Mwana ya munu, pesa munu ntima ya nge
Malongi ya kudya, kasi na nsi kele kima ya ngolo mingi. Keba nge mosi na madya ya kitoko ya mfumu, mpe kulembisa nitu ya nge ve na kulanda bimvwama yina ke mena mapapu mpe ke pumbuka. Yawu ke suka na kifwani ya muntu ya malafu, ba me bula yandi kasi yandi ke wa mpasi ve, yandi ke vumbuka kaka samu na kusosa malafu ya nkaka.
23 1Ntangu nge ke vwanda na kudya kintwadi na mfumu, tala mbote-mbote kima yina kele na ntwala ya nge, 2mpe tula mbele na laka ya nge kana nge kele muntu yina nsatu ya madya ke yalaka nge. 3Kuzinina ve madya ya yandi ya kitoko, samu ti yawu kele madya ya luvunu.
4Kulembisa nitu ya nge ve samu na kukuma mvwama; vwanda na ndwenga ya kukanga nge mosi. 5Ntangu nge ke tala kimvwama, yawu me zimbana, samu ti na mbala mosi yawu ke mena mapapu mpe ke tambula na mazulu mutindu mbemba.
6Kudya ve mampa ya muntu ya munimi, mpe kuzinina ve madya ya yandi ya kitoko, 7samu ti yandi kele muntu yina ke tangaka ntangu nyonso na ntima ya yandi. «Dya mpe nwa!» yandi ke tuba na nge, kasi ntima ya yandi kele ve na nge. 8Nge ke luka mwa-fyoti yina nge me dya mpe nge ke bebisa bampova ya nge ya kitoko.
9Kutuba ve na makutu ya kizoba, samu ti yandi ke yina ndwenga ya bampova ya nge.
10Kusoba ve ditadi ya ndilu ya ntangu ya ntama, mpe kukota ve na bilanga ya bansaana, 11samu ti muntu yina ke kuula bawu kele ngolo; Tata ya beto ke nwanina bawu na ntadisi ya nge. a a v11 Ntangu muntu ke sala mbi na mwana-nsaana yina kele ve na muntu ya kunwanina yandi, Tata ya beto yandi mosi ke kuma muntu ya kunwanina yandi mpe ke baka dyambu ya yandi bonso ya yandi mosi.
12Tula ntima ya nge na ndongosolo mpe makutu ya nge na bampova ya nzayilu.
13Kumanga ve ndongosolo na mwana; kana nge bula yandi na kikoti, yandi ke kufwa ve. 14Bula yandi na kikoti, mpe nge ke katula moyo ya yandi na nsi ya lufwa.
15Mwana ya munu, kana ntima ya nge kele na ndwenga, ntima ya munu mosi mpe ke vwanda na kilengi. 16Kati ya ntima ya munu ke yangalala ntangu bikoba ya nge ke tuba mambu ya kudedama.
17Kubika ve ntima ya nge kusuka samu na misumuki, kasi landa kuzitisa Tata ya beto kilumbu ya mvimba. 18Ya tsyelika, kivuvu ya mantwala kele, mpe kivuvu ya nge ke zengana ve.
19Wa, mwana ya munu, mpe vwanda na ndwenga, mpe twadisa ntima ya nge na nzila ya mbote. 20Kuvwanda ve na kati ya bantu yina ke kolaka vinu to bantu yina ke dyaka mbisi na kinsuza, 21samu ti muntu yina ke kolaka malafu mpe muntu ya kinsuza ke kuma mputu, mpe mpongi ke lwatisa bawu bilele ya kupasuka.
22Wila tata ya nge, yina butaka nge, mpe kuyina ve mama ya nge ntangu yandi me kuma mununu. 23Sumba kyeleka mpe kutekisa yawu ve; sumba ndwenga, ndongosolo, mpe mayela. 24Tata ya mwana ya kudedama ke yangalala mingi; muntu yina ke buta mwana ya ndwenga ke vwanda na kilengi samu na yandi. 25Bika ti tata na mama ya nge kuvwanda na kilengi; bika ti mama yina butaka nge kuyangalala.
26Mwana ya munu, pesa munu ntima ya nge, mpe bika ti meso ya nge kuvwanda na kilengi na banzila ya munu. 27Samu ti ndumba kele dibulu ya nda, mpe kento ya kinsuza kele dibulu ya maza ya fyoti. 28Yandi ke vingila na kubumbana mutindu kimpumbulu mpe ke nata babakala mingi na kukonda kukwikama.
29Nani kele na mpasi? Nani kele na mawa? Nani kele na kuswana? Nani kele na bidilu? Nani kele na bamputa ya mpamba? Nani kele na meso ya mbwaki? 30Bayina ke vwandaka ntangu nda na vinu, bayina ke kwendaka meka bambungu ya vinu ya kuvukisa. 31Kutala ve vinu ntangu yawu kele ya mbwaki, ntangu yawu ke pela na kopo mpe yawu ke kulumuka mbote-mbote. 32Na nsukunu, yawu ke tatika mutindu nyoka mpe ke tatika mutindu mpidi. 33Meso ya nge ke tala mambu ya nzenza, mpe ntima ya nge ke tuba mambu ya luvunu. 34Nge ke vwanda mutindu muntu yina ke lala na kati-kati ya mubu, mutindu muntu yina ke lala na zulu ya nti ya bwatu. 35«Bawu bulaka munu, kasi mu waka mpasi ve; bawu bulaka munu, kasi mu zabaka yawu ve. Ntangu nki mu ke telama? Mu ke sosa dyaka malafu ya nkaka.»