Proverbs 25

25 ¹Dis ones too na di proverbs of Solomon, wey di men of Hezekiah wey be king of Judah copy comot. ²Na di glory of our Papa to hide one matter, but na di glory of kings to search one matter comot. ³Just as di heavens high and di earth deep, na so di heart of kings dey wey person no fit search am reach. ⁴Comot di dirty from di silver, and vessel go come out for di one wey dey refine am. ⁵Comot di wicked person from di king front, and im throne go stand strong for correct-and-holy way. ⁶No dey push yousef forward for di king presence, and no stand for di place of di big people; ⁷because e beta make dem tell you, “Come up here,” pass make dem put you for lower place for front of one big man wey your eye dey see. ⁸No rush enter quarrel, because wetin you go do for di end wen your neighbor put you for shame? ⁹Argue your case with your neighbor imsef, but no open anoda person secret, ¹⁰so dat di one wey hear am no go shame you, and your bad name no go ever comot. ¹¹Word wey person talk for di correct time be like apple of gold wey dem set inside silver. ¹²Like ring of gold or fine gold ornament, na so wise correction be for ear wey dey listen. ¹³Like di cold of snow for harvest time, na so faithful messenger be to di people wey send am; e dey refresh di soul of im masters. ¹⁴Like clouds and wind wey no bring rain, na so person wey dey boast of gift wey e never give be. ¹⁵Na through patience dem dey convince ruler, and soft tongue dey break bone. ¹⁶If you find honey, chop only wetin reach you, if no be so you go chop too much and vomit. ¹⁷No dey go your neighbor house too much, so dat e no go tire for you come hate you. ¹⁸Like club, sword, and sharp arrow, na so di person wey dey give false witness against im neighbor be. ¹⁹Like bad tooth or foot wey comot for joint, na so to trust person wey no dey faithful for time of trouble be. ²⁰Like person wey remove cloth for cold day, like vinegar wey dem pour for baking soda, na so di person wey dey sing song give heavy heart be. ²¹If your enemy dey hungry, give am bread make e chop, and if thirst dey catch am, give am water make e drink; ²²because you go heap coals of fire for im head, and our Papa go reward you. ²³Di north wind dey bring rain, and tongue wey dey gossip for secret dey bring vex face. ²⁴E beta make person live for corner of di rooftop pass to share house with wife wey dey quarrel. ²⁵Like cold water to soul wey don tire, na so good news from far land be. ²⁶Like spring wey don muddy or fountain wey don spoil, na so di correct-and-holy person be wey give way for di wicked person. ²⁷E no good to chop too much honey, and e no good to dey find your own glory. ²⁸Like city wey dem don break enter and leave am without wall, na so di person wey no fit control im own spirit be.