Chānsam 24

24 ¹Makhayā mibingli mayuishilu, kala athumli ngasoda leikhavai maningchāngalu, ²kaja athumwui ningna khayon ngarāna, kala athumwui morchaina kakhanang matui.

³Thangmei eina shim sakai, kala theishingkakhui eina chi sakāmi; ⁴kala awor eina awui kābing chi aman kasak kala leishiri kahai lan kashāng saikorana pemtinghai.

⁵Thangkhama mina yāngna pemtinghai, kala awor khalei mina awui pangshap mataisang ngasaka, ⁶kaja thangkhamei thānkhami eina nana nawui rai vai, kala machinkhame makhavāt tharan khayui samphanga.

⁷Thangmei chi mangkhama̱wui vang atung khavātana; keinung ngaveili ana hāngkhavai khikha maleimara. ⁸Makaphā sākhavai khangarān kasā a chi ngathumsak kasā mi da hora. ⁹Mangkhama̱wui ngathumsak chi moreina, kala mana̱shikazar chi mibingwui vang ningkakachai otna.

¹⁰Kakhanang atamli nana vān kahaiakha, nawui pangshap kateona. ¹¹Kathili thān kahaibingli kanmilu, kala taithatpamli phei ngaphokta kahaibingli ngakhamsingmilu. ¹²Nana, "Yanglu, ithumna hi matheimana," da hāngakha, ning chāng kayangana chi matheikhuirala? Nawui manglāli mayonkhame china matheimala? Kala ana mi kachiva̱li kachichāwui otsak athishurda sāman mamimara?

¹³Iwui naomayara, khuira̱ zālu, kaja chi kaphāna, kala khuira̱khongwui achi chi nawui mazapkhayangli shima. ¹⁴Thangmei chila nawui manglāli chithākha da theilu; nana chi samphangakha, shingā leichaowa, kala nawui kachihān makaimara.

¹⁵O makhayā mi, khangarongawui shim chili marimlu; awui ngasām khavaipam masākazamhaialu, ¹⁶kaja khangaronga mina shini shida kongluilala, ana latluida ngakarthuira, kha makhayābing chi kalākashili phei ngaphoka.

¹⁷Nawui yangkashe kongluida tharan maringphāalu, kala ana phei ngaphok tharan nawui ning mathān masakhaialu, ¹⁸maningakha ithumwui Avāna theida maringphā ngasakpai, kala awui malungkhavāt chi awui eina ngareizangpaishina.

¹⁹Makaphā kasābingwui vang makhanangalu, kala makhayābingli mayuishialu, ²⁰kaja makaphā miwui shingā maleimana; makhayāwui thaomei sāshimithaora.

²¹Inaomayara, ithumwui Avā kala awunga chili ngacheelu, kala athumli ngakaikashibingli mangasozatalu, ²²kaja athumwui kalākashi chi kashuirak eina rāra, kala ani khaninina tāra̱ khavai kashimān chi khipāna theikhala?

Michang Masāla Mashun

²³Hibingla thangkhamabingwui kahāngbing: Bicharli michang kasā maphāmana. ²⁴Khayon mili, "Na khayon makhaleina," da hāngkhame china, mibingna ali khonshira, kala yurbingna ali mashātra, ²⁵kha khayon mili kaharabingwui vang phālakra, kala sokhami hakhamahā athumwuitungli rāra. ²⁶Khamashung ngahānkā china morchai maya̱khui kathāna. ²⁷Kayāngli nawui ot kala nawui lui ngarānlu, kala chiwui thili nawui shim sākālu. ²⁸Nawui khongnainaoli maram maleila shākhi masālu; namorchai eina na minamhaira? ²⁹Mahānglu, "Ana ili sāhai athishurda ina ali sāra; mipali awui otsak thāda ina athut khuira." ³⁰Ina chāngshe miwui luili, ning mazang miwui drakhā yāmguili makāna, ³¹kala yanglu, hupta ka̱shātna haksangphinhaida; ngalei chi rāman khaluiphinhaida, kala chiwui lunggui akha chi sākhayanghaira. ³²Chieina ina yanglaga iwuklungli phaninga; ina theilaga hangkachithei samphanga. ³³Kasha̱kha pikakhui, kasha̱kha ngasāmkakhui, kasha̱kha pāng masa̱da ngasām khavai eina, ³⁴kala kachām kahona zaikazā mi kathāna nali rāra, kala khavāt chi rai khavā mi thāda rāra.