സുഭാഷിതങ്ങൾ 26 FHB Father's Heart Bible™

26 ¹വേനൽക്കാലത്തെ ഹിമംപോലെയും കൊയ്ത്തുകാലത്തെ മഴപോലെയും, ഭോഷന് ബഹുമാനം ചേരുന്നതല്ല. ²പാറിപ്പറക്കുന്ന കുരുവിയെപ്പോലെയും ചീറിപ്പായുന്ന മീവൽപക്ഷിയെപ്പോലെയും, കാരണമില്ലാത്ത ശാപം ആരുടെമേലും വന്നുചേരുകയില്ല. ³കുതിരയ്ക്കു ചമ്മട്ടി, കഴുതയ്ക്കു കടിഞ്ഞാൺ, ഭോഷന്മാരുടെ മുതുകിനു വടിയും. ⁴ഭോഷനോട് അവന്റെ ഭോഷത്തത്തിനൊത്തു മറുപടി പറയരുത്; പറഞ്ഞാൽ നീയും അവനെപ്പോലെ ആയിത്തീരും. ⁵ഭോഷനോട് അവന്റെ ഭോഷത്തത്തിനൊത്തു മറുപടി പറയുക; അല്ലെങ്കിൽ അവൻ തന്റെ സ്വന്തം കണ്ണിൽ ജ്ഞാനിയായിത്തീരും. ⁶ഭോഷന്റെ കൈവശം സന്ദേശം അയയ്ക്കുന്നവൻ തന്റെ സ്വന്തം കാലുകൾ മുറിച്ചുകളയുകയും അതിക്രമം കുടിക്കുകയും ചെയ്യുന്നു. ⁷മുടന്തന്റെ തൂങ്ങിക്കിടക്കുന്ന നിഷ്പ്രയോജനമായ കാലുകൾപോലെയാണ് ഭോഷന്മാരുടെ വായിലെ സദൃശവാക്യം. ⁸കവിണയിൽ കല്ലു മുറുക്കിക്കെട്ടുന്നതുപോലെയാണ് ഭോഷന് ബഹുമാനം നല്കുന്നത്. ⁹മദ്യപന്റെ കൈയിലെ മുൾച്ചെടിപോലെയാണ് ഭോഷന്മാരുടെ വായിലെ സദൃശവാക്യം. ¹⁰എല്ലാവരെയും മുറിവേല്പിക്കുന്ന വില്ലാളിയെപ്പോലെയാണ് ഭോഷനെ കൂലിക്കു വയ്ക്കുന്നവനും വഴിപോക്കരെ കൂലിക്കു വയ്ക്കുന്നവനും. ¹¹നായ് തന്റെ ഛർദിയിലേക്കു മടങ്ങിവരുന്നതുപോലെ, ഭോഷൻ തന്റെ ഭോഷത്തം ആവർത്തിക്കുന്നു. ¹²തന്റെ സ്വന്തം കണ്ണിൽ ജ്ഞാനിയായിരിക്കുന്ന ഒരുവനെ നീ കാണുന്നുവോ? അവനെക്കാൾ ഭോഷനുതന്നെ അധികം പ്രത്യാശയുണ്ട്.

¹³മടിയൻ പറയുന്നു: “വഴിയിൽ ഒരു സിംഹം! തെരുവീഥികളിൽ ഒരു സിംഹം!” ¹⁴വാതിൽ തന്റെ വിജാഗിരിയിൽ തിരിയുന്നതുപോലെ, മടിയൻ തന്റെ കിടക്കയിൽ തിരിയുന്നു. ¹⁵മടിയൻ തന്റെ കൈ തളികയിൽ പൂഴ്ത്തുന്നു; അതു വായിലേക്കു തിരികെ കൊണ്ടുവരുന്നത് അവനു ക്ഷീണമാകുന്നു. ¹⁶മടിയൻ തന്റെ സ്വന്തം കണ്ണിൽ ജ്ഞാനിയാകുന്നു, ന്യായമായി മറുപടി പറയുന്ന ഏഴുപേരെക്കാളും.

¹⁷നായുടെ ചെവിക്കു പിടിക്കുന്നതുപോലെയാണ് തന്റേതല്ലാത്ത കലഹത്തിൽ ഇടപെടുന്ന വഴിപോക്കൻ.

¹⁸തീക്കൊള്ളികളും അസ്ത്രങ്ങളും മരണവും എയ്യുന്ന ഒരു ഭ്രാന്തനെപ്പോലെ, ¹⁹തന്റെ അയൽക്കാരനെ വഞ്ചിച്ചിട്ട് “ഞാൻ തമാശ പറഞ്ഞതേയുള്ളൂ!” എന്നു പറയുന്നവനും അങ്ങനെതന്നെ.

²⁰വിറകില്ലാതെ തീ കെട്ടുപോകുന്നു, ഏഷണിക്കാരനില്ലാതെ കലഹം ശമിക്കുന്നു. ²¹കനലിനു കരിയും തീയ്ക്കു വിറകും എന്നപോലെ, കലഹപ്രിയൻ വഴക്കു ആളിക്കത്തിക്കുന്നു. ²²ഏഷണിക്കാരന്റെ വാക്കുകൾ സ്വാദിഷ്ഠമായ ഭോജ്യംപോലെയാകുന്നു; അവ ഉള്ളിന്റെ ഉള്ളിലേക്ക് ഇറങ്ങിച്ചെല്ലുന്നു.

²³മൺപാത്രത്തെ പൊതിയുന്ന മിനുക്കുപോലെയാകുന്നു ദുഷ്ടഹൃദയത്തോടുകൂടിയ മിനുസമുള്ള അധരങ്ങൾ. ²⁴ശത്രു തന്റെ അധരങ്ങൾകൊണ്ടു വേഷം മാറുന്നു; എന്നാൽ തന്റെ ഹൃദയത്തിൽ അവൻ വഞ്ചന ഒളിപ്പിച്ചുവയ്ക്കുന്നു. ²⁵അവൻ ദയയോടെ സംസാരിക്കുമ്പോൾ അവനെ വിശ്വസിക്കരുത്; എന്തെന്നാൽ ഏഴു മ്ലേച്ഛതകൾ അവന്റെ ഹൃദയം നിറയ്ക്കുന്നു. ²⁶അവന്റെ വിദ്വേഷം വഞ്ചനയാൽ മറച്ചുവെച്ചിരുന്നാലും, അവന്റെ ദുഷ്ടത സഭയിൽ വെളിപ്പെടുത്തപ്പെടും. ²⁷കുഴി കുഴിക്കുന്നവൻ അതിൽ വീഴും; കല്ലുരുട്ടുന്നവന്റെമേൽ ആ കല്ലു തിരികെ ഉരുണ്ടുവരും. ²⁸വ്യാജം പറയുന്ന നാവ് താൻ തകർക്കുന്നവരെ ദ്വേഷിക്കുന്നു, മുഖസ്തുതി പറയുന്ന വായ് നാശം വരുത്തുന്നു.