Kayumetap Hezekiah
Kikisiirte murenigap Hezekiah laitoryatap Judah, ak nenyoor kelketab tuguuk che chaang': logoegap thahabu, teluji eng' kesisyet, tooteet ne ya, siki eng' sodait, nganaseet ne matinyei irimeet. Katigonennyi ko ne imaanat, kong'eetyee eng' metaenet taai eng' taitap laitoryat agoi me-isiir teyet eng' kootap kokweng'ung'.
25 1Chu kora ko kalewenaigap Solomon, che ki kisiirte murenigap Hezekiah laitoryatap Judah. 2Ko toroornatetap Kwandanyo koun ng'olyoot, ago toroornatetap laitorinik ko kocheeng' ng'olyoot. 3Ko uu ye kooi kipsengwet ak ko rukto ng'wony, ko uu nooto muguleldap laitorinik ne ma kicheeng'. 4Isto pusagaryek eng' fedha, si kobiit komong'u tereet ne po ineendet ne ipeeli. 5Isto kiptengeginik eng' taitap laitoryat, si kogimit ng'echerennyi eng' imanda. 6Ametoroorsei eng' taitap laitoryat, ak ametonon eng' oldap piik che oo; 7amu komyee kemwaun, “Togoste yu,” kosiir ye kindoin eng' olooto ne ng'wony eng' taitap toondet ne igeeri. 8Amechoorchei ibwa suryet, amu nee ne iyai eng' let ye kagolilin chiitap kokweng'ung'? 9Boljin ng'olyoondeng'ung' chiitap kokweng'ung' ineegei, ago amemwa ung'ootap chiito age, 10si ma kolilin ineendet ne kasei, ak ma kobet kaguiyeng'ung' ne ya agoi koigeny. 11Ng'olyoot ne kimwaei eng' sait ne myee ko uu logoegap thahabu che mi kelongonigap fedha. 12Ko uu peteiyotap thahabu anan ageeswekap thahabu ne myee, katigonet ne utaat eng' iit ne kasei. 13Ko uu kaitityetap teluji eng' saitap kesisyet ko kiyooktindet ne iyanaat eng' icheek che iyooktoe ineendet; meng'iisyei saboondap mastinwekyik. 14Ko uu poolik ak usoonet ne ma tinyei ropta ko chiito ne toroorsei agobo kagoochinet ne ma ki kogoochi. 15Eng' muitaet keyanisyei laitoryat, ak iiri ng'elyep ne nyolnyol kowet. 16Ngo inyoor kumyat, iam ne nyolu kityo, amat iam che chaang' si matun ing'ung'da. 17Amenyoonji kootap chiitap kokweng'ung' kila, si matun konyalulin ak kowechin. 18Ko uu rungut, ak rotweet, ak kipchabet ne ng'wan ko chiito ne baoryanji chiitap kokweng'ung' eng' lembech. 19Ko uu tooteet ne ya anan keeldo ne mang'at ko kemang'u chiito ne ma iyanaat eng' saitap nyalilda. 20Ko uu chiito ne istoe ngoryennyi eng' peet ne kaitit, ko uu siki ne kepaktoi magadi, ko chiito ne tyeenchi tyenwogik muguleldo ne nyigiis. 21Ngo amei rubeet puunyiing'ung', igoochi amdit koam, ak ngo amei melelda, igoochi peek koee; 22amu iyumi nesegap maat eng' metinnyi, ak kogoonin Kwandanyo melekto. 23Imong'u usoonet ne punu kaataam ropta, ak ng'elyep ne un koronyoit. 24Komyee kemeny eng' murot ne po koot parak, kosiir kemeny eng' koot ne kiboorchigei ak kwony ne suryet. 25Ko uu peek che kaitit eng' saboondo ne ng'etat ko logoiywek che myachen che punu emet ne loo. 26Ko uu kondap peek ne kiloitaat anan konda ne kiwech, ko chiito ne po imanda ne weeksei let eng' taitap kiptengeginik. 27Ma myee koam kumyat ne chaang', anan kocheeng'gei chiito toroornatennyi. 28Ko uu nganaseet ne ki put ak kobakta ne ma tinyei irimoik, ko chiito ne ma imuuchi koriip kabuusennyi ineegei.