箴言 24

24 ¹唔好羨慕惡人， 都唔好想同佢哋一齊， ²因為佢哋嘅心圖謀強暴， 佢哋嘅嘴唇講出禍害。

³靠智慧，家室得以建立； 靠聰明，家室得以穩固； ⁴又靠知識，屋入面嘅房間充滿 各樣寶貴又美好嘅財富。

⁵有智慧嘅人充滿力量，有知識嘅人增添能力， ⁶因為你要用智慧嘅指引去打仗， 得勝在於謀士眾多。

⁷對愚昧人嚟講，智慧太高深； 喺城門口，佢無嘢可以講。 ⁸凡圖謀作惡嘅人， 都會俾人叫做奸詐嘅人。 ⁹愚昧人嘅圖謀就係罪， 好譏笑人嘅係人人所憎惡嘅。

¹⁰你若喺患難嘅時候退縮，你嘅力量就微小。 ¹¹俾人拉去處死嘅，你要拯救佢哋； 踉踉蹌蹌行向殺戮嘅，你要拉住佢哋。 ¹²你若話：「睇吓，呢件事我哋唔知道」， 咁量度人心嘅，佢又點會唔明白呢？看顧你性命嘅，佢又點會唔知道 呢？佢又豈會唔按照各人所行嘅去報應佢呢？

¹³我個仔啊，你要食蜜糖，因為蜜糖係好嘅； 蜂房滴落嘅蜜，你嘗落係甜嘅。 ¹⁴你要知道，智慧對你嘅性命就係咁樣； 你若尋見智慧，就有前途， 你嘅盼望都唔會斷絕。

¹⁵惡人啊，你唔好埋伏喺義人嘅家附近； 唔好毀壞佢安歇嘅地方， ¹⁶因為義人雖然跌倒七次，佢仍然會再起身， 但係惡人卻喺災禍中傾倒。

¹⁷你嘅仇敵跌倒嘅時候，你唔好歡喜； 佢傾倒嘅時候，你唔好心中快樂， ¹⁸免得我哋嘅父睇見就唔喜悅，將佢嘅怒氣從佢身上轉開。

¹⁹你唔好因為作惡嘅人而心煩， 都唔好羨慕惡人， ²⁰因為惡人無前途； 惡人嘅燈必會熄滅。

²¹我個仔啊，你要敬畏我哋嘅父，又要敬畏君王； 唔好同悖逆佢哋嘅人結交， ²²因為佢哋嘅災難必會突然臨到；佢哋兩者所帶嚟嘅毀滅，邊個知道呢？

審判不可偏心

²³以下都係智慧人嘅話：審判嘅時候偏心 係唔好嘅。 ²⁴凡對有罪嘅人話「你無罪」嘅， 萬民必咒詛佢，列國必譴責佢， ²⁵但係定有罪嘅人罪嘅，必得福樂， 豐盛嘅祝福必臨到佢哋。 ²⁶誠實嘅回答，就好似嘴唇上嘅親吻。 ²⁷你要喺外面預備好你嘅工作，喺田地上做好準備，之後先起你嘅屋。 ²⁸你唔好無緣無故作證陷害你嘅鄰舍； 你想用你嘅嘴唇去欺騙人咩？ ²⁹你唔好話：「佢點樣待我，我就點樣待佢； 我要按照佢所行嘅去報應佢。」 ³⁰我經過懶惰人嘅田，經過缺乏見識嘅人嘅葡萄園， ³¹睇吓，成塊地都長滿咗荊棘，地面 俾雜草蓋住，石牆亦都倒塌咗。 ³²於是我觀看，就記喺心裏； 我睇見咗，就領受咗教訓。 ³³再瞓一陣，再睏一陣， 再抱住雙手歇一歇， ³⁴咁貧窮就會好似強盜咁臨到你， 缺乏就會好似拎住武器嘅人咁臨到你。