A Mwana wama, hana meni mbundu yaku

Mambu ma mesa, yi dyambu dyankulu ha tsi. Dibumba ngeyi-meni muna madya ma pfumu, amana kudiheka phasi mu kulanda kimvwama kina kisi mena mahela amana kisi dumuka ku mazilu hanga mbemba. Kisi sukila mu kifwani kya mutu wa kunwa malafu, bámbeta amana kakala phasi ku, kaasi wisi tokama kaka mu kusanda kunwa dyaka.

Kapitulu 23.

Muna tangwa wisi zakala mu kudya yi pfumu, tala bukheti-bukheti bina byenina ku thwala yaku, amana sya mbedi ku dinga dyaku, yuka ni ngeyi wena mutu wuna kudya kwisi muyadila. Kukala yi nzoluka za madya mandi ma kitoku, mukuma madya ma luvunu menina.

Kudiheka phasi hanga wavwama; kala yi nduka ndangu wadibonga ngeyi-meni. Muna tangwa wisi tala kimvwama, kyámani katuka, mukuma kisi mena mahela amana kisi dumuka ku mazilu hanga mbemba.

Kudya dipha dya mutu wa lwasa, amana kukala yi nzoluka za madya mandi ma kitoku, mukuma yandi kenina mutu wuna wisi tanga mbongu. «Dya amana nwa!» wisi kuzimbula kwena ngeyi, kaasi mbundu yandi yisiku yi ngeyi. Walúka fikhufi fina wúdya amana wázanga ndinga zaku za mboti.

Kuzonza mu matu ma zoba, mukuma kalewula nduka ya ndinga zaku.

Kuningisa tadi dya ndilu dya khulu amana kukota mu bilanga bya bana bakondi tata, mukuma Muhuludi wa bawu kenina wa ngolu; Tata wetu kanwánina mambu ma bawu kwena ngeyi. ^a

Sya mbundu yaku mu milongi amana matu maku mu ndinga za nzayilu.

Kuyimina mwana tsungika; yuka ni wumubeta fimbu, kafwaku. Mubeta fimbu, amana wahúlula moya wandi mu kalunga.

A Mwana wama, yuka ni mbundu yaku yenina yi nduka, mbundu yama yi meni phi yasángwala. Mana matadidini muna kati dya meni masángwala tangwa malebu maku masi zonza mana ma masonga.

Kuyambula mbundu yaku yakala yi kiphala kwena basumuki, kaasi sikila mu boma bwa Tata wetu kosu tangwa. Mukyedika, kwenina mambu makwísa, amana kivuvu kyaku kyahawulwaku.

Yuka, A Mwana wama, amana udimuka, amana simbidila mbundu yaku mu nzila ya masonga. Kukala hana kati dya bana bisi zela vinu kondilo bana bisi dya mbisi kwa lawu, mukuma kinwa-malafu yi madya-madya bakwísa mu kiphutu, amana kilu kikábavwatisa miledi mitatuka.

Yuka tata waku, wuna wakubuta, amana kulewula ngudi aku tangwa kanununini. Sumba kyedika amana kutekisa kyawu; sumba nduka, milongi yi mbakulu. Tata wa mwana wa masonga kasángwala kwa lawu; wuna wabuta mwana wa nduka kasephila mwena yandi. Tata waku yi ngudi aku basángwala; wuna wakubuta kasángwala.

A Mwana wama, hana meni mbundu yaku, amana mesu maku masephila mu nzila zama. Mukuma ndumba-leta kenina dibulu dyanda, amana mukhetu bita-mbongi kenina bulu dya mamba dyafitakana. Yandi wisi leya hanga ndwandwa amana wisi natisa batu balawu mu kukonda kwikama.

Nati wena yi kuzanga? Nati wena yi kiwayi? Nati wena yi tsita? Nati wisi nyengalakana? Nati wena yi phuta za phamba? Nati wena yi mesu ma kabengi? Bana bisi kadiki tangwa dya lawu mu kunwa vinu, bana bisi yenda mu kuyedika mbungu za vinu dya kubundikisa. Watalaku vinu bwosu dyenina dya kabengi, bwosu dyisi kenzuka mu mbungu amana dyisi tuluka mu talala. Ku tsuka dyisi luma hanga nyoka, amana dyisi tela ndikila hanga sawa. Mesu maku kamámona mambu ma kuyituka, amana mbundu yaku kayázonza mambu mavwalangana. Ngeyi wukakála hanga mutu wuna wisi leka mu kati dya yanga, hanga mutu wuna wisi leka hana tsongi ya nti wa masuwa. «Bámbanda, kaasi phasi ngyúkaku; bambeta, kaasi yízayaku dyawu. Khi tangwa yikatokama ku kilu? Yikasosa vinu dyahika.»