நீதிமொழிகள் 26

26 ¹கோடைகாலத்தில் உறைபனியும் அறுவடைக்காலத்தில் மழையும் பொருந்தாததுபோல, மூடனுக்கு மேன்மை பொருந்தாது. ²அலைந்து பறக்கும் அடைக்கலான் குருவியைப்போலவும், விரைந்து செல்லும் தகைவிலான் குருவியைப்போலவும், காரணமில்லாத சாபம் தங்கி நிலைக்காது. ³குதிரைக்கு சவுக்கும், கழுதைக்கு கடிவாளமும், மூடர்களின் முதுகுக்கு தடியும். ⁴மூடனுக்கு அவனுடைய மூடத்தனத்திற்குத்தக்கதாய் மறுஉத்தரவு கொடாதே; கொடுத்தால் நீயும் அவனைப்போல் ஆவாய். ⁵மூடனுக்கு அவனுடைய மூடத்தனத்திற்குத்தக்கதாய் மறுஉத்தரவு கொடு; கொடாவிட்டால் அவன் தன் பார்வையில் ஞானியாய் இருப்பான். ⁶மூடன் கையிலே செய்தி அனுப்புகிறவன் தன் சொந்தக் கால்களைத் தானே வெட்டிக்கொண்டு, கொடுமையைக் குடிக்கிறான். ⁷நொண்டியின் கால்கள் பயனற்று தொங்குகிறதுபோல, மூடர்களின் வாயிலுள்ள பழமொழியும் இருக்கும். ⁸கவணிலே கல்லைக் கட்டி வைப்பதுபோல மூடனுக்கு மேன்மை கொடுப்பதாம். ⁹வெறியன் கையில் முள்செடி தைக்கிறதுபோல மூடர்களின் வாயிலுள்ள பழமொழியும் இருக்கும். ¹⁰எல்லாரையும் காயப்படுத்தும் வில்வீரனைப்போல, மூடனைக் கூலிக்கு அமர்த்துகிறவனும், வழிப்போக்கனை எவனையும் கூலிக்கு அமர்த்துகிறவனும் இருக்கிறான். ¹¹நாய் தான் கக்கினதைத் தின்னத் திரும்புவதுபோல, மூடன் தன் மூடத்தனத்தைத் திரும்பச் செய்கிறான். ¹²தன் பார்வையில் ஞானியாய் இருக்கிறவனை நீ காண்கிறாயா? அவனைவிட மூடனுக்கு அதிக நம்பிக்கை உண்டு.

¹³சோம்பேறி, “வழியிலே சிங்கம் இருக்கிறது! வீதிகளிலே சிங்கம் இருக்கிறது!” என்கிறான். ¹⁴கதவு தன் கீல்களில் திரும்புவதுபோல, சோம்பேறி தன் படுக்கையில் புரண்டு திரும்புகிறான். ¹⁵சோம்பேறி தன் கையைக் கலத்திலே விட்டு மறைத்துக்கொள்கிறான்; அதைத் தன் வாய்க்குத் திரும்பக் கொண்டுவரவும் அவனுக்குச் சோர்வாயிருக்கிறது. ¹⁶சோம்பேறி தன் பார்வையில் அதிக ஞானியாயிருக்கிறான், புத்தியாய் மறுஉத்தரவு சொல்லக்கூடிய ஏழு பேரைவிட.

¹⁷நாயைக் காதுகளால் பிடிக்கிறவனைப்போல் தனக்குரியதல்லாத சண்டையில் தலையிடும் வழிப்போக்கன் இருக்கிறான்.

¹⁸கொள்ளிகளையும் எய்யும் பைத்தியக்காரனைப்போலவே, அம்புகளையும், சாவையும் எய்பவனைப்போலவே, ¹⁹தன் அயலானை வஞ்சிக்கிறவனும், “நான் விளையாட்டாய்த்தானே செய்தேன்!” என்று சொல்கிறவனும் அப்படியே இருக்கிறான்.

²⁰விறகில்லாவிட்டால் நெருப்பு அணைந்துபோகும்; கோள்சொல்லுகிறவன் இல்லாவிட்டால் சண்டை அடங்கிப்போகும். ²¹கரி நெருப்புத்தணலுக்கும், விறகு நெருப்புக்கும் ஏதுவானதுபோல, வாதுசெய்கிறவன் சண்டையைக் கொளுத்துகிறான். ²²கோள்சொல்லுகிறவனுடைய வார்த்தைகள் சுவையான உணவுத்துணுக்குகளைப்போல் இருக்கின்றன; அவை உள்ளத்தின் ஆழத்தில் இறங்கிப்போகின்றன.

²³மண்பாண்டத்தை மூடும் மெருகைப்போல, தீய இருதயத்தோடு கூடிய இனிமையான உதடுகள் இருக்கின்றன. ²⁴பகைஞன் தன் உதடுகளால் தன்னை மாறுவேடமிட்டுக்கொள்கிறான்; ஆனால் தன் இருதயத்திலோ வஞ்சகத்தைப் பதுக்கிவைக்கிறான். ²⁵அவன் தயவாய்ப் பேசினாலும் நம்பாதே அவனை; ஏனெனில் ஏழு அருவருப்புகள் அவன் இருதயத்தை நிறைத்திருக்கின்றன. ²⁶அவனுடைய பகை வஞ்சகத்தால் மறைக்கப்பட்டிருந்தாலும், அவனுடைய கொடுமை சபையிலே வெளியரங்கமாக்கப்படும். ²⁷படுகுழியை வெட்டுகிறவன் அதிலே விழுவான்; கல்லை உருட்டுகிறவன்மேல் அந்தக் கல் திரும்பி உருண்டுவரும். ²⁸பொய் நாவு தன்னால் நசுக்கப்பட்டவர்களைப் பகைக்கிறது; முகஸ்துதி செய்யும் வாய் அழிவை உண்டாக்குகிறது.