സുഭാഷിതങ്ങൾ 25 FHB Father's Heart Bible™

25 ¹ഇവയും യെഹൂദാ രാജാവായ ഹിസ്കിയാവിന്റെ ആളുകൾ പകർത്തിയെഴുതിയ ശലോമോന്റെ സദൃശവാക്യങ്ങളാകുന്നു. ²ഒരു കാര്യം മറച്ചുവയ്ക്കുന്നത് നമ്മുടെ പിതാവിന്റെ മഹത്ത്വം; ഒരു കാര്യം അന്വേഷിച്ചറിയുന്നതോ രാജാക്കന്മാരുടെ മഹത്ത്വം. ³ആകാശം ഉന്നതവും ഭൂമി അഗാധവും ആയിരിക്കുന്നതുപോലെ, രാജാക്കന്മാരുടെ ഹൃദയം അന്വേഷിച്ചറിയാനാവാത്തതാകുന്നു. ⁴വെള്ളിയിൽനിന്ന് കീടം നീക്കിക്കളയുക, അപ്പോൾ തട്ടാന് ഒരു പാത്രം ലഭിക്കും. ⁵രാജാവിന്റെ മുമ്പിൽനിന്ന് ദുഷ്ടന്മാരെ നീക്കിക്കളയുക, അപ്പോൾ അവന്റെ സിംഹാസനം നീതിയിൽ സ്ഥിരമായിത്തീരും. ⁶രാജസന്നിധിയിൽ നിന്നെത്തന്നെ ഉയർത്തിക്കാട്ടരുത്, മഹാന്മാരുടെ സ്ഥാനത്ത് നിൽക്കുകയുമരുത്; ⁷നീ കാണുന്ന ഒരു പ്രഭുവിന്റെ മുമ്പിൽ താഴ്ന്ന സ്ഥാനത്തേക്ക് നീക്കപ്പെടുന്നതിനെക്കാൾ, “ഇവിടെ കയറിവരുക” എന്ന് നിന്നോട് പറയുന്നതു നല്ലത്. ⁸തിടുക്കത്തിൽ വഴക്കിന് ഇറങ്ങരുത്; നിന്റെ അയൽക്കാരൻ നിന്നെ ലജ്ജിപ്പിക്കുമ്പോൾ ഒടുവിൽ നീ എന്തു ചെയ്യും? ⁹നിന്റെ വ്യവഹാരം അയൽക്കാരനോടുതന്നെ തീർക്കുക, എന്നാൽ മറ്റൊരുവന്റെ രഹസ്യം വെളിപ്പെടുത്തരുത്; ¹⁰അതു കേൾക്കുന്നവൻ നിന്നെ ലജ്ജിപ്പിക്കുകയും നിന്റെ ദുഷ്കീർത്തി ഒരിക്കലും നീങ്ങാതിരിക്കുകയും ചെയ്യാതിരിക്കട്ടെ. ¹¹തക്കസമയത്ത് പറയുന്ന വാക്ക് വെള്ളിയുടെ ചട്ടത്തിലെ പൊൻആപ്പിളുകൾപോലെയാകുന്നു. ¹²ശ്രദ്ധിക്കുന്ന കാതിന് ജ്ഞാനപൂർവമായ ശാസന സ്വർണവളയവും തങ്കാഭരണവുംപോലെയാകുന്നു. ¹³കൊയ്ത്തുകാലത്തെ ഹിമത്തിന്റെ കുളിർമപോലെയാകുന്നു തന്നെ അയയ്ക്കുന്നവർക്ക് വിശ്വസ്തനായ ദൂതൻ; അവൻ തന്റെ യജമാനന്മാരുടെ മനസ്സിനു കുളിർമ നൽകുന്നു. ¹⁴മഴയില്ലാത്ത മേഘവും കാറ്റുംപോലെയാകുന്നു