Òwe 24

24 ¹Má ṣe ṣe ìlara àwọn ènìyàn búburú, má sì ṣe fẹ́ láti wà pẹ̀lú wọn, ²nítorí ọkàn wọn ń gbìmọ̀ ìwà ipá, ètè wọn sì ń sọ̀rọ̀ wàhálà.

³Nípa ọgbọ́n ni a fi ń kọ́ ilé, nípa òye sì ni a fi ń fi ìdí rẹ̀ múlẹ̀; ⁴nípa ìmọ̀ sì ni a fi ń kún àwọn yàrá rẹ̀ pẹ̀lú gbogbo ọrọ̀ iyebíye tí ó sì dára.

⁵Ọkùnrin ọlọ́gbọ́n kún fún agbára, ènìyàn tí ó ní ìmọ̀ sì ń mú agbára rẹ̀ pọ̀ sí i, ⁶nítorí nípa ìtọ́sọ́nà ọgbọ́n ni ìwọ lè fi jagun rẹ, ìṣẹ́gun sì ń wá nípasẹ̀ ọ̀pọ̀ olùdámọ̀ràn.

⁷Ọgbọ́n ga ju fún òmùgọ̀; ní ẹnu ibodè, kò ní ohun kan láti sọ. ⁸Ẹnikẹ́ni tí ó bá gbìmọ̀ láti ṣe búburú ni a ó máa pè ní olùdìtẹ̀. ⁹Ìdìtẹ̀ òmùgọ̀ jẹ́ ẹ̀ṣẹ̀, ẹlẹ́gàn sì jẹ́ ìríra sí àwọn ènìyàn.

¹⁰Bí ìwọ bá rẹ̀wẹ̀sì ní àkókò wàhálà, agbára rẹ kéré. ¹¹Gba àwọn tí a ń kó lọ sí ikú là, kí o sì dá àwọn tí ń ta gbọ̀nọ́n-gbọ̀nọ́n lọ sí ibi ìpa dúró. ¹²Bí ìwọ bá wí pé, “Wò ó, àwa kò mọ èyí,” ẹni tí ó ń wọn ọkàn kò ha wòye rẹ̀? Ẹni tí ó ń ṣọ́ ọkàn rẹ kò ha mọ̀ ọ́n? Òun kò ha ní san án fún olúkúlùkù gẹ́gẹ́ bí iṣẹ́ rẹ̀?

¹³Ọmọ mi, jẹ oyin, nítorí ó dára, àwọn ìkán oyin láti inú afárá sì dùn ní ẹnu rẹ. ¹⁴Mọ̀ pé ọgbọ́n rí gẹ́gẹ́ bẹ́ẹ̀ sí ọkàn rẹ; bí ìwọ bá rí i, ọjọ́ iwájú ń bẹ, ìrètí rẹ kì yóò sì gé kúrò.

¹⁵Má ṣe ba ní ibùba, ìwọ ènìyàn búburú, sí ilé olódodo; má ṣe pa ibùgbé ìsinmi rẹ̀ run, ¹⁶nítorí bí olódodo tilẹ̀ ṣubú nígbà méje, yóò tún dìde, ṣùgbọ́n àwọn ènìyàn búburú yóò ṣubú nínú ìparun.

¹⁷Má ṣe yọ̀ nígbà tí ọ̀tá rẹ bá ṣubú, má sì ṣe jẹ́ kí ọkàn rẹ kún fún ayọ̀ nígbà tí ó bá kọsẹ̀, ¹⁸kí Baba wa má bàa rí i kí inú rẹ̀ sì bàjẹ́, kí ó sì yí ìbínú rẹ̀ padà kúrò lọ́dọ̀ rẹ̀.

¹⁹Má ṣe banújẹ́ nítorí àwọn olùṣe búburú, má sì ṣe ṣe ìlara àwọn ènìyàn búburú, ²⁰nítorí ènìyàn búburú kò ní ọjọ́ iwájú; fìtílà àwọn ènìyàn búburú ni a ó pa kú.

²¹Ọmọ mi, bẹ̀rù Baba wa àti ọba, má sì ṣe darapọ̀ mọ́ àwọn tí ń ṣọ̀tẹ̀ sí wọn, ²²nítorí ìparun wọn yóò dìde lójijì, ta ni ó sì mọ ìbàjẹ́ tí àwọn méjèèjì lè mú wá?

Ìdájọ́ Láìsí Ojúsàájú

²³Ìwọ̀nyí pẹ̀lú ni àwọn ọ̀rọ̀ ọlọ́gbọ́n: Ṣíṣe ojúsàájú nínú ìdájọ́ kò dára. ²⁴Ẹnikẹ́ni tí ó bá sọ fún ẹlẹ́bi pé, “Aláìlẹ́bi ni ìwọ,” àwọn ènìyàn yóò ṣẹ́ èpè sí i, àwọn orílẹ̀-èdè yóò sì kẹ́gàn rẹ̀, ²⁵ṣùgbọ́n yóò dára fún àwọn tí ń dá ẹlẹ́bi lẹ́bi, ìbùkún ńlá yóò sì wá sórí wọn. ²⁶Ìdáhùn òtítọ́ dàbí ìfẹnukonu lẹ́nu. ²⁷Pèsè iṣẹ́ rẹ sílẹ̀ lóde, kí o múra oko rẹ sílẹ̀, lẹ́yìn náà kí o sì kọ́ ilé rẹ. ²⁸Má ṣe jẹ́rìí sí aládùúgbò rẹ láìnídìí; ìwọ ó ha fi ètè rẹ tannijẹ bí? ²⁹Má ṣe wí pé, “Èmi yóò ṣe sí i gẹ́gẹ́ bí ó ti ṣe sí mi; èmi yóò san ẹ̀san fún ọkùnrin náà gẹ́gẹ́ bí iṣẹ́ rẹ̀.” ³⁰Mo kọjá lẹ́gbẹ̀ẹ́ oko ọkùnrin ọ̀lẹ, lẹ́gbẹ̀ẹ́ ọgbà àjàrà ẹni tí kò ní làákàyè, ³¹sì wò ó, gbogbo rẹ̀ ti hu ẹ̀gún yọ; ilẹ̀ náà sì kún fún yèrèpè, ògiri òkúta rẹ̀ sì ti wó lulẹ̀. ³²Nígbà náà ni mo wò ó, mo sì fi sọ́kàn; mo rí i, mo sì gba ẹ̀kọ́. ³³Oorun díẹ̀, òógbé díẹ̀, ìkáwọ́ gbá díẹ̀ láti sinmi, ³⁴òṣì yóò sì wá sórí rẹ bí ọlọ́ṣà, àìní yóò sì dé bí ológun ìhámọ́ra.