James 1

1 ¹Jamesna, ithumwui Avā kala Proho Jishu Khristawui rao akha sāda, yurbing ngachaili raithā kahai shang tharāda khanili shālam mili. ^a a v1 Shang katonga hi chiya, Jihudi maningki okathuili keinung-keinungli raithā kahai Jihudi shitkasangabingli hāngkhavaina.

²Ivānaobing, nathumna kachotkachāng yur kachungkha samphang tharan, chi khamathān kashungmeina da shānkhuilu, ³khikhalajila nathumwui shitkasang chāng khayang eina khāngkathei shoka kaji nathumna thei. ⁴Khāngkathei chi awui ot kupkhuiranu, chithākha nathum khikha mavātla kāshungchao kala kākashunga ngasāra.

⁵Nathumwui ngachaili khipānakha thangkhamei khavāt leiakha, mi saikorali khamashāt maleila mingairareo eina khame ithumwui Avāli polu; chieina ana nathumli mira. ⁶Ning khamaong maleila shitkasang eina polu; kaja ning khamaong sā mi china masina thānkasang kala khanguikasang shamadruwui awor kathāna. ⁷Chikathā mi china ithumwui Avāwui eina khikha samphangra da phaning masāranu. ⁸Chikathā mi china ning khani kasā mina, kala awui shongfa saikorali ngarungkhung makajina.

⁹Kakhanang leiki shitkasanga mi china awui maikhayāli lāngsoranu, ¹⁰kha kashānga mi china awui maishi lāngsoranu, kaja athum luili khawon awon thāda kānhaira. ¹¹Zimikna leirang kasā eina shoka kala khawo chi thengngasaka. Awui awon tātunga; awui khamathā shimānhaowa. Chithāda kashānga mi china awui ot kasā saikorali ngahuihaora.

¹²Kachotkachāng khāngkashap a chi sokhamina, kaja ana chāng khayang kahai tharan, ithumwui Avāna ali leikashibingli ngashitmi kahai kharingwui kuihon chi samphangra.

¹³Sui tharan, mikumo "Ithumwui Avāna ili suida lei" da mahāngranu. Makaphā otna ithumwui Avāli masuirarmara, kala ana mi akhala masuimana. ^b b v13 Jamesna, ithumwui Avā suikame jina da kahāng — yāmguiwui atam kathāda kasāngkha kakapik akha — chiwui eina awui kharin chi huimi. Ithumwui Avāna lemmet kaphā saikora mihaira; ana awui naongarābingwui vang meitha khikha masaamana. ¹⁴Kha mi kachiva̱ china awui khalatta makaphā ningkachāngna shimenshoklaga kala haihaida suida lei. ¹⁵Chitharan ningkachāng chi nao vaida morei pharāmi; morei chi rarlak tharan, kathi pharāmi. ¹⁶Machipatalu, iwui leikashe ivānaobing. ¹⁷Lemmet kaphā kala kākashung saikora hi kajuiwui eina, kahorbingwui Avāwui eina katāhaida kharāna; ana katang mangacheilākmana, lah ngachei khaya̱la masāmana. ^c c v17 Jamesna ithumwui Avāli awui khalattawui ming khangatei akha mi — kahorbingwui Avā, lemmet kaphā saikorawui kharāpam, ana sākhami zimik kala sirā thāda mangacheimana kaji. ¹⁸Awui ningkachāng eina, ana khamashung tui eina ithumli pharā ngasaka, chieina ithum awui sākahai otwui matheikhare kathā ngasāra. ^d d v18 Matheikhare hi theishiraiwui khare kala khamathā kaphā chi Vareli kachigat sāhaina; hikathāli shitkasangbing hi awui sākahai ot saikorawui khare kala kaphā khamathā chini.

Shākhuilu, Chitharan Chiwui Athishur Ringlu

¹⁹Hi theilu, iwui leikashe ivānaongarā: mi kachiva̱na shākhui khavai thakta sāda, matui khavai thāk masāla, malungvāt khavai thāk masāranu, ²⁰kaja miwui malungkhavātna ithumwui Avāwui khamashung khangarong chi masākhui khangasakna. ²¹Chiwui vang eina khamakhao saikora kala ngarar makhayā chi khuishokserhaolu; nathumwui wuklungli lingsang kahai, nathumwui manglā huikhui khangasaka Tui chi ningmazingda khuisanglu.

²²Tui chi kashā māng eina nathum khalatta machipatalu; kha chi kahāng chi sālu. ²³Kachikathāna Tui chi shālaga chi athishur makasā mi chiya ka̱lāra̱ngayotli awui pharā mai chi yanga mi kathāna, ²⁴kala a khalatta yangluilaga, vāthuihaida awui azak khi kathāna kaji chi ngalāngda malaihaowa. ²⁵Kha kachikathāna kākashung ningkhānwui ain chili khayangtāda, chili mangachei eina leipam mi, malaikhui shākasā maningla ot kasā mi chi, awui otsakli sokhami ngasāra.

²⁶Kachikathā mi akhana a khalatta shitkasang khangazip mina da phaninglaga awui male chi makhangarinakha, awui wuklung chipatta, kala awui dharma chi aremana. ²⁷Ithumwui Avāwui mangāli tharzā kala achuk kapei dharma chiya, athumwui ningkachot tharan avāva̱ makhalei naobing kala ra̱meinaobingli khanganao, kala okathuiwui eina khalatta makhamāng khavai nganātitkhui hina.