Hebrewnao 13

13 ¹Akha eina akha vānao kathā leikashi chi leichingranu. ²Kha̱mibingli kha̱mishimāli ngahānwo chi mamalaialu; chi eina kaikhana matheilaga kazingraobing chi ngasāmkhui ngasaka. ³Phātopli khalei mibingli athumli ngasoda khalap kahai thada, kala sāshilak eina samphangbingli phaningunglu; kaja nathumla phasāli khalei kajina. ⁴Ngalā chi mi saikorana khayā kā ngasaklu, kala ngalā pet chi tharda mayonlu. Khamathang-khamarang kala phokaphā kasābingli ithumwui Avāna bichar sāra.

⁵Nathumwui mirin chi lupā leishiwui eina chihochaohaolu; nathumwui khalalei chi shapa da phaninglu, kaja ithumwui Avā khalattana hānghaira, "Ina nathumli khikha matam mahorhaimara, khikha matam horchao masāmara."

⁶Chieina ithumna kaping eina hāngsa, Ithumwui Avā iwui ngachonkhamena; I mangacheemara. Mina ili khi sāngasakkhala? ^a a v6 Kagapiana Psalm 118:6 chi khuirā—hi ithumwui Avā chi athumwui ngachonkhame sāda samphang kahai kadhara naomayara kachiva̱na hāng shitsangwui khonna.

⁷Nathumli ithumwui Avāwui tui hāng kahai nathumwui akhokabing chi phaningunglu. Athumwui mirinwui atheiva chi machukkhuilu, kala athumwui shitkasang chi tamkhuilu. ⁸Jishu Khristana ayā, aja kala mashimānda chichinga. ⁹Ngatateida makathei sha̱tuibingna nathumli makheithui ngasaklu. Wuklung chi lukhamashan eina pang ngasak hi kaphāna, kashakazā eina maningmana; chi eina ringabingna khikha matongzāmana. ¹⁰Ithumwui hanphut akha lei, chi eina kachonshimli otram ngatha̱bingna shaipaiwui mashun maleimana. ¹¹Kaja pāngmon khareina morei vang eina kathara shimli ashee khuirā kahai sāyurbingwui phasā chiya rāmrahwui ayarli riktāra. ¹²Chieina Jishula awui khalattawui ashee eina mibing chi kathara sā khavai khamongwui ayarli kakhanang samphanga. ¹³Chiwui vang eina ana khāngmi kahai maikashi chi phungda ithumna rāmrahwui ayarli awui shongli thuiusa. ¹⁴Kaja hili ithumwui tangda leikahai keinung maleimana, kha ithumna rāki kaji keinung chi phāda lei.

¹⁵Chieina awui mangā eina ithumna atam kachida ithumwui Avāli masotwui pha̱kaphayā, awui ming hāngkaphat morchaiwui athei chi, chigatsa. ¹⁶Kaphā ot sā kala nathumwui khalalei ngayar chi mamalaialu; kaja hikathā pha̱kaphayāna ithumwui Avāli ningyāng ung ngasaka.

¹⁷Nathumwui akhokabingli nganālu, kala athumli hamsanglu; athumna nathumwui manglā yangkhame sāda leili, kaja athumna nathumwui vang hāngka sāki kajina. Athumna hi ringkhangā eina maningla khamathān eina sāranu; kaja chi nathumli khikha kānkhanā maleimana.

¹⁸Ithumwui vangla seihā sāmilu, kaja ot saikorali khayākashi eina sākhangaida, ithumwui mashun-makhui chi tharzā da ithumna shitsangchao. ¹⁹Hi sākhavai ina nathumli mataimeida kapona; chieina nathumwuili I thaklāk eina homungmi samphangra.

²⁰Katang makhavai tuingashitwui ashee eina yao ashangva̱wui yaokahoma kahak ithumwui Proho Jishuli kathiwui eina ringshok ngasaka, chingri kahaiwui ithumwui Avā china, ^b b v20 Ithumwui Avāna Jishuli kathiwui eina ringshok ngasaka kala ali awui yao ashangva̱wui yaokahoma kahak sāngasaka—"I kaphā yaokahomana" (John 10:11) da hāngkahai yaokahoma chi khamānga. Avā kala Anaomayara inina yao ashangva̱li khokkhada ngakhoktok kala phāuisera. ²¹kaphā ot saikorali awui ningkachāng sākhavai Jishu Khristawui mangā eina ali ningyāng ungngasaka chi ithumwui lungli sāda nathumli kāshung ngasakranu; awuili katang mavaila tekmateichingranu. Amen.

²²Ivānaongarā, kasatsangwui tui hili ja̱mi khavai ina nathumli kapona; kaja ina nathumli kasha̱-a eina kagapina. ²³Ithumwui ichinā Timothyli chihomihaira kaji theilu; ana thākta raakha, ali ngasoda ina nathumli samphangra.

²⁴Nathumwui akhavābing saikora kala kathara mi saikorali shālam milu. Italy eina khaleibingna nathumli shālam chiphunli.

²⁵Lukhamashan nathum saikorali ngasomiranu. Amen.