సామెతలు 26

26 ¹వేసవిలో మంచు ఎలాగో, కోతకాలంలో వాన ఎలాగో, అలాగే బుద్ధిహీనునికి ఘనత తగదు. ²ఎగురుతూ తిరిగే పిచ్చుక వలె, రెక్కలు కొట్టుకుంటూ దూసుకుపోయే వానకోయిల వలె, కారణం లేని శాపము తగలదు. ³గుర్రానికి చెర్నాకోల, గాడిదకు కళ్లెం, బుద్ధిహీనుల వీపులకు బెత్తం. ⁴బుద్ధిహీనునికి అతని మూర్ఖత్వాన్ని బట్టి జవాబు ఇవ్వకు; ఇచ్చావంటే నీవును అతనివలె అవుతావు. ⁵బుద్ధిహీనునికి అతని మూర్ఖత్వాన్ని బట్టి జవాబు ఇమ్ము; లేకుంటే అతడు తన దృష్టికి తానే జ్ఞానిగా ఎంచుకుంటాడు. ⁶బుద్ధిహీనుని చేత సందేశం పంపేవాడు తన సొంత కాళ్లను నరుక్కుని, హింసను త్రాగుతాడు. ⁷కుంటివాని కాళ్లు నిరుపయోగంగా వేలాడుతున్నట్లే, బుద్ధిహీనుల నోటిలోని సామెత ఉంటుంది. ⁸వడిసెలలో రాయిని కట్టడం ఎలాగో, బుద్ధిహీనునికి ఘనత ఇవ్వడం అలాగే. ⁹త్రాగుబోతు చేతిలో ముళ్లపొద ఎలాగో, బుద్ధిహీనుల నోటిలోని సామెత అలాగే. ¹⁰అందరినీ గాయపరచే విలుకాడు ఎలాగో, బుద్ధిహీనుని కూలికి పెట్టుకునేవాడు లేదా దారినపోయే ఎవరినైనా కూలికి పెట్టుకునేవాడు అలాగే. ¹¹కుక్క తన వాంతికి తిరిగి వచ్చినట్లే, బుద్ధిహీనుడు తన మూర్ఖత్వాన్ని మళ్లీ చేస్తాడు. ¹²తన దృష్టికి తానే జ్ఞానిగా ఎంచుకునేవాణ్ణి నీవు చూస్తున్నావా? అతనికంటే బుద్ధిహీనునికే ఎక్కువ ఆశ ఉంది.

¹³సోమరి, "దారిలో సింహం ఉంది! వీధులలో సింహం ఉంది!" అని అంటాడు. ¹⁴తలుపు తన బందులమీద తిరిగినట్లే, సోమరి తన మంచముమీద తిరుగుతాడు. ¹⁵సోమరి తన చేతిని పాత్రలో పెట్టి ఉంచుతాడు; దాