kathina.
2 1Ivānaongarā, ithumwui tekhamatei Proho Jishu Khristali shitkasang mibing sāda, mijang masaalu. 2Sinā unra̱ sangkahai kala khamathā kachon ngavaida mi akha nathumwui kazipli zangda, makhaotot kahai kachon ngavaida kachāma mi akhala zangakha, 3Nathumna kachon khamathā ngavaida chili yangsangda, "Hili pamlu, hi pam kaphāna," da hānglaga, kha kachāma mili, "Chupamli nganinglu," lah, "Chonnarli, iphei kaili pamlu," da hāngakha, 4nathum kapupta mijang sāda, makaphā ningphanin eina bichar kasābing masāhairalā? 5Nganālu, leikashe ivānaongarā: ithumwui Avāna okathuiwui kachāma mibingli, shitkasangli kashānga kala ali leikashibingli ngashitmi kahai wungramwui shimluikat ngasā khavai, mapangkahaimalā? 6Kha nathumna kachāma mili maishi sāhaira. Kashānga mibingna nathumli rekharek ngasakta kārotli khuithui maningmala? 7Nathumli hoki kahai khayākakā ming chili athumna kachipat tui matuida maningmala?
8Kathara lairikna, "Nawui khongnainaoli nakhalatta thada leishilu," da hānga kaji athishurda, nathumna wungnaowui ain chi kachangkhat eina mayonakha, nathumna kaphā sai.
9Kha nathumna mijang sāakha, nathum morei sāda lei, kala ainna nathumli ain sākhaibingna da hānga. 10Ain saikora mayonlala khangatei akhali phei ngaphokakha, ain katonga sākhaiwui vang yonkahaina. 11Kaja "Maphophāpaimana" da kahāng ithumwui Avāna, "Mi mashaothatpaimana" dala hānga. Chieina nathumna phophā chihochaohailala, mi shaothatakha, nathum ain sākhai kahai mina. 12Ningkhān ainna bichar sāmirabing thada hāngda ot sālu. 13Lukhamashan masā mili bichar chi lukhamashan maleimana; kha lukhamashan china bicharwuitungli langsoi.
Ot Sā Shitkasang
14Ivānaongarā, kachikathāna ot maleila shitkasang lei da hāngakha, khi katong lei? Chikathā shitkasang china ali huimirala? 15avānao akha lah avānaova̱ akha kachon kaphā mavaila, thangthangwui kashakazā khavāta leiakha, 16kala nathum akhana athumli, "Chingri kahaili vālu, luma kala sānkahaida leilu," da hānglala, athumwui phasāwui khalalei khikha mamiakha, chi khi katong lei? 17Chi tākam eina, shitkasang akhalatta, ot eina mangasovaakha, thikahaina. 18Kha mi akhana hāngra, "Nana shitkasang lei, kala ina otsak lei." Otsak maleila nawui shitkasang chi ili chitheimilu, kala ina iwui otsak eina iwui shitkasang chi nali chitheira. 19Ithumwui Avā akhamānga da nana shitsanga; nana kaphā sāhaira. Kameobing eina tangda chi shitsanga, kala ngacheera. 20He mangkhama̱ mi, otsak maleila shitkasang chi aremana da ina nali chitheimi ngasakngailā? 21Ithumwui avāva̱ Abrahamna awui naomayara Isaacli hanphuttungli chigat tharan otsakwui vang mashungkhami maningmala? 22Shitkasang chi awui otsak eina ngasoda ot sāhaira, kala awui otsak eina shitkasang chi sākuphaira kaji nana theihaira. 23Hithada kathara tui chi ungshunghaowa: "Abrahamna ithumwui Avāli shitsanga kala chiwui vang ali khamashungana da shānkhui," kala a ithumwui Avāwui ngasotnaona da hokakhui kahaina. a a v23 Abrahamna ithumwui Avāli shitsang mi akhamāng maningmana—kha a awui ngasotnaona da hokakhui kahaina. Hi ithumwui Avāna ithumli khisāda kharā kajiwui ningkatong china: ali khangachee raobingwui vang maningla, kha ali theibing ngasotnaobingwui vangna. 24Mi akhali shitkasang akhamāng eina maningla, otsakwui vang mashungkhami kaji nana theihaira. 25Chithada sāda, khayorva̱ Rahabnala paomebing chi zunkhuilaga kala athumli shongfa khangateishong eina chihovāda, otsakwui vang mashungkhami maningmala? 26Manglā maleila phasā chi thikahai thada, chi tākam eina otsak maleila shitkasang chila thikahaina.
