Mga Panultihon 23

23 ¹Kon molingkod ka aron mokaon uban sa usa ka magmamando, palandonga pag-ayo kon unsa ang anaa sa imong atubangan, ²ug ibutang ang kutsilyo sa imong tutunlan kon ikaw usa ka tawo nga ginadumalahan sa kaibog sa pagkaon. ³Ayaw kaibgi ang iyang lamiang mga pagkaon, kay kini malimbongon nga pagkaon.

⁴Ayaw hagoa ang imong kaugalingon aron maadunahan; pagbaton ug kaalam sa pagpugong sa imong kaugalingon. ⁵Sa higayon nga tan-awon mo ang bahandi, mahanaw kini, kay sa kalit motubo kinig mga pako ug molupad paingon sa kalangitan sama sa agila.

⁶Ayaw kan-a ang tinapay sa tawong hakog, ug ayaw kaibgi ang iyang lamiang mga pagkaon, ⁷kay siya mao ang matang sa tawo nga kanunayng nag-ihap sa gasto. “Pagkaon ug pag-inom!” miingon siya kanimo, apan ang iyang kasingkasing wala diha kanimo. ⁸Isuka mo ang gamay nga imong nakaon ug mausik ang imong matahom nga mga pulong.

⁹Ayaw pagsulti nga madungog sa buangbuang, kay tamayon niya ang kaalam sa imong mga pulong.

¹⁰Ayaw ibalhin ang karaang bato nga utlanan ni manghilabot sa mga uma sa mga ilo, ¹¹kay ang ilang Manunubos kusgan; ang atong Amahan maoy molaban sa ilang katungod batok kanimo. ^a a v11 Kon adunay modaogdaog sa ilo nga walay makapanalipod kaniya, ang atong Amahan mismo ang mahimong iyang manlalaban ug magkupot sa iyang kaso ingon nga iyang kaugalingon.

¹²Itugyan ang imong kasingkasing sa pagtudlo ug ang imong mga dalunggan sa mga pulong sa kahibalo.

¹³Ayaw ihikaw ang disiplina gikan sa bata; kon bunalan mo siya sa bunal, dili siya mamatay. ¹⁴Bunali siya sa bunal, ug maluwas mo ang iyang kalag gikan sa lubnganan.

¹⁵Anak ko, kon maalamon ang imong kasingkasing, malipay usab ang akong kaugalingong kasingkasing. ¹⁶Magmaya ang akong kinahiladmang kahimtang kon ang imong mga ngabil mosulti kon unsa ang matarong.

¹⁷Ayaw tugoti nga masina ang imong kasingkasing sa mga makasasala, apan padayon sa pagkahadlok sa atong Amahan sa tibuok adlaw. ¹⁸Sa pagkatinuod adunay umaabot, ug ang imong paglaom dili pagaputlon.

¹⁹Pamati, anak ko, ug pagmaalamon, ug tipigi ang imong kasingkasing diha sa matarong nga dalan. ²⁰Ayaw pag-uban sa mga nahubog sa bino o sa mga nagpatuyang pagkaon ug karne, ²¹kay ang palahubog ug ang ulitan mahiagom sa kakabos, ug ang pagkatulogon magbisti kanila ug gisi nga mga bisti.

²²Pamatia ang imong amahan, nga naghatag kanimo ug kinabuhi, ug ayaw tamaya ang imong inahan kon siya tigulang na. ²³Palita ang kamatuoran ug ayaw ibaligya kini; palita ang kaalam, ang pagtudlo, ug ang pagsabot. ²⁴Ang amahan sa matarong nga anak maglipay pag-ayo; si bisan kinsa nga manganak ug maalamong anak nga lalaki magmaya tungod kaniya. ²⁵Palipaya ang imong amahan ug inahan; pamayaa ang babaye nga nanganak kanimo.

²⁶Anak ko, ihatag kanako ang imong kasingkasing, ug pahimuota ang imong mga mata sa akong mga dalan. ²⁷Kay ang bigaon usa ka lawom nga gahong, ug ang mananapaw nga babaye usa ka hiktin nga atabay. ²⁸Nagbanhig siya sama sa tulisan ug nagdala sa daghang mga lalaki ngadto sa pagkamaluibon.

²⁹Kinsa ba ang anaay kaalaot? Kinsa ba ang anaay kasubo? Kinsa ba ang anaay panaglalis? Kinsa ba ang anaay mga reklamo? Kinsa ba ang anaay mga samad nga walay hinungdan? Kinsa ba ang anaay malubog nga mga mata? ³⁰Kadtong nagadugay sa pag-inom ug bino, kadtong nagaadto aron motilaw sa mga panaksan sa sinagol nga bino. ³¹Ayaw sud-onga ang bino samtang kini pula, samtang kini nagsidlak diha sa kopa ug hapsay nga mokanaog sa tutunlan. ³²Sa kataposan mopaak kini sama sa bitin ug motusok sama sa malala nga bitin. ³³Ang imong mga mata makakita ug katingalahang mga butang, ug ang imong kasingkasing mosulti ug tinuis nga mga butang. ³⁴Mahisama ka sa usa nga naghigda sa taliwala sa dagat, sama sa usa nga naghigda sa tumoy sa poste sa barko. ³⁵“Gibunalan nila ako, apan wala ako mobati ug kasakit; gikulata nila ako, apan wala ako makamatikod niini. Kanus-a ba ako makamata? Mangita ako ug lain pang ilimnon.”