ምሳሌ 24

24 ¹ክፉ ሰዎችን አትቅና፤ ከእነርሱም ጋራ ለመሆን አትመኝ፤ ²ልባቸው ግፍን ያውጠነጥናልና፤ ከንፈሮቻቸውም ጥፋትን ይናገራሉ።

³ቤት በጥበብ ይሠራል፤ በማስተዋልም ይጸናል፤ ⁴ክፍሎቹም በዕውቀት ውድና ደስ በሚያሰኝ ሀብት ሁሉ ይሞላሉ።

⁵ጠቢብ ሰው ብርታት የተሞላ ነው፤ ዐዋቂ ሰውም ኀይሉን ያበዛል፤ ⁶ጦርነትህን በጥበብ መሪነት ትዋጋለህና፤ ድልም በብዙ አማካሪዎች ይገኛል።

⁷ጥበብ ለተላላ ሰው በጣም ከፍ ያለች ናት፤ በበሩም ዘንድ የሚናገረው የለውም። ⁸ክፉ ለማድረግ የሚያስብ ሁሉ ተንኰለኛ ይባላል። ⁹የተላላ ተንኰል ኀጢአት ነው፤ ፌዘኛውም ለሰዎች አስጸያፊ ነው።

¹⁰በመከራ ቀን ብትዝል፣ ኀይልህ ትንሽ ነው። ¹¹ወደ ሞት የሚወሰዱትን አድን፤ ወደ መታረድም የሚንገዳገዱትን ከልክል። ¹²“እነሆ፣ ይህን አላወቅንም” ብትል፣ ልብን የሚመዝነው አያስተውለውምን? ነፍስህንም የሚጠብቀው አያውቀውምን? ለእያንዳንዱም ደግሞ እንደ ሥራው አይከፍለውምን?

¹³ልጄ ሆይ፣ ማር ብላ፣ መልካም ነውና፤ ከወለላም የሚንጠባጠበው ለአንደበትህ ጣፋጭ ነው። ¹⁴ጥበብም ለነፍስህ እንደዚሁ እንደ ሆነች እወቅ፤ ብታገኛትም የወደፊት ተስፋ አለ፤ ተስፋህም አይቋረጥም።

¹⁵አንተ ክፉ ሰው ሆይ፣ በጻድቁ መኖሪያ ላይ አታድባ፤ ማረፊያ ስፍራውንም አታጥፋ፤ ¹⁶ጻድቅ ሰባት ጊዜ ቢወድቅም እንደ ገና ይነሣልና፤ ክፉዎች ግን በጥፋት ይሰናከላሉ።

¹⁷ጠላትህ በሚወድቅበት ጊዜ ደስ አይበልህ፤ በሚሰናከልበትም ጊዜ ልብህ ደስ አይበለው፤ ¹⁸አባታችን አይቶ እንዳይከፋውና ቍጣውንም ከእርሱ ላይ እንዳያዞር።

¹⁹ክፉ አድራጊዎችን በማሰብ አትጨነቅ፤ ክፉዎችንም አትቅና፤ ²⁰ክፉ ሰው የወደፊት ተስፋ የለውምና፤ የክፉዎች መብራት ይጠፋል።

²¹ልጄ ሆይ፣ አባታችንንና ንጉሡን ፍራ፤ በእነርሱም ላይ ከሚያምፁ ጋራ አትተባበር፤ ²²መቅሠፍታቸው በድንገት ይነሣልና፤ ሁለቱም ሊያመጡ የሚችሉትን ጥፋት ማን ያውቃል?

ያለ አድልዎ የሚሰጥ ፍርድ

²³እነዚህም ደግሞ የጠቢባን ቃሎች ናቸው፦ በፍርድ አድልዎ ማድረግ መልካም አይደለም። ²⁴በደለኛውን፣ “ንጹሕ ነህ” የሚለውን ሁሉ፣ አሕዛብ ይረግሙታል፤ ሕዝቦችም ይዘልፉታል፤ ²⁵በደለኛውን ለሚወቅሱ ግን መልካም ይሆንላቸዋል፤ የበዛ በረከትም ይመጣባቸዋል። ²⁶ቅን መልስ በከንፈር እንደ መሳም ነው። ²⁷በውጭ ያለውን ሥራህን አዘጋጅ፤ እርሻህንም አመቻች፤ ከዚያም በኋላ ቤትህን ሥራ። ²⁸በባልንጀራህ ላይ ያለ ምክንያት ምስክር አትሁን፤ በከንፈሮችህስ ታታልላለህን? ²⁹“እርሱ ባደረገብኝ ልክ እኔም እንዲሁ አደርግበታለሁ፤ ሰውየውንም እንዳደረገው እከፍለዋለሁ” አትበል። ³⁰በሰነፍ ሰው እርሻ አጠገብ፣ ዐእምሮ በጎደለው ሰው ወይን ተክል አጠገብ ዐለፍሁ፤ ³¹እነሆም፣ ሁሉ በእሾህ በቅሎ ነበር፤ ምድሩም በአረም ተሸፍኖ ነበር፤ የድንጋይ ቅጥሩም ፈርሶ ነበር። ³²ከዚያም ተመለከትሁና በልቤ ያዝሁት፤ አይቼም ትምህርት ተቀበልሁ። ³³ጥቂት እንቅልፍ፣ ጥቂት እረፍት፣ ለማረፍ እጅን ጥቂት ማጣመር፣ ³⁴ድኽነትም እንደ ወንበዴ ይመጣብሃል፤ ችጋርም እንደ ታጠቀ ሰው ይመጣብሃል።