हितोपदेश 26 FHB Father's Heart Bible™

26 ¹ग्रीष्म ऋतुमा हिउँ र कटनीको समयमा वर्षा सुहाएझैँ, मूर्खलाई आदर सुहाउँदैन। ²फुर्फुर उड्ने भँगेरो वा हुरुरु उड्ने गौँथलीझैँ, विनाकारण दिइएको सराप कसैमाथि बस्दैन। ³घोडाका निम्ति कोर्रा, गधाका निम्ति लगाम, र मूर्खहरूका ढाडका निम्ति लट्ठी हुन्छ। ⁴मूर्खलाई त्यसको मूर्खताअनुसार जवाफ नदेऊ, नत्र तिमी आफैँ त्योजस्तै हुनेछौ। ⁵मूर्खलाई त्यसको मूर्खताअनुसार जवाफ देऊ, नत्र त्यो आफ्नै दृष्टिमा बुद्धिमान् ठहरिनेछ। ⁶मूर्खद्वारा सन्देश पठाउने मानिसले आफ्नै खुट्टा काट्छ र हिंसा पिउँछ। ⁷लङ्गडो मानिसको निष्प्रयोजन झुन्डिएका खुट्टाझैँ मूर्खहरूको मुखमा हितोपदेश हुन्छ। ⁸घुयेँत्रोमा ढुङ्गा बाँध्नुझैँ मूर्खलाई आदर दिनु हुन्छ। ⁹मद्यपीको हातमा काँढाको हाँगाझैँ मूर्खहरूको मुखमा हितोपदेश हुन्छ। ¹⁰सबैलाई घाइते पार्ने धनुर्धारीझैँ मूर्खलाई वा बाटो हिँड्ने जोसुकैलाई ज्यालामा लगाउने मानिस हुन्छ। ¹¹कुकुर आफ्नो बान्तातिर फर्केझैँ, मूर्खले आफ्नो मूर्खता दोहोर्‍याउँछ। ¹²आफ्नै दृष्टिमा बुद्धिमान् ठहरिने कुनै मानिस तिमीले देख्छौ? त्यसको भन्दा त मूर्खको निम्ति बढी आशा हुन्छ।

¹³अल्छी मानिस भन्छ, “बाटोमा सिंह छ! गल्लीहरूमा सिंह छ!” ¹⁴ढोका आफ्नो कब्जामा घुमेझैँ, अल्छी मानिस आफ्नो ओछ्यानमा पल्टिन्छ। ¹⁵अल्छी मानिसले थालमा हात गाड्छ; त्यो हात मुखसम्म फर्काउनै त्यसलाई थकाइ लाग्छ। ¹⁶समझदारीसाथ जवाफ दिने सात जनाको भन्दा अल्छी मानिस आफ्नै दृष्टिमा बढी बुद्धिमान् ठहरिन्छ।

¹⁷कुकुरलाई कानले समात्नुझैँ आफ्नो नभएको झगडामा बाटो हिँड्ने मानिसले हात हाल्नु हो।

¹⁸आगोका मुढा, काँड र मृत्यु हान्ने बहुलाहाझैँ, ¹⁹आफ्नो छिमेकीलाई छल्ने र “म त ठट्टा मात्र गरेको” भन्ने मानिस त्यस्तै हो।

²⁰दाउरा नभए आगो निभ्छ, र कुरौटे नभए झगडा शान्त हुन्छ। ²¹भुङ्ग्रोका निम्ति कोइला र आगोका निम्ति दाउराझैँ, झगडालु मानिसले कलह सल्काउँछ। ²²कुरौटेका कुरा स्वादिष्ट गाँसझैँ हुन्छन्; ती पेटका भित्री भागसम्म पस्छन्।

²³माटोको भाँडामा लगाइएको जलपझैँ दुष्ट हृदयसितका चिप्ला ओठ हुन्छन्। ²⁴शत्रुले आफ्ना ओठले आफैँलाई लुकाउँछ, तर त्यसको हृदयमा छल पालिरहन्छ। ²⁵त्यसले अनुग्रहसाथ बोल्दा त्यसलाई विश्वास नगर, किनकि त्यसको हृदय सात घृणित कुराले भरिएको हुन्छ। ²⁶त्यसको घृणा छलले लुकाइए पनि, त्यसको दुष्टता सभामा प्रकट हुनेछ। ²⁷खाल्डो खन्ने मानिस त्यसैमा पर्नेछ, र ढुङ्गा गुडाउने मानिसमाथि नै त्यो फर्केर आउँछ। ²⁸झूट बोल्ने जिब्रोले आफूले कुल्चेकाहरूलाई घृणा गर्छ, र चाप्लुसी गर्ने मुखले विनाश ल्याउँछ।