Mũrũ Wakwa, Nengera Ngoro Yaku
Mĩtugo ya mĩtĩ-inĩ ya irio, na rungu rwayo ũndũ mũritũ makĩria. Wĩmenyerere mbere ya irio njega cia mwathi, na ndũkanogio nĩ gũthingata ũtonga ũrĩa ũmeraga mathagu ũkombũka. Kĩrĩkĩrĩro nĩ mũhiano wa mũrĩu, ũhũũrĩtwo na ndarĩ kũigua, ũrĩa ũũkĩraga o nĩguo acarie kĩndũ kĩngĩ gĩa kũnyua.
23 1Rĩrĩa ũgaikara thĩ kũrĩĩanĩra na mũnene, wĩcũranie wega kĩrĩa kĩrĩ mbere yaku, 2na wĩigĩrĩre kahiũ mũmeroinĩ waku ũngĩkorwo ũrĩ mũndũ mwathagwo nĩ merirĩria. 3Ndũkerirĩrie irio ciake iria njega, tondũ nĩ irio cia kũheenia.
4Ndũkenogie na kũrenda gũtonga; gĩa na ũũgĩ wa kwĩgirĩrĩria. 5O rĩrĩa ũkwĩrorera ũtonga, nĩũthiĩte, tondũ o rĩmwe ũromaga mathagu ũkombũka ũrorete igũrũ ta nderi.
6Ndũkarĩe irio cia mũndũ mũkarũ, na ndũkerirĩrie irio ciake iria njega, 7tondũ nĩ mũndũ ũrĩa ũtũũraga aatara thogora. “Rĩa na ũnyue!” ũguo nĩguo akwĩraga, no ngoro yake ĩtirĩ hamwe nawe. 8Nĩũgatahĩka kĩrĩa kĩnini ũrĩĩte, na nĩũgaakorwo ũitĩte ciugo ciaku njega.
9Ndũkaarie mũndũ mũkĩĩgu akĩiguaga, tondũ nĩakanyarara ũũgĩ wa ciugo ciaku.
10Ndũkaneeherie ihiga rĩa mũhaka rĩa tene, kana ũtoonye mĩgũnda ya arĩa matarĩ na maithe, 11tondũ Mũkũũri wao arĩ hinya; Ithe witũ nĩakamaciirĩrĩra agũũkĩrĩre. a a v11 Rĩrĩa mũndũ eekĩra ũũru mwana wa ngoriai ũrĩa ũtarĩ na mũndũ wa kũmũciirĩrĩra, Ithe witũ we mwene nĩatuĩkaga mũmũciirĩrĩri, na akeyoera ciira wake ta wake mwene.
12Nengera ngoro yaku ũrutani, na matũ maku ciugo cia ũmenyo.
13Ndũkarege kũherithia mwana; ũngĩmũhũũra na rũthanju, ndagaakua. 14Mũhũũre na rũthanju, na nĩũkahonokia ngoro yake kuuma mbĩrĩra.
15Mũrũ wakwa, ngoro yaku ĩngĩkorwo ĩrĩ na ũũgĩ, o nayo ngoro yakwa nĩĩgakena. 16Ngoro yakwa ya thĩinĩ mũno nĩĩgakena rĩrĩa mĩromo yaku ĩkaaria maũndũ marĩa magĩrĩire.
17Ndũkareke ngoro yaku ĩiguĩre ehia ũiru, no tũũra wĩtigĩrĩte Ithe witũ mũthenya wothe. 18Ti-itherũ nĩ kũrĩ na matukũ marĩa magooka, na mwĩhoko waku ndũgaatinio.
19Thikĩrĩria, mũrũ wakwa, ũgĩe na ũũgĩ, na ũtongorie ngoro yaku njĩrainĩ ĩrĩa njagĩrĩru. 20Ndũgatuĩke ũmwe wa arĩa manyuuaga ndibei makarĩĩo, kana arĩa marĩĩaga nyama mũno, 21tondũ mũrĩĩu na mũrĩĩamũno nĩmagaathĩĩna, naguo toro nĩũkamahumba matangari.
22Thikĩrĩria thooguo, ũrĩa wagũciarire, na ndũkanyarare nyũkwa rĩrĩa akũrĩte. 23Gũra ũhoro wa ma na ndũkaũwendie; gũra ũũgĩ, na ũrutani, na ũtaũku. 24Ithe wa mwana mũthingu nĩagakena mũno; ũrĩa ũciaraga mũriũ mũũgĩ nĩakamũkenera. 25Thooguo na nyũkwa nĩmakene; ũrĩa wagũciarire nĩakene.
26Mũrũ wakwa, nengera ngoro yaku, na maitho maku nĩmakenagĩre mĩthiĩre yakwa. 27Nĩgũkorwo mũmaraya nĩ irima iriku, naguo mũtumia mũtharia nĩ gĩthima gĩceke. 28Oohagĩria ta mũtunyani, na agatũma andũ aingĩ matuĩke matarĩ ehokeku.
29Nũũ ũrĩ na thĩĩna? Nũũ ũrĩ na kĩeha? Nũũ ũrĩ na ngarari? Nũũ ũrĩ na mateta? Nũũ ũrĩ na nguraro itarĩ gĩtũmi? Nũũ ũrĩ na maitho matunĩhĩte? 30Nĩ arĩa maikaraga mahinda maraihu makĩnyua ndibei, arĩa mathiiaga gũcama mbakũri cia ndibei ĩrĩa ĩtukanĩtio. 31Ndũkarore ndibei rĩrĩa ĩrĩ ndune, rĩrĩa ĩkũhenia gĩkombeinĩ, ĩgĩikũrũka wega. 32Marigĩrĩrioinĩ ĩrũmaga ta nyoka, ĩgatheeca ta thumu. 33Maitho maku nĩmakoona maũndũ ma ngĩrĩgĩcano, nayo ngoro yaku ĩkaaria maũndũ mogomu. 34Ũgaatuĩka ta mũndũ ũkomete gatagatĩ ka iria, ta mũndũ ũkomeete igũrũ rĩa mũtĩ wa marikabu. 35“Nĩmaangũthire, no ndiaiguire ruo; nĩmaahũũrire, no ndiamenyire ũndũ ũcio. Nĩ rĩ ngookĩra? Nĩngũcaria kĩndũ kĩngĩ gĩa kũnyua.”