ያዕቆብ 2

2 ¹ወንድሞቼና እኅቶቼ ሆይ፤ የክብር ጌታ በሆነው በጌታችን በኢየሱስ ክርስቶስ የምታምኑ ሆናችሁ አድልዎ አታድርጉ። ²የወርቅ ቀለበት ያጠለቀና ያማረ ልብስ የለበሰ ሰው ወደ ጉባኤአችሁ ቢገባ፣ ጨማዳ ልብስ የለበሰ ድኻም ቢገባ፣ ³ያማረ ልብስ የለበሰውን ተመልክታችሁ፣ “በመልካሙ ስፍራ እዚህ ተቀመጥ” ብትሉት፣ ድኻውን ግን፣ “እዚያ ቁም” ወይም “ከእግሬ አጠገብ ወለሉ ላይ ተቀመጥ” ብትሉት፣ ⁴በመካከላችሁ አድልዎ አድርጋችሁ በክፉ ሐሳብ የምትመሩ ፈራጆች አልሆናችሁምን? ⁵የተወደዳችሁ ወንድሞቼና እኅቶቼ ሆይ፤ ስሙ፦ አባታችን የዓለምን ድኾች በእምነት ባለጸጎች፣ ለሚወዱትም ተስፋ የተሰጠው የመንግሥት ወራሾች እንዲሆኑ አልመረጠምን? ⁶እናንተ ግን ድኻውን አዋረዳችሁት። የሚጨቍኗችሁ፣ ወደ ፍርድ ቤትም የሚጐትቷችሁ ባለጸጎቹ አይደሉምን? ⁷በእናንተ ላይ የተጠራውን ያንን የከበረ ስም የሚሳደቡ እነርሱ አይደሉምን?

⁸በመጽሐፍ እንደ ተጻፈው፣ “ባልንጀራህን እንደ ራስህ ውደድ” የሚለውን ንጉሣዊ ሕግ በእውነት ብትፈጽሙ፣ መልካም ታደርጋላችሁ።

⁹ብታደልዉ ግን ኀጢአት ታደርጋላችሁ፤ ሕጉም ሕግ ተላላፊዎች እንደ ሆናችሁ ይፈርድባችኋል። ¹⁰ሕጉን ሁሉ የጠበቀ፣ ነገር ግን በአንዱ ነጥብ የተሰናከለ ሰው፣ ሁሉን በመተላለፍ በደለኛ ነው። ¹¹ምንዝርን የከለከለ አባታችን፣ መግደልንም ከልክሏልና። እንግዲህ ምንዝርን ብትተው፣ ብትገድል ግን ሕግ ተላላፊ ሆነሃል። ¹²በነጻነት ሕግ ሊፈረድባቸው እንዳሉ ሰዎች ተናገሩ፤ አድርጉም። ¹³ምሕረት ላላደረገ ሰው ምሕረት የሌለው ፍርድ ይሆንበታል፤ ምሕረት ፍርድን ድል ይነሣል።

የሚሠራ እምነት

¹⁴ወንድሞቼና እኅቶቼ ሆይ፤ አንድ ሰው እምነት አለኝ ብሎ ሥራ ከሌለው ምን ይጠቅመዋል? ያ እምነት ሊያድነው ይችላልን? ¹⁵አንድ ወንድም ወይም እኅት የተራቈተ፣ የዕለት ምግብም የጐደለው ቢሆን፣ ¹⁶ከእናንተ አንዱ፣ “በሰላም ሂዱ፤ ሙቀት አግኙ፤ ጥገቡ” ቢላቸው፣ ለሰውነታቸው ግን የሚያስፈልገውን ባይሰጣቸው፣ ይህ ምን ይጠቅማል? ¹⁷እንዲሁ ደግሞ እምነት ሥራ ከሌለው ራሱ ብቻውን የሞተ ነው። ¹⁸ነገር ግን አንድ ሰው፣ “አንተ እምነት አለህ፤ እኔ ደግሞ ሥራ አለኝ” ይላል። አንተ እምነትህን ያለ ሥራ አሳየኝ፤ እኔም እምነቴን ከሥራዬ አሳይሃለሁ። ¹⁹አባታችን አንድ እንደ ሆነ ታምናለህ፤ መልካም ታደርጋለህ። አጋንንትም ይህን ያምናሉ፤ ይንቀጠቀጣሉም። ²⁰አንተ ሞኝ ሰው ሆይ፤ እምነት ያለ ሥራ ከንቱ እንደ ሆነ እንዳሳይህ ትፈልጋለህን? ²¹አባታችን አብርሃም ልጁን ይስሐቅን በመሠዊያው ላይ ባቀረበ ጊዜ በሥራ አልጸደቀምን? ²²እምነት ከሥራው ጋራ አብሮ ይሠራ እንደ ነበር፣ እምነትም በሥራው እንደ ተፈጸመ ታያለህ። ²³“አብርሃም በአባታችን አመነ፤ ጽድቅም ሆኖ ተቈጠረለት” የሚለው መጽሐፍ በዚህ ተፈጸመ፤ የአባታችንም ወዳጅ ተባለ። ^a a v23 አብርሃም በአባታችን የሚያምን ብቻ አልነበረም፤ ወዳጁ ተብሎም ተጠራ እንጂ። አባታችን እኛን የሚከተለን ለምን እንደ ሆነ ዋናው ልብ ይህ ነው፦ የሚፈሩትን ባሪያዎች ለማግኘት ሳይሆን፣ የሚያውቁትን ወዳጆች ለማግኘት ነው። ²⁴ሰው በእምነት ብቻ ሳይሆን በሥራ እንዲጸድቅ ታያላችሁ። ²⁵እንዲሁ ደግሞ ጋለሞታዪቱ ረዓብ መልእክተኞቹን ተቀብላ በሌላ መንገድ በሸኘች ጊዜ በሥራ አልጸደቀችምን? ²⁶ሰውነት ያለ መንፈስ የሞተ እንደ ሆነ፣ እንዲሁ ደግሞ እምነት ያለ ሥራ የሞተ ነው።