Hezekiahwui Kazipkhui
Hezekiahwui mibingna kapikhui kahaina, kala theithukthei kachungkha lei: sināwui theithukthei, māhā atamli horam, makaphā hā, sodatungli kathura, phākho makhalei keinung. Awui tamchithei chi kachang ngasa, awungawui mangāli nakhalatta khāngmi masaalu kaji eina nawui khongnainaowui shimli ra̱ra̱ mavayangalu kaji tangda.
25 1Hibing chila Solomonwui chānsam, Judahwui awunga Hezekiahwui mibingna kapikhui kahaibing china. 2Mang akha thumkhavai chi ithumwui Avāwui tekhamateina, kha mang akha phāzata khavai chi awungabingwui tekhamateina. 3Kazingram kajui kala okathui kathuk thāda, awungabingwui ning chi meikhaishap mavaimana. 4Lupāsāwui eina maripai chi khuithuiulu, chieina lupāsā sākhuipawui vang ham akha shokra. 5Awungawui mangāli eina makhayābing chi khuithuiulu, chieina awui wungpamkhong khamashung khangarong eina sakāmira. 6Awungawui mangāli nakhalatta khāngmi masaalu, kala khareibingwui apamli manganongalu; 7kaja nali "Hili juirālu" da hānghai chi, nawui mik eina katheiya wungnaowui mangāli khamaze apamli sanghai kajiwui vanga phāmei. 8Kharar sākhavai tangda mazatalu, kaja nawui khongnainaona nali maishi ngasak tharan khanao eina nana khi sārakhala? 9Nawui khongnainao akhalattali nawui tuingaphun ngaphatlu, kha mi kateiwui ngathum kahai chi malānchitheialu, 10chi shākasang china nali maishi ngasakpaishina, kala nawui makaphā khamaso chi katang mavānthuipaishina. 11Khamayon atamli hānghai tui akha chiya, lupāsāwui rukkasang chili khalei sināwui theithukthei kathāna. 12Sināwui unra̱ akha lah sinā kahakvawui ngachān akha thāda, nganākasang khanāli thangkhamei hāngkhamachin chiya. 13Māhā atamli horamwui khamakui thāda, ali chihovābingwui vang chisin kahai paome akha chiya; ana awui akhavābingwui manglā chaimira. 14Zingrot maleila muiyā kala masi thāda, run maronmi chi lāngsokhangai mi chiya. 15Ja̱khami eina khamunga chi mayāchao ngasakra, kala khanim male eina ara̱ teka. 16Khuira̱ nana samphang tharan, shaplak chi maningla shailu, maningakha kachangmei shaida maloshokpaishina. 17Nawui khongnainaowui shimli ra̱ra̱ mavayangalu, maningakha ana nali ngachāng chatta yangkharingpaishina. 18Khāmshui, raighai, kala kazana malāthing thāda, awui khongnainaoli mikhanam shākhi sāa mi chilina. 19Makaphā hā lah ngachei kahai phei thāda, kakhanang tharan shitkasang makhalei mili chihanki kaji chilina. 20Kasik atamli kachon raitāhaia mi thāda, sodatungli kathura drakhāra̱ heishokkahai thāda, ning ritkahai mili laa sāa mi chilina. 21Nawui yangkashe thaiakha, ali zākhavai khamui milu, kala ana ra̱changakha, ali mangkhavai tara̱ milu; 22kaja nana awui akuitungli meithā ngaror ngasakra, kala ithumwui Avāna nali sāman mira. 23Atungshongwui masina zingrot thanvāmi, kala ngathumda matuida malena malungvāt mai thanvāmi. 24Khamarāk sha̱naoli shim ngarumli leipam kajiwui vanga, shimtung achithek akhali leipam chi phāmei. 25Kachot manglāli tara̱ khamakui thāda, ngalei katāva̱wui eina paokaphā chilina. 26Naimakhui kahai ura̱ lah makathar sāhai ra̱khong thāda, makhayāwui mangāli pitai khangaronga mi chilina. 27Khuira̱ mavātla zāki chi maphāmana, kala nakhalattawui masot phaki chila maphāmana. 28Sākhayanghaida phākho makhalei keinung thāda, akhalatta ngarin makashapa mi chilina.
