Mithali 24

24 ¹Usiwaonee wivu watu waovu, wala usitamani kuwa pamoja nao, ²kwa maana mioyo yao hupanga jeuri, na midomo yao hunena maneno ya taabu.

³Kwa hekima nyumba hujengwa, na kwa ufahamu huimarishwa; ⁴na kwa maarifa vyumba vyake hujazwa mali zote za thamani na za kupendeza.

⁵Mtu mwenye hekima amejaa nguvu, na mtu mwenye maarifa huzidisha uwezo wake, ⁶kwa maana kwa mwongozo wa hekima waweza kupigana vita vyako, na ushindi huja kwa washauri wengi.

⁷Hekima i juu mno kwa mpumbavu; langoni, hana lolote la kusema. ⁸Kila apangaye kutenda mabaya ataitwa mwenye hila. ⁹Hila za mpumbavu ni dhambi, na mwenye dharau ni chukizo kwa watu.

¹⁰Ukilegea siku ya taabu, nguvu zako ni ndogo. ¹¹Waokoe wale wanaochukuliwa kwenda kufa, na uwazuie wale wanaojikwaa kuelekea kuchinjwa. ¹²Ukisema, "Tazama, hatukujua jambo hili," je, yeye apimaye mioyo hataliona? Je, yeye ailindaye nafsi yako hatalijua? Naye je, hatamlipa kila mtu sawasawa na matendo yake?

¹³Mwanangu, kula asali, kwa maana ni njema, na matone ya sega ni matamu kinywani mwako. ¹⁴Ujue kwamba hekima ni hivyo kwa nafsi yako; ukiipata, kuna wakati ujao, na tumaini lako halitakatiliwa mbali.

¹⁵Usiotee, ewe mtu mwovu, dhidi ya makao ya mwenye haki; usipaharibu mahali pake pa kupumzika, ¹⁶kwa maana ijapokuwa mwenye haki huanguka mara saba, huinuka tena, bali waovu hujikwaa katika msiba.

¹⁷Usifurahi adui yako aangukapo, wala moyo wako usishangilie ajikwaapo, ¹⁸Baba yetu asije akaliona, likamchukiza, akaugeuza mbali hasira yake naye.

¹⁹Usisumbuke moyo kwa sababu ya watenda maovu, wala usiwaonee wivu waovu, ²⁰kwa maana mtu mwovu hana wakati ujao; taa ya waovu itazimwa.

²¹Mwanangu, mche Baba yetu na mfalme, wala usiungane na wale wanaowaasi, ²²kwa maana msiba wao utainuka ghafula, naye ni nani ajuaye uharibifu ambao wote wawili waweza kuleta?

Haki Bila Upendeleo

²³Haya nayo ni maneno ya wenye hekima: Kuonyesha upendeleo katika hukumu si vyema. ²⁴Yeye amwambiaye mwenye hatia, "Wewe huna hatia," mataifa watamlaani na watu watamkemea, ²⁵bali itakuwa heri kwa wale wamhukumuo mwenye hatia, na baraka tele itawajilia. ²⁶Jibu la unyofu ni kama busu la midomoni. ²⁷Tengeneza kazi yako ya nje, andaa mashamba yako, na baada ya hayo jenga nyumba yako. ²⁸Usiwe shahidi dhidi ya jirani yako bila sababu; je, utadanganya kwa midomo yako? ²⁹Usiseme, "Nitamtenda kama alivyonitenda mimi; nitamlipa mtu huyo kwa aliyoyatenda." ³⁰Nilipita karibu na shamba la mtu mvivu, karibu na shamba la mizabibu la mtu asiye na akili, ³¹na tazama, lote lilikuwa limemea miiba; ardhi ilifunikwa na magugu, na ukuta wake wa mawe ulikuwa umebomoka. ³²Ndipo nikatazama nikatia moyoni; nikaona nikapokea mafundisho. ³³Bado usingizi kidogo, kusinzia kidogo, kukunja mikono kidogo ili kupumzika, ³⁴ndipo umaskini utakujilia kama mnyang'anyi, na uhitaji kama mtu mwenye silaha.