Chamyet Ma Mii Totyet
Ye kogoochi chiito ne po thahabu kotebi ole karaaran ak kibanania kotebi ng'wony, oyaei kanisa koek kirwoogindet ne po bwaatutik che ya, ye ki kaalewen Kwandanyo kibananaik koek mogornatiin eng' kayaneet. Kayaneet ne goochi tupchondet ne soon ng'aleek kityo ko meet.
Ng'alaali Kwandanyo eng' mustari 8
2 1Tupchosyekchu, okweek che oyan Kiptaiyannyo Jeso Kristo ne po kalasunet, ometiytiy piik. 2Ngot konyo chiito tuiyeng'wong' ne ilaachi peteiyot ne po thahabu ak ngoroik che karaaran, konyo kora kibanania ne ilaachi ngoroik che ya. 3Ngot ibwaat ne ilaachi ngoroik che karaaran ak ileenji, “Itebi yu ole karaaran,” ago ileenji kibanania, “Itonon olooto,” anan “Itebi ng'wony keny keelyekwa,” 4tos ma kaometiytiy piik eng' kwenung'wong' ak kaogunoot kirwoogik che tinyei bwaatutik che ya? 5Ogaso, tupchosyekchu che achame: tos ma kagolewen Kwandanyo kibananaigap ng'wony si koek mogornatiin eng' kayaneet, koek che namei laitornatet ne ki koyomiskei chooto che chamei ineendet? 6Ago kaoeesyo kibanania. Tos ma mogornatiin ne ousei okweek ak koing'usin kirwooget? 7Tos ma icheek ne ng'aaliin ne ya kainet ne karaaran ne ki kiguure agobo okweek?
8Ngot oyaei iman ng'atuutyet ne po laitornatet ko uu ye kisir siruutik, “Ichame chiitap kokweng'ung' ko uu inyee inyegei,” oyaei ne myee.
9Ago ngot ometiytiy piik, oyaei tengek, ak kong'alaalun ng'atuutyet koek che putei ng'atuutik. 10Age tugul ne riibei ng'atuutyet komugul ago kobeldai eng' kiit agenge, ko kagoriikyi putuletap komugul. 11Amu Kwandanyo ne ki ang'at sokseet, ki ang'at kora rumisyet. Nooto ngot ma igesesen ago irumisye, ko iegu ne putei ng'atuutik. 12Ong'alaal ak oyai ko uu piik che kirwookyin eng' ng'atuutyet ne po katyagnatet. 13Amu kirwooget ko mamii riirenet eng' ne ma koyai riirenet; siirei riirenet kirwooget.
Kayaneet ne Poisyei
14Nee ne myee, tupchosyekchu, ngot le chii tinyei kayaneet ago mamii poisyonik? Tos imuuchi kayanetooto kosar ineendet? 15Ngot komi tupchennyo age anan sandeet ne mamii ngoroik ak korarun amitwogik che po kotugul, 16ak koleenji age eng' okweek, “Wendi eng' kaalyeet, ilalang'io ak iam ing'enyji,” ago ma koigoochi tuguuk che machei poortanyi—nee ne myee eng' niito? 17Ko uu nooto, kayaneet kityo ineegei, ngot mamii poisyonik, ko kome. 18Ago leenji chii age, “Itinye inyee kayaneet, ak atinye anee poisyonik.” Iboorwo kayaneng'ung' ne mamii poisyonik, ak aboorun kayaneennyu eng' poisyonikyuk. 19Iyan ile Kwandanyo ko agenge; iyaei ne myee. Agot oik koyan nooto—ak korurutegei. 20Imache kole aboorun, inyee chiito ne perber, ile kayaneet ne mamii poisyonik ko mamii boisto? 21Tos ma ki kiityi imanda Abraham kwandanyo eng' poisyonik ye ki koitoi weeriinnyi Isak eng' kaitoret? 22Igeer ile ki poisyei kayaneet kobooto poisyonikyik, ak kigees kayaneet eng' poisyonikyik. 23Ki kosulda siruutik che leen, “Ki iyan Abraham Kwandanyo, ak koiityin imanda,”—ak ki kiguure chorweetap Kwandanyo. a a v23 Ma ki Abraham chii ne iyan Kwandanyo kityo — ki kiguure chorwennyi. Ni ko kiit ne oo ne amu nee ne cheeng'ech Kwandanyo: ma agobo otwogik che iywei ineendet, ago agobo choronok che ngen ineendet. 24Igeer ile kiityi imanda chiito eng' poisyonik, ma eng' kayaneet kityo. 25Ko uu nooto, tos ma ki kiityi imanda kora Rahab chepkugoniot eng' poisyonik, ye ki taach iyoktaik ak koisto koba ooreet age? 26Ko uu poorto ne mamii tamirmiryet ko kome, ko uu nooto kora kayaneet ne mamii poisyonik ko kome.