Ilu 23 FHB Father's Heart Bible™

23 ¹Mgbe gị na onye na-achị achị nọdụrụ rie nri, tulee nke ọma ihe dị nʼihu gị, ²tụkwasịkwa mma nʼakpịrị gị ma ọ bụrụ na ị bụ onye oke ọchịchọ nri na-achị. ³Achọsila nri ụtọ ya ike, nʼihi na ha bụ nri aghụghọ.

⁴Agwụsila onwe gị ike ịba ọgaranya; nwee amamihe ijide onwe gị. ⁵Ngwa ngwa i lekwasị akụ anya, ọ dịla, nʼihi na ọ na-epupụta nku na mberede fepụ gawa nʼeluigwe dịka ugo.

⁶Erisila nri onye aka ntị, achọsikwala nri ụtọ ya ike, ⁷nʼihi na ọ bụ ụdị mmadụ na-agụgharị ọnụ ahịa mgbe niile. “Rie ma ṅụọkwa!” ka ọ na-asị gị, ma obi ya anọghị nʼebe ị nọ. ⁸Ị ga-agbọpụta obere nri ị riri, ị ga-emefukwa okwu ọma gị niile.

⁹Agwala onye nzuzu okwu, nʼihi na ọ ga-eleda amamihe nke okwu gị anya.

¹⁰Ebugharịla nkume oke ala ochie, abanyekwala nʼubi ụmụ na-enweghị nna, ¹¹nʼihi na Onye Mgbapụta ha dị ike; Nna anyị ga-ekwuchitere ha okwu megide gị. ^a a v11 Mgbe mmadụ mejọrọ nwa ogbenye na-enweghị onye ga-agbachitere ya, Nna anyị nʼonwe ya na-aghọ onye na-agbachitere ya, were okwu ya dịka nke ya.

¹²Tụkwasị obi gị na ndụmọdụ na ntị gị nʼokwu ihe ọmụma.

¹³Egbochila nwata ịdọ aka na ntị; ọ bụrụ na i jiri mkpara tie ya ihe, ọ gaghị anwụ. ¹⁴Jiri mkpara tie ya ihe, ị ga-azọpụtakwa mkpụrụobi ya site nʼili.

¹⁵Nwa m, ọ bụrụ na obi gị maara ihe, obi nke m ga-aṅụrịkwa ọṅụ. ¹⁶Ime ime obi m ga-aṅụrị ọṅụ mgbe egbugbere ọnụ gị na-ekwu ihe ziri ezi.

¹⁷Ekwela ka obi gị nwee ekworo nʼebe ndị mmehie nọ, kama nọgide nʼịtụ egwu Nna anyị ogologo ụbọchị niile. ¹⁸Nʼezie, ọdịnihu dị, olileanya gị agaghịkwa ala nʼiyi.

¹⁹Nụrụ, nwa m, maakwa ihe, duokwa obi gị nʼụzọ ziri ezi. ²⁰Anọkwala nʼetiti ndị mmanya na-egbu, maọbụ ndị na-eri anụ oke, ²¹nʼihi na onye aṅụrụma na onye oriri ga-adaba nʼụbịam, ụra ga-eyikwasị ha akwa nkịrịsi.

²²Ṅaa nna gị ntị, onye mụrụ gị, eledakwala nne gị anya mgbe o mere agadi. ²³Zụta eziokwu, erekwala ya; zụta amamihe, ndụmọdụ, na nghọta. ²⁴Nna nwa ezi omume ga-aṅụrị ọṅụ nke ukwuu; onye ọbụla mụrụ nwa maara ihe ga-enwe obi ụtọ nʼime ya. ²⁵Ka obi dị nna gị na nne gị ụtọ; ka nwanyị mụrụ gị ṅụrịa ọṅụ.

²⁶Nwa m, nye m obi gị, ka anya gị nwekwaa obi ụtọ nʼụzọ m niile. ²⁷Nʼihi na akwụna bụ olulu miri emi, nwanyị na-akwa iko bụkwa olulu mmiri dị warara. ²⁸Ọ na-ezo onwe ya chere dịka onye ohi, na-edubakwa ọtụtụ ndị ikom nʼụzọ ekwesịghị ntụkwasị obi.

²⁹Onye nwere nhụjuanya? Onye nwere iru ụjụ? Onye nwere esemokwu? Onye nwere mkpesa? Onye nwere mmerụ ahụ na-enweghị ihe kpatara ya? Onye nwere anya na-acha ọbara ọbara? ³⁰Ọ bụ ndị na-anọ ogologo oge na-aṅụ mmanya, ndị na-aga ịdetụ ọnụ nʼefere mmanya agwakọtara agwakọta. ³¹Elegidela mmanya anya mgbe ọ na-acha uhie uhie, mgbe ọ na-egbukepụ egbukepụ nʼiko ma na-agbadata nke ọma. ³²Nʼikpeazụ ọ na-ata dịka agwọ, na-agbakwa dịka ajụala. ³³Anya gị ga-ahụ ihe ndị dị iche iche, obi gị ga-ekwupụtakwa ihe gbagọrọ agbagọ. ³⁴Ị ga-adị ka onye dina nʼetiti oke osimiri, dịka onye dina nʼelu osisi ụgbọ mmiri. ³⁵“Ha tiri m ihe, ma ihe mgbu adịghị m; ha pịara m ihe, ma amaghị m ya. Olee mgbe m ga-eteta nʼụra? Aga m achọ mmanya ọzọ.”