Mwana na ngai, pesa ngai motema na yo

Mimeseno ya mesa elongo na eloko ya makasi na nse na yango. Ntalela yo moko na liboso ya bilei ya malamu ya mokonzi, mpe komitungisa te mpo na koluka bomengo oyo ekoli mapapu mpe ekopumbwa. Esuki na elilingi ya moto ya masanga, abetami mpe ayoki te, alamuki kaka mpo na koluka masanga mosusu.

Mokapo 23.

Tango ofandi mpo na kolia elongo na mokonzi, tala malamu oyo ezali liboso na yo, mpe tia mbeli na kingo na yo soki ozali moto oyo posa ya libumu ekambaka. Kolula bilei na ye ya elengi te, pamba te ezali bilei ya bokosi.

Komilemba mpo na kozwa bomengo te ; zala na bwanya ya komikanga. Tango okotala bomengo, esili kolimwa, pamba te ekozwa mapapu na mbalakata mpe ekopumbwa na likolo lokola mpongo.

Kolia mampa ya moto ya likunya te, mpe kolula bilei na ye ya elengi te, pamba te azali moto oyo azali kotanga ntalo ya biloko nyonso. Alobaka na yo : « Lia mpe mela ! » kasi motema na ye ezali elongo na yo te. Okosanza eloko moke oyo olei, mpe okobebisa maloba na yo ya malamu.

Koloba na matoyi ya moto ya bozoba te, pamba te akotiola bwanya ya maloba na yo.

Kolongola libanga ya ndelo ya kala te, mpe kokota na bilanga ya bana oyo bazangi tata te, pamba te Mosikoli na bango azali makasi ; Tata na biso akotelema mpo na bango mpe akobunda na yo. ^a

Pesa motema na yo na mateya mpe matoyi na yo na maloba ya boyebi.

Kozanga kopesa mwana etumbu te ; soki obeti ye na fimbu, akokufa te. Beta ye na fimbu, mpe okobikisa bomoi na ye na lilita.

Mwana na ngai, soki motema na yo ezali na mayele, motema na ngai moko mpe ekosepela. Kati na ngai nyonso ekosepela tango bibebu na yo ekoloba oyo ezali sembo.

Tika ete motema na yo eyokela basumuki zuwa te, kasi kokoba na bobangi Tata na biso mokolo mobimba. Solo, mikolo ya sima ezali, mpe elikya na yo ekokatama te.

Yoka, mwana na ngai, mpe zala na mayele, mpe kamba motema na yo na nzela ya sembo. Zala kati na bato oyo bamilangwisaka na vinyo te, to bato oyo bamitondisaka na mosuni te, pamba te moto ya masanga mpe moto ya bolei makasi bakokoma babola, mpe mpongi ekolatisa bango bilamba ya kopasuka.

Yoka tata na yo, oyo abotaki yo, mpe kotiola mama na yo te tango akoma mobange. Somba solo mpe koteka yango te ; somba mayele, mateya mpe bososoli. Tata ya mwana ya sembo akosepela mingi ; oyo abotaki mwana ya mayele akozwa esengo na ye. Tika ete tata na yo mpe mama na yo basepela ; tika ete oyo abotaki yo asepela.

Mwana na ngai, pesa ngai motema na yo, mpe tika ete miso na yo esepela na banzela na ngai. Pamba te ndumba ezali libulu ya mozindo, mpe mwasi ya ekobo azali libulu ya mai ya nzela moke. Alalaka na kozela lokola mwivi mpe akotisaka mibali mingi na kozanga bosembo.

Nani azali na mpasi? Nani azali na mawa? Nani azali na etumba? Nani azali na makambo ya kolela? Nani azali na bampota ya pamba? Nani azali na miso matane? Bato oyo bafandaka ntango molai na vinyo, bato oyo bakendaka komeka bakopo ya vinyo oyo ebakisami na biloko mosusu. Kotala vinyo te tango ezali motane, tango ezali kongenga na kopo mpe ezali kokita malamu. Na nsuka ekoliaka lokola nyoka mpe ekobetaka lokola nyoka ya sumu. Miso na yo ekomona makambo ya kokamwa, mpe motema na yo ekoloba makambo ya kobaluka. Okozala lokola moto oyo alali na katikati ya mbu, lokola moto oyo alali na likolo ya nzete monene ya masuwa. « Babetaki ngai, kasi nayokaki mpasi te ; babetaki ngai, kasi nayebaki yango te. Ntango nini nakolamuka ? Nakoluka lisusu masanga mosusu. »