Mga Panultihon 25

25 ¹Kini usab mao ang mga panultihon ni Solomon, nga gikopya sa mga tawo ni Hezekia nga hari sa Juda. ²Himaya sa atong Amahan ang pagtago sa usa ka butang, apan himaya sa mga hari ang pagsusi niini. ³Sama nga ang kalangitan hataas ug ang yuta lawom, mao nga ang kasingkasing sa mga hari dili matugkad. ⁴Wagtanga ang taya gikan sa plata, ug mogula ang usa ka sudlanan alang sa tigdalisay. ⁵Wagtanga ang daotan gikan sa atubangan sa hari, ug ang iyang trono malig-on diha sa pagkamatarong. ⁶Ayaw pagpaila sa imong kaugalingon diha sa atubangan sa hari, ug ayaw pagtindog sa dapit sa mga dagku; ⁷kay mas maayo nga sultihan ka, “Saka ngari,” kaysa ibutang sa ubos nga dapit atubangan sa halangdon nga imong makita. ⁸Ayaw pagdali-dali sa pagpakig-away, kay unsa may imong buhaton sa kataposan kon pakaulawan ka sa imong silingan? ⁹Ipangatarongan ang imong kaso uban sa imong silingan mismo, apan ayaw ibutyag ang tinago sa uban, ¹⁰basin pakaulawan ka sa makadungog niini, ug ang imong daotang dungog dili na gayod mahanaw. ¹¹Ang pulong nga gilitok sa hustong higayon sama sa mga mansanas nga bulawan nga gipahimutang sa plata. ¹²Sama sa singsing nga bulawan o dayandayan nga lunsayng bulawan ang maalamong pagbadlong ngadto sa dalunggan nga maminaw. ¹³Sama sa kabugnaw sa nyebe panahon sa ting-ani ang usa ka kasaligang mensahero ngadto sa nagpadala kaniya; gipalagsik niya ang kalag sa iyang mga agalon. ¹⁴Sama sa mga panganod ug hangin nga walay ulan ang tawo nga nagpasigarbo sa gasa nga wala gayod gihatag. ¹⁵Pinaagi sa pailob madani ang usa ka magmamando, ug ang malumong dila makabali sa bukog. ¹⁶Kon makakaplag ka ug dugos, kaon lang ug igo, kay basin mapuno ka ug magsuka. ¹⁷Ayaw pagduaw sa balay sa imong silingan nga subsob, kay basin mapul-an siya kanimo ug magdumot kanimo. ¹⁸Sama sa bunal, espada, ug hait nga pana ang tawo nga mosaksig bakak batok sa iyang silingan. ¹⁹Sama sa daotang ngipon o tiil nga nalisa ang pagsalig sa tawong maluibon sa panahon sa kalisdanan. ²⁰Sama sa tawo nga naghukas sa iyang bisti sa bugnaw nga adlaw, sama sa suka nga gibubo sa soda, ang tawo nga nagaawit sa mga awit ngadto sa bug-at nga kasingkasing. ²¹Kon gigutom ang imong kaaway, hatagi siyag tinapay nga makaon, ug kon giuhaw siya, hatagi siyag tubig nga mainom; ²²kay magpundok ka ug mga baga sa kalayo diha sa iyang ulo, ug ang atong Amahan moganti kanimo. ²³Ang hanging amihan nagdala ug ulan, ug ang malibakong dila, sa masuk-anong mga panagway. ²⁴Mas maayo pa nga mopuyo sa suok sa atop kaysa sa gipuy-ang balay uban sa palaawayng asawa. ²⁵Sama sa bugnaw nga tubig ngadto sa gikapoy nga kalag ang maayong balita gikan sa halayong yuta. ²⁶Sama sa lapokon nga tuboran o nahugawang tubod ang tawong matarong nga motugyan atubangan sa daotan. ²⁷Dili maayo ang sobra nga pagkaon ug dugos, ni ang pagpangita sa imong kaugalingong himaya. ²⁸Sama sa siyudad nga naguba ug nahibiling walay paril ang tawo nga walay pagpugong sa iyang kaugalingong espiritu.