ምሳሌ 26

26 ¹በበጋ እንደሚወርድ በረዶ፣ በመከር ወቅትም እንደሚዘንብ ዝናብ፣ ክብር ለተላላ አይገባውም። ²እንደሚንፈራፈር ድንቢጥ፣ ወይም እንደሚበር ጨረባ፣ ያለ ምክንያት የተነገረ እርግማን አያርፍም። ³ለፈረስ አለንጋ፣ ለአህያ ልጓም፣ ለተላሎች ጀርባም በትር ነው። ⁴ለተላላ እንደ ተላላነቱ አትመልስለት፤ አለዚያ አንተ ራስህ እንደ እርሱ ትሆናለህ። ⁵ለተላላ እንደ ተላላነቱ መልስለት፤ አለዚያ በራሱ ዐይን ጥበበኛ ይሆናል። ⁶በተላላ እጅ መልእክት የሚልክ፣ የራሱን እግር ይቈርጣል፤ ዐመፅንም ይጠጣል። ⁷በተላላ አፍ ያለ ምሳሌ፣ እንደ ዐንካሳ ሰው ቅል እግር ነው። ⁸ለተላላ ክብርን መስጠት፣ በወንጭፍ ድንጋይን እንደ ማሰር ነው። ⁹በተላላ አፍ ያለ ምሳሌ፣ በሰካራም እጅ እንዳለ እሾኽ ነው። ¹⁰ተላላን የሚቀጥር ወይም ማንኛውንም መንገደኛ የሚቀጥር፣ ሁሉን እንደሚያቈስል ቀስተኛ ነው። ¹¹ውሻ ወደ ትፋቱ እንደሚመለስ፣ ተላላም ተላላነቱን እንዲሁ ይደግማል። ¹²በራሱ ዐይን ጥበበኛ የሆነ ሰው ታያለህን? ከእርሱ ይልቅ ለተላላ ተስፋ አለው።

¹³ሰነፍ ሰው፣ “በመንገድ ላይ አንበሳ አለ! በአደባባዩም አንበሳ አለ!” ይላል። ¹⁴በር በማጠፊያው ላይ እንደሚዞር፣ ሰነፍ ሰውም በዐልጋው ላይ እንዲሁ ይገላበጣል። ¹⁵ሰነፍ ሰው እጁን በወጭቱ ውስጥ ይከታል፤ ወደ አፉ መልሶ ለማምጣትም ይታክታል። ¹⁶ሰነፍ ሰው ጥበብ ባለው መልስ ከሚመልሱ ሰባት ሰዎች ይልቅ፣ በራሱ ዐይን ጥበበኛ ነው።

¹⁷የራሱ ባልሆነ ጠብ ውስጥ ጣልቃ የሚገባ መንገደኛ፣ ውሻን ጆሮውን ይዞ እንደሚጐትት ነው።

¹⁸የእሳት ችቦ፣ ፍላጻና ሞት እንደሚወረውር ዕብድ፣ ¹⁹ባልንጀራውን አታሎ፣ “ቀልጄ ነበር!” የሚል ሰው እንዲሁ ነው።

²⁰ዕንጨት ከሌለ እሳት ይጠፋል፤ ሐሜተኛም ከሌለ ጠብ ይበርዳል። ²¹ከሰል ለፍም፣ ዕንጨትም ለእሳት እንደሚሆን፣ ጠበኛ ሰውም ጥልን እንዲሁ ያነድዳል። ²²የሐሜተኛ ቃል እንደ ጣፋጭ ጕርሻ ነው፤ ወደ ሆድ ውስጥም ዘልቆ ይወርዳል።

²³ክፉ ልብ ያለው ለስላሳ ከንፈር፣ የሸክላ ዕቃን እንደሚሸፍን ብረቶ ነው። ²⁴ጠላት በከንፈሩ ራሱን ይሰውራል፣ በልቡ ውስጥ ግን ተንኰልን ይሰበስባል። ²⁵ለዛ ባለው ቃል ሲናገር አትመነው፤ ሰባት ርኵሰቶች ልቡን ሞልተውታልና። ²⁶ጥላቻው በተንኰል ቢሰወርም፣ ክፋቱ በጉባኤ ፊት ይጋለጣል። ²⁷ጒድጓድ የሚቈፍር ወደ እርሱ ይወድቃል፤ ድንጋይም የሚያንከባልለው ላይ ተመልሶ ይንከባለላል። ²⁸ሐሰተኛ ምላስ የሚያደቅቃቸውን ይጠላል፤ አሞጋጋሽ አፍም ጥፋትን ያመጣል።