IZaga 23

23 ¹Lapho uhlala phansi ukuba udle nombusi, qaphela kahle lokho okuphambi kwakho, ²ubeke ummese emphinjeni wakho uma ungumuntu obuswa yisifiso sokudla. ³Ungafisi ukudla kwakhe okumnandi, ngokuba kungukudla okukhohlisayo.

⁴Ungazikhandli ngokufuna ukuceba; yiba nokuhlakanipha kokuzibamba. ⁵Uthi uqeda ukubheka ingcebo, isinyamalele, ngokuba imila amaphiko ngokuzumayo indizele ezulwini njengokhozi.

⁶Ungadli isinkwa somuntu oncishanayo, ungafisi ukudla kwakhe okumnandi, ⁷ngokuba ungumuntu ohlala ebala izindleko. “Yidla uphuze!” usho kuwe, kodwa inhliziyo yakhe ayinawe. ⁸Uyokuhlanza okuncane okudlile, uchithe amazwi akho amahle.

⁹Ungakhulumi lapho isiwula sikuzwa, ngokuba siyokudelela ukuhlakanipha kwamazwi akho.

¹⁰Ungagudluli itshe lomngcele lasendulo, ungangeneli amasimu ezintandane, ¹¹ngokuba uMhlengi wazo unamandla; uBaba wethu uyobamela ecaleni lazo, emelana nawe. ^a a v11 Lapho umuntu ona intandane engenamuntu wokuyivikela, uBaba wethu uqobo uba ngumvikeli wayo, athathe icala layo njengelakhe.

¹²Beka inhliziyo yakho ekufundisweni, nezindlebe zakho emazwini olwazi.

¹³Ungayigodleli ingane isiyalo; uma uyishaya ngenduku, ngeke ife. ¹⁴Yishaye ngenduku, uyokhulula umphefumulo wayo engcwabeni.

¹⁵Ndodana yami, uma inhliziyo yakho ihlakaniphile, nenhliziyo yami iyokujabula. ¹⁶Izibilini zami ziyothokoza lapho izindebe zakho zikhuluma okulungileyo.

¹⁷Inhliziyo yakho ingabi nomhawu ngezoni, kodwa qhubeka ekumesabeni uBaba wethu usuku lonke. ¹⁸Ngempela kukhona ikusasa, nethemba lakho ngeke linqunywe.

¹⁹Lalela, ndodana yami, uhlakaniphe, ugcine inhliziyo yakho endleleni eqondileyo. ²⁰Ungabi phakathi kwabadakwa yiwayini, noma kwalabo abazitika ngenyama, ²¹ngokuba isidakwa nesiminzi siyokuba mpofu, ubuthongo buyobembesa ngamanikiniki.

²²Lalela uyihlo owakunika ukuphila, ungamdeleli unyoko esemdala. ²³Thenga iqiniso, ungalithengisi; thenga ukuhlakanipha, ukufundiswa, nokuqonda. ²⁴Uyise wengane elungileyo uyothokoza kakhulu; ozala indodana ehlakaniphileyo uyojabula ngayo. ²⁵Mababe nenjabulo uyihlo nonyoko; makathokoze lowo owakuzalayo.

²⁶Ndodana yami, nginike inhliziyo yakho, amehlo akho athokoze ezindleleni zami. ²⁷Ngokuba isifebe singumgodi ojulileyo, nowesifazane ophingayo ungumthombo omncane. ²⁸Ucathama njengesigebengu, aholele amadoda amaningi ekungathembekini.

²⁹Ngubani onosizi? Ngubani onokudabuka? Ngubani onokuxabana? Ngubani onokukhononda? Ngubani onamanxeba ngaphandle kwesizathu? Ngubani onamehlo abomvu? ³⁰Yilabo abalibala kakhulu newayini, abaya ukuyonambitha izitsha zewayini elixutshiwe. ³¹Ungaligqolozeli iwayini lapho libomvu, lapho licwebezela enkomishini lehla kamnandi. ³²Ekugcineni liyaluma njengenyoka, lifake ubuthi njengebululu. ³³Amehlo akho ayobona izinto ezingaqhelekile, nenhliziyo yakho iyokhuluma izinto ezisontekile. ³⁴Uyoba njengolele enzulwini yolwandle, njengolele esiqongweni sensika yomkhumbi. ³⁵“Bangishayile, kodwa angizwanga buhlungu; bangibhaxabula, kodwa angazanga lokho. Ngizovuka nini? Ngizofuna okunye okokuphuza.”