Hikima Takan Gina Gida

Gini da ceto. Ana gina gida ta wurin hikima, mai adalci kuma yakan fāɗi sau bakwai ya tashi. Ya ƙi jin daɗin fāɗuwar maƙiyi, ya kuma ƙi uzurin cewa ba mu sani ba sa'ad da ake kai mutane zuwa mutuwa. Gonar inabi da ciyayi suka shaƙe ita ce take koyar da shi.

Babi na 24.

Kada ka yi kishin mugayen mutane, kada kuma ka yi marmarin kasancewa tare da su, gama zukatansu suna ƙulla ta'addanci, leɓunansu kuma suna maganar wahala.

Da hikima ake gina gida, da fahimi kuma ake kafa shi; da sani kuma ake cika ɗakunansa da kowace dukiya mai daraja, mai daɗi.

Mai hikima yana cike da ƙarfi, mai sani kuma yana ƙara iko, gama da shawara ta hikima za ka iya yin yaƙinka, nasara kuma takan zo ta wurin mashawarta masu yawa.

Hikima ta yi wa wawa nisa ƙwarai; a bakin ƙofar gari, ba shi da abin cewa. Duk wanda yake ƙulla shirin aikata mugunta za a kira shi mai ƙulle-ƙulle. Ƙulle-ƙullen wawa zunubi ne, mai ba'a kuma abin ƙyama ne ga mutane.

In ka yi sanyin gwiwa a lokacin wahala, ƙarfinka kaɗan ne. Ka ceci waɗanda ake kai su ga mutuwa, ka kuma riƙe waɗanda suke tangaɗi zuwa ga yanka. In ka ce, “Ga shi, ba mu san wannan ba,” shin, wanda yake auna zuciya ba ya gane shi ba? Shin, wanda yake tsaron ranka bai sani ba? Ba zai kuwa sāka wa kowane mutum gwargwadon ayyukansa ba?

Ɗana, ka ci zuma, gama yana da kyau, ɗigon saƙar zuma kuma mai zaƙi ne a ɗanɗanonka. Ka sani hikima ma haka take ga ranka; in ka same ta, akwai makoma mai kyau, begenka kuma ba za a datse ba.

Kada ka yi kwanto, kai mugu, ga gidan mai adalci; kada ka lalatar da wurin hutunsa, gama ko da mai adalci ya faɗi sau bakwai, yakan sāke tashi, amma mugaye sukan yi tuntuɓe cikin masifa.

Kada ka yi farin ciki sa'ad da abokin gābanka ya faɗi, kada kuma zuciyarka ta yi murna sa'ad da ya yi tuntuɓe, don kada Ubanmu ya gani ya ji haushi, ya kuma kau da fushinsa daga gare shi.

Kada ka damu saboda masu aikata mugunta, kada kuma ka yi kishin mugaye, gama mugu ba shi da makoma; za a kashe fitilar mugaye.

Ɗana, ka ji tsoron Ubanmu da sarki, kada kuma ka haɗa kai da masu yi musu tawaye, gama masifarsu za ta tashi farat ɗaya, kuma wa ya san irin hallakar da su biyun za su iya kawowa?

Shari'a Ba Tare da Nuna Bambanci Ba

Waɗannan ma maganganun masu hikima ne: Nuna bambanci a cikin shari'a ba shi da kyau. Duk wanda ya ce wa mai laifi, “Ba ka da laifi,” mutane za su la'ance shi, al'ummai kuma za su zarge shi, amma waɗanda suke hukunta mai laifi za su zauna lafiya, albarka mai yawa kuma za ta sauko musu. Amsa ta gaskiya kamar sumba ce a leɓe. Ka shirya aikinka na waje, ka shirya gonakinka, bayan haka kuma ka gina gidanka. Kada ka ba da shaida a kan maƙwabcinka ba dalili, za ka yi yaudara da leɓunanka? Kada ka ce, “Zan yi masa yadda ya yi mini; zan sāka wa mutumin bisa ga abin da ya yi.” Na wuce ta gonar rago, da gonar inabin mutumin da ba shi da hankali, sai ga shi, ƙaya ta yi girma a ko'ina; ƙasar ciyawa ta rufe ta, katangar duwatsunta kuma ta rushe. Sa'an nan na dubi wannan na kuma sa shi a zuciya; na gani na kuma karɓi koyarwa. Barci kaɗan, gyangyaɗi kaɗan, naɗe hannuwa kaɗan don hutawa, talauci kuwa zai auko maka kamar ɓarawo, rashi kuma kamar mai ɗauke da makami.