Chānsam 23

23 ¹Nana khamungali ngasoda phazākhavai pamzang tharan, nawui mangāli khaleiya chi seihā ngasharlu, ²kala na zākhangaiwui athishurda kazata mina jiakha, nakharokli khainao ngavailu. ³Awui zākapha mangkaphā chi maningchāngalu, kaja chiya kakapik kashakazāna.

⁴Kashānga khavai nakhalatta mangalangzāralu; nakhalatta ngarin khavai thangmeilu. ⁵Nana lanli yangda tharan, hunkhawui alungli chi kānserhaira, kaja chi hankhaung eina angachāng ngachakkhailaga, khalāng thāda kazingram shong yongkāhaira.

⁶Wokhari miwui kashakazā chi mazaalu, kala awui zākapha mangkaphā chi maningchāngalu, ⁷kaja ana awui ningli aman kazipserser kaji mina. "Zālu kala manglu!" da ana nali hānga, kha awui ning nali ngaso maleimana. ⁸Nana zākahai kateo chi malora, kala nawui tui ningyāngkhaung chi arema sāhaora.

⁹Mangkhama̱wui khanāli mahāngalu, kaja ana nawui tuiwui thangkhamei chi ningkachaira.

¹⁰Achālakha thari maphuralu, kala marānaobingwui luili makānkāalu, ¹¹kaja athumwui Ngatangkhame kapingana; ithumwui Avāna athumwui mashun nawuitungli bichar sāra. ^a a v11 Mi akhana huimi khavai mi maleikha marānao akhali khayon kasā tharan, ithumwui Avā khalattana athumwui Ngatangkhame ngasāra, kala athumwui mashun akhalattawui thāda khuira.

¹²Naningli hāngkachithei sha̱khuilu, kala nakhanāli aworwui tui nganākhuilu.

¹³Naoshinaoli kharāk masānhaialu; lijei eina ali shaoakha, a mathimara. ¹⁴Lijei eina ali shaolu, kala nana awui manglā Kathewui ramwui eina kanshokra.

¹⁵Inaomayara, naning thangmeiakha, iwui ning khalattala ringphāra. ¹⁶Namorchaina khamashung khangarong matui tharan, iwui alungshong mathānra.

¹⁷Naning morei kaphungbingli mayuishi ngasakalu, kha langpongda ithumwui Avāli khangachee eina leichinglu. ¹⁸Mha, naoda phākhavai lei, kala nawui kachihān makaimara.

¹⁹Nganālu, Inaomayara, kala thangmeilu, kala naning shongfa khamashungli haichinglu. ²⁰Zam eina khamaripbingwui ngachaili, lah sā kachungkha kazābingwui ngachaili maleialu, ²¹kaja khamaripa kala morkahāk chi kachām samphangra, kala ngachāng eina athumli chonshi-chonkāk ngavaimira.

²²Nali kharing mikahai navāli khanganāmilu, kala nawui ava̱va̱ rarkai tharan maningkachaialu. ²³Khamashung tui lolu kala chi mayorpaialu; thangkhamei, hangkachithei, kala theishingkakhui lolu. ²⁴Khangaronga naowui avāna haklak eina mathānra; thangmei nao pharākahaina awuili khamathān samphangra. ²⁵Navā kala nawui ava̱va̱ ringphāranu; nali pharākakhuiva̱ mathānranu.

²⁶Inaomayara, naning ili milu, kala namikna iwui apongli ringphāranu. ²⁷Kaja khayorva̱ chiya chom kathukana, kala phokaphā sha̱nao chiya khamasha̱ ra̱khongna. ²⁸Phama̱kashao thāda ana rimpama, kala mi kachungkhali mashitkasang thānvai.

²⁹Khipāli kachotkachāng lei? Khipāli wukkakhanang lei? Khipāli nganang lei? Khipāli ya lei? Khipāli maram maleila khamā lei? Khipāli mik kahunga lei? ³⁰Zamli sāngnā lingsangbing, manāt kahai zamwui koklui shaikhavai vābing. ³¹Zam chi hungshi tharan mayangpaialu, tengkotli chi hānkhailakha tharan, kala nganaiyok eina longkatā tunga. ³²Anaolamshong chi phara̱ thāda mara̱ra, kala hu kaphunga phara̱wui male thāda mara̱thatra. ³³Namikna makathei ot theira, kala naningna matuiphāphā tui hāngra. ³⁴Na shamadru alungli pikapama mi thāda, marikhongwui pakra̱ atonli pikapama mi thāda ngasāra. ³⁵"Athumna ili ngaphitmihaira, kha ina kachot matheimana; athumna ili shaowa, kha ina matheimana. Katharan ina ngakarthuirakhala? Ina khangatei mangkhavai akhali phāra."