Jaalalli Fuula Hin Ilaalu

Nama sooressa bakka gaarii, hiyyeessa immoo lafa irra teessisuun waldaa abbaa murtii yaada hamaa qabu taasisa, Abbaan keenya garuu hiyyeeyyii amantiin sooroman filateera. Amantiin obboleessa beelaa dubbiin qofa nyaachisu du'aadha.

Abbaan keenya lakkoofsa keessatti dubbata 8

Boqonnaa 2.

Obboloota koo, isin Gooftaa keenya Yesus Kristos isa ulfina qabeessatti kan amantan waan taatanif, fuula namaa hin ilaaliinaa. Nama quba irraa warqee fi uffata bareedaa uffate tokko walga'ii keessan yoo seene, hiyyeessi uffata dhiphaa uffate tokkos yoo seene, isin nama uffata bareedaa uffate sana ilaaltanii, «As teessi, teessuma gaarii dha» jettanii, hiyyeessicha immoo «Achi dhaabadhu» yookaan «Miilla koo bira lafa teessi» jettanii yoo jettan, ofii keessan gidduutti fuula namaa hin ilaalleree? Yaada hamaadhaan kan murteessan hin taanee? Obboloota koo jaallatamoo, dhaggeeffadhaa: Abbaan keenya hiyyeeyyii addunyaa kanaa amantiidhaan akka sooromaniif, mootummaa warra isa jaallatanitti abdachiifame akka dhaalaniifis hin filanne? Isin garuu hiyyeessa tuffattan. Sooressonni isin hin cunqursanii, mana murtiittis isin hin harkisanii? Isaan maqaa ulfina qabeessa isin irratti waamame sana hin arrabsanii?

Yoo akka Caaffata Qulqulluutti, «Ollaa kee akka ofii keetti jaalladhu» jedhu, seera mootummaa kana dhugumaan eegdan, gaarii in gootu.

Yoo fuula namaa ilaaltan garuu, cubbuu in hojjettu; seerris akka cabsitoota seeraatti isin murteessa. Namni seera guutuu eegee garuu tokko irratti kufe, hundumaa cabsuuf yakkamaa dha. Abbaan keenya isa ejja raaduu dhorke, ajjeechaas in dhorke. Kanaaf yoo ejja hin raadin garuu nama ajjeessitan, cabsitoota seeraa dha. Akka warra seera bilisummaatiin murtaa'anitti dubbadhaa, hojjetaas. Murtiin nama araara hin goonef araara hin qabu; araarri murtii irratti in injifata.

Amantii Hojii Qabu

Obboloota koo, namni tokko hojii malee amantii qaba yoo jedhe, faayidaan isaa maali? Amantiin sun isa fayyisuu danda'aa? Obboleessi yookaan obboleettiin tokko uffata yoo dhabde, nyaata guyyaa guyyaas yoo dhabde, isin keessaa namni tokko immoo «Nagaadhaan deemaa, ho'ifamaa, quufaas» jedhee, fedhii qaamaa isaaniif garuu waan tokkollee yoo hin kennine, faayidaan kun maali? Akkasuma amantiin ofumaan isaa yoo hojii hin qabaatin, du'aa dha. Namni tokko garuu «Ati amantii qabda, ani immoo hojii qaba» in jedha. Amantii kee hojii malee natti agarsiisi, anis amantii koo hojii kootiin sitti nan agarsiisa. Abbaan keenya tokko akka ta'e in amanta; gaarii in goota. Jinniwwanis kana in amanu, in hudhus. Yaa nama gowwaa, amantiin hojii malee faayidaa hin qabne ta'uu isaa sitti akka agarsiisu in barbaadda? Abrahaam abbaan keenya yeroo ilma isaa Yisihaaqin iddoo aarsaa irratti dhiheesse, hojiidhaan qajeelaa jedhamee hin turree? Amantiin hojii isaa wajjin akka hojjete, amantiinis hojii isaatiin akka guutame in argita. Kunis Caaffata Qulqulluu «Abrahaam Abbaa keenyatti amane, kunis qajeelummaa ta'ee isaaf lakkaa'ame» jedhu in raawwate; innis hiriyaa Abbaa keenyaa jedhamee waamame. ^a Namni hojiidhaan qajeelaa akka jedhamu, amantiidhaan qofa akka hin taane in argitu. Akkasuma Raahaab sagaagaltuun sunis ergamoota simattee, karaa biraatiin ergitee, hojiidhaan qajeelaa jedhamte hin turree? Akkuma qaamni hafuura malee du'aa ta'e, akkasuma amantiinis hojii malee du'aa dha.