नीतिसूत्रे 24

24 ¹ दुष्ट माणसांचा हेवा करू नकोस, आणि त्यांच्याबरोबर राहण्याची इच्छा धरू नकोस, ² कारण त्यांची मने हिंसाचाराचा कट रचतात, आणि त्यांचे ओठ उपद्रवाविषयी बोलतात.

³ ज्ञानाने घर बांधले जाते, आणि समजुतीने ते स्थिर होते; ⁴ आणि ज्ञानाने त्याच्या खोल्या भरल्या जातात सर्व मौल्यवान व मनोहर धनाने.

⁵ ज्ञानी माणूस सामर्थ्याने भरलेला असतो, आणि ज्ञानसंपन्न माणूस आपले बळ वाढवतो. ⁶ कारण सुज्ञ मार्गदर्शनाने तू आपले युद्ध चालवू शकतोस, आणि पुष्कळ सल्लागारांकडून विजय मिळतो.

⁷ मूर्खासाठी ज्ञान फार उंच आहे; वेशीजवळ त्याला बोलण्यासारखे काही नसते. ⁸ जो कोणी वाईट करण्याचे बेत करतो त्याला कारस्थानी म्हणतील. ⁹ मूर्खाचे कारस्थान म्हणजे पाप, आणि निंदक लोकांना तिरस्करणीय वाटतो.

¹⁰ संकटाच्या समयी जर तू खचलास, तर तुझे बळ थोडेच आहे. ¹¹ मरणाकडे नेल्या जाणाऱ्यांना सोडव, आणि वधाकडे अडखळत जाणाऱ्यांना मागे धर. ¹² जर तू म्हणालास, “पाहा, आम्हांला हे माहीत नव्हते,” तर जो हृदय तोलतो तो हे ओळखत नाही काय? जो तुझ्या जिवावर लक्ष ठेवतो तो हे जाणत नाही काय? आणि तो प्रत्येकाला त्याच्या कृत्यांप्रमाणे फेड देणार नाही काय?

¹³ माझ्या मुला, मध खा, कारण तो चांगला आहे, आणि मधाच्या पोळ्यातील थेंब तुझ्या जिभेला गोड लागतात. ¹⁴ हे जाण की तुझ्या जिवाला ज्ञानही असेच आहे; ते तुला मिळाले तर भविष्य आहे, आणि तुझी आशा तुटणार नाही.

¹⁵ अरे दुष्ट माणसा, नीतिमानाच्या घरावर टपून बसू नकोस; त्याच्या विश्रांतिस्थानाचा नाश करू नकोस, ¹⁶ कारण नीतिमान सात वेळा पडला तरी पुन्हा उठतो, पण दुष्ट संकटात कोसळतात.

¹⁷ तुझा शत्रू पडला तेव्हा आनंद करू नकोस, आणि तो अडखळला तेव्हा तुझे मन हर्षित होऊ देऊ नकोस, ¹⁸ नाहीतर आमचा पिता ते पाहील व त्याला ते आवडणार नाही, आणि तो आपला राग त्याच्यावरून फिरवील.

¹⁹ दुष्कर्म करणाऱ्यांमुळे चिडून जाऊ नकोस, आणि दुष्टांचा हेवा करू नकोस, ²⁰ कारण वाईट माणसाला भविष्य नाही; दुष्टांचा दिवा विझवला जाईल.

²¹ माझ्या मुला, आमच्या पित्याचे व राजाचे भय बाळग, आणि त्यांच्याविरुद्ध बंड करणाऱ्यांशी संग धरू नकोस, ²² कारण त्यांचे संकट अकस्मात उद्भवेल, आणि ते दोघेही आणू शकतील तो विध्वंस कोण जाणतो?

पक्षपाताविना न्याय

²³ ही देखील ज्ञान्यांची वचने आहेत: न्यायात पक्षपात करणे बरे नाही. ²⁴ जो कोणी दोषी माणसाला म्हणतो, “तू निर्दोष आहेस,” त्याला लोक शाप देतील व राष्ट्रे त्याचा धिक्कार करतील, ²⁵ पण जे दोषींना दोषी ठरवतात त्यांचे कल्याण होईल, आणि त्यांच्यावर विपुल आशीर्वाद येईल. ²⁶ प्रामाणिक उत्तर हे ओठांवरील चुंबनासारखे असते. ²⁷ बाहेरचे तुझे काम आधी सिद्ध कर, तुझी शेते तयार कर, आणि त्यानंतर तुझे घर बांध. ²⁸ विनाकारण तुझ्या शेजाऱ्याविरुद्ध साक्षी होऊ नकोस; तू तुझ्या ओठांनी फसवशील काय? ²⁹ असे म्हणू नकोस, “त्याने माझ्याशी जसे केले तसे मी त्याच्याशी करीन; त्याने केलेल्या कृत्याप्रमाणे मी त्या माणसाला फेड देईन.” ³⁰ मी एका आळशी माणसाच्या शेताजवळून, अकलेने रहित असलेल्या माणसाच्या द्राक्षमळ्याजवळून गेलो, ³¹ आणि पाहा, ते सर्व काटेरी झुडपांनी माजले होते; जमीन तणांनी झाकली होती, आणि त्याची दगडी भिंत पडली होती. ³² मग मी पाहिले व ते मनावर घेतले; मी पाहिले व बोध घेतला. ³³ थोडी झोप, थोडी डुलकी, विश्रांतीसाठी थोडे हात जोडून बसणे, ³⁴ आणि दारिद्र्य लुटारूसारखे तुझ्यावर येईल, आणि टंचाई शस्त्रधारी माणसासारखी येईल.