ഒരിക്കലും കൊടുക്കാത്ത ദാനത്തെക്കുറിച്ച് വമ്പു പറയുന്നവൻ. ¹⁵ക്ഷമകൊണ്ട് അധികാരി വശീകരിക്കപ്പെടുന്നു, മൃദുവായ നാവ് അസ്ഥിയെ ഒടിക്കുന്നു. ¹⁶നീ തേൻ കണ്ടെത്തിയാൽ വേണ്ടുന്നതുമാത്രം ഭക്ഷിക്കുക; അല്ലെങ്കിൽ അധികം കഴിച്ച് ഛർദിക്കേണ്ടിവരും. ¹⁷നിന്റെ അയൽക്കാരന്റെ വീട്ടിൽ കൂടെക്കൂടെ ചെല്ലരുത്; അല്ലെങ്കിൽ അവൻ നിന്നെക്കുറിച്ച് മടുത്ത് നിന്നെ വെറുക്കും. ¹⁸തന്റെ അയൽക്കാരനെതിരേ കള്ളസാക്ഷ്യം പറയുന്നവൻ ഗദയും വാളും മൂർച്ചയുള്ള അമ്പുംപോലെയാകുന്നു. ¹⁹കഷ്ടകാലത്ത് വിശ്വാസയോഗ്യമല്ലാത്തവനിലുള്ള ആശ്രയം കേടുവന്ന പല്ലോ ഉളുക്കിയ കാലോ പോലെയാകുന്നു. ²⁰തണുപ്പുള്ള ദിവസം വസ്ത്രം ഊരിക്കളയുന്നവനെപ്പോലെ, ചവർക്കാരത്തിന്മേൽ ഒഴിച്ച വിന്നാഗിരിപോലെ, ഭാരമുള്ള ഹൃദയത്തോട് പാട്ടുകൾ പാടുന്നവൻ ആകുന്നു. ²¹നിന്റെ ശത്രു വിശന്നിരുന്നാൽ അവന് ഭക്ഷിക്കാൻ അപ്പം കൊടുക്കുക, ദാഹിച്ചിരുന്നാൽ അവന് കുടിക്കാൻ വെള്ളം കൊടുക്കുക; ²²അങ്ങനെ നീ അവന്റെ തലയിൽ തീക്കനൽ കൂട്ടിവയ്ക്കും, നമ്മുടെ പിതാവ് നിനക്ക് പ്രതിഫലം നൽകുകയും ചെയ്യും. ²³വടക്കൻ കാറ്റ് മഴ ഉളവാക്കുന്നു; ഒളിഞ്ഞുപറയുന്ന നാവ് കോപഭാവങ്ങളെയും. ²⁴വഴക്കാളിയായ ഭാര്യയോടുകൂടി ഒരു വീട് പങ്കിടുന്നതിനെക്കാൾ, മേൽപ്പുരയുടെ ഒരു മൂലയിൽ പാർക്കുന്നതു നല്ലത്. ²⁵ദൂരദേശത്തുനിന്നുള്ള നല്ല വാർത്ത തളർന്ന മനസ്സിന് തണുത്ത വെള്ളംപോലെയാകുന്നു. ²⁶ദുഷ്ടന്റെ മുമ്പിൽ വഴിമാറിക്കൊടുക്കുന്ന നീതിമാൻ കലങ്ങിയ ഉറവപോലെയും മലിനമായ നീരുറവപോലെയും ആകുന്നു. ²⁷തേൻ അധികം ഭക്ഷിക്കുന്നതു നല്ലതല്ല; സ്വന്തം മഹത്ത്വം അന്വേഷിക്കുന്നതും അങ്ങനെതന്നെ. ²⁸തന്റെ മനസ്സിനെ അടക്കിവാഴാൻ കഴിയാത്ത മനുഷ്യൻ മതിലില്ലാതെ തകർക്കപ്പെട്ട നഗരംപോലെയാകുന്നു.