Mga Panultihon 24

24 ¹Ayaw kasina sa mga tawong daotan, ug ayaw tinguhaa nga makig-uban kanila, ²kay ang ilang mga kasingkasing nagplano ug kapintasan, ug ang ilang mga ngabil nagsulti ug kasamok.

³Pinaagi sa kaalam matukod ang usa ka balay, ug pinaagi sa pagsabot kini malig-on; ⁴ug pinaagi sa kahibalo mapuno ang mga lawak niini sa tanang bililhon ug makapahimuot nga bahandi.

⁵Ang tawong maalamon puno sa kusog, ug ang tawong may kahibalo nagdugang sa iyang gahom, ⁶kay pinaagi sa maalamong paggiya makiggubat ka, ug ang kadaogan moabot pinaagi sa daghang magtatambag.

⁷Ang kaalam hataas ra kaayo alang sa buangbuang; diha sa ganghaan, wala siyay ikasulti. ⁸Si bisan kinsa nga nagplano sa pagbuhat ug daotan tawgon nga tiglaraw ug daotan. ⁹Ang laraw sa buangbuang maoy sala, ug ang mabiaybiayon dulumtanan sa mga tawo.

¹⁰Kon maluya ka sa panahon sa kalisod, gamay ra ang imong kusog. ¹¹Luwasa kadtong gidala paingon sa kamatayon, ug pugngi kadtong nagsusapinday paingon sa ihawanan. ¹²Kon moingon ka, “Tan-awa, wala kami masayod niini,” dili ba makasabot niini siya nga nagtimbang sa kasingkasing? Dili ba nasayod niini siya nga nagbantay sa imong kalag? Ug dili ba niya balosan ang matag tawo sumala sa iyang mga binuhatan?

¹³Anak ko, kaon ug dugos, kay kini maayo, ug ang tinulo sa udlan tam-is sa imong panlasa. ¹⁴Hibaloi nga ang kaalam sama lang niini alang sa imong kalag; kon imo kining makaplagan, aduna gyoy kaugmaon, ug ang imong paglaom dili pagaputlon.

¹⁵Ayaw pag-atang, ikaw nga tawong daotan, batok sa panimalay sa matarong; ayaw gub-a ang iyang pahulayanan, ¹⁶kay bisan pag matumba ang matarong sa makapito, mobangon siya pag-usab, apan ang mga daotan mangapukan sa katalagman.

¹⁷Ayaw paglipay kon matumba ang imong kaaway, ug ayaw tugoti nga maglipay ang imong kasingkasing kon mapandol siya, ¹⁸basin makita kini sa atong Amahan ug dili siya mahimuot, ug iyang ipahilayo ang iyang kasuko gikan kaniya.

¹⁹Ayaw kabalaka tungod sa mga mamumuhat ug daotan, ug ayaw kasina sa mga daotan, ²⁰kay ang tawong daotan walay kaugmaon; ang suga sa mga daotan pagapalongon.

²¹Anak ko, kahadloki ang atong Amahan ug ang hari, ug ayaw pakig-uban niadtong misupak batok kanila, ²²kay ang ilang katalagman motungha sa kalit, ug kinsa ba ang nasayod sa kadaot nga ikapahamtang nilang duha?

Hustisya nga Walay Pagpihig

²³Kini usab mga panultihon sa mga maalamon: Ang pagpakitag pagpihig diha sa paghukom dili maayo. ²⁴Si bisan kinsa nga moingon sa sad-an, “Ikaw walay sala,” tunglohon siya sa mga katawhan ug yagyagan siya sa mga kanasoran, ²⁵apan mamaayo alang niadtong nagsilot sa sad-an, ug ang madagayaong panalangin modangat kanila. ²⁶Ang tinud-anay nga tubag sama sa usa ka halok sa ngabil. ²⁷Andama ang imong buluhaton sa gawas, hikaya ang imong mga uma, ug pagkahuman niana tukora ang imong balay. ²⁸Ayaw pagsaksi batok sa imong silingan kon walay hinungdan; molimbong ka ba pinaagi sa imong mga ngabil? ²⁹Ayaw pag-ingon, “Buhaton ko kaniya ang iyang gibuhat kanako; balosan ko ang tawo sa iyang nabuhat.” ³⁰Miagi ako sa uma sa usa ka tawong tapulan, sa parasan sa usa nga kulang sa buot, ³¹ug kini, natabonan na sa mga tunok; ang yuta napuno sa mga sagbot, ug ang paril niini nga bato naguba na. ³²Unya mitan-aw ako ug gipalandong kini; nakakita ako ug nakadawat ug pagtudlo. ³³Diyutayng katulog, diyutayng pagduka, diyutayng pagkiyugpos sa mga kamot aron mopahulay, ³⁴ug ang kakabos modangat kanimo sama sa usa ka tulisan, ug ang kawad-on sama sa usa ka tawong sangkap sa hinagiban.