Mwananga, Ndipase Ntima Wako

Makhaliro a pa meza, na cinthu cakunesa kunyansi kwace. Dzisunge pa cakudya cadidi ca ntongi, ndipo leka kudzinetesa kufuna kufuma kunamera mapapiro mbuluka ninga mbalame. Kunamala na cithunzi ca munthu woledzera, wakumenywa mbwenye nee kubva, anapepuka basi kuti asake pyakumwa pinango.

Kapitulu 23.

Ungakhala pansi toera kudya na ntongi, nyerezera mwadidi pinthu piri patsogolo pako, ikha supswa pa mukhosi wako ungakhala munthu anatongwa na cifuno ca kudya. Leka kusirira pyakudya pyace pyakukoma, thangwi ndi cakudya cakunyengeza.

Leka kudzineta toera kupfuma; khala na udziwi toera kudzitonga wekha. Ungangoyang'ana mpfuma, iyo yamala, thangwi mwakucimbiza isamera maphapido mbambuluka mbaenda kudzulu ninga nkwazi.

Leka kudya nkate wa munthu waumbombo, leka kusirira pyakudya pyace pyakukoma, thangwi iye ndi munthu anaberekera mwache pyonsene. “Idya, mbumwa!” iye asalonga kuna iwe, mbwenye ntima wace nkhabe kukhala na iwe. Unadzaluka pang'ono pidadya iwe, mbutaya mafala ako akukoma.

Leka kulonga pakubva kwa munthu wakupususa, thangwi iye anadzanyoza udziwi wa mafala ako.

Leka kukhundusa mwala wakale wa malire, nee kupita m'minda ya ana amasiye, thangwi Muomboli wawo ndi wamphambvu; Baba wathu anadzalonga mulandu wawo kutsutsana na iwe. ^a

Pereka ntima wako ku pfundziso, na makutu ako ku mafala a udziwi.

Leka kukhondera mwana malango; ungamumenya na ndodo, iye nkhabe kufa. Mumenye na ndodo, unadzapulumusa moyo wace ku manda.

Mwananga, ntima wako ungakhala wa udziwi, ntima wanga unadzakomerwambo. Ntima wanga wa n'kati unadzatsandzaya milomo yako ingalonga pyakulungama.

Leka kutawirisa ntima wako kuidira anyakudawa, mbwenye pitiriza kugopa Baba wathu ntsiku yonsene. Mwandimomwene kuli n'tsogolo, na cidikhiro cako nkhabe kudzamalisidwa.

Bva, mwananga, ukhale wa udziwi, mbukoya ntima wako n'njira yakulungama. Leka kukhala pakati pa ale analedzera na vinyu peno ale anadzola nyama mwakupiringana, thangwi nyakuledzera na nyakudya kakamwe anadzafika ku umphawi, na kugona kunadzaabvazika nguwo zakung'ambika.

Bvera baba wako, ule adakupasa umaso, leka kunyoza mai wako angakalamba. Gula undimomwene, leka kuugulisa; gula udziwi, malango, na kubvesesa. Baba wa mwana wakulungama anadzatsandzaya kakamwe; ule anabala mwana wa udziwi anadzakomerwa na iye. Baba wako na mai wako mbatsandzaye; ule adakubala mbakomerwe.

Mwananga, ndipase ntima wako, maso ako mbakomerwe na njira zanga. Thangwi nkazi wa maulukwali ndi djenje yakuzika, na nkazi wa upombo ndi ncera wakupapatiza. Iye asadikhira mwakubisala ninga mambava, mbathusa amuna azinji ku kusowa kukhulupirika.

Mbani ali na nyatwa? Mbani ali na kutsukwala? Mbani ali na maphata? Mbani ali na madandaulo? Mbani ali na pironda papezi? Mbani ali na maso akufuira? Ndi ale anakhala n'dzidzi uzinji na vinyu, ale anaenda kuzonda mbale za vinyu yakusanganiza. Leka kuyang'ana vinyu ingafuira, ingayetimira m'nkombe mbienda pantsi mwadidi. Pakumalisa isaluma ninga nyoka, mbilasa ninga mphiri. Maso ako anadzaona pinthu pyacilendo, na ntima wako unadzalonga pinthu pyakupombveka. Unadzakhala ninga munthu anagona pakati pa bara, ninga munthu anagona pa nsonga ya muti wa ngalawa. “Andimenya, mbwenye nee ndabva kupha; andikwapula, mbwenye nee ndadziwa pyenepi. Ndinadzalamuka lini? Ndinadzasaka pontho pyakumwa.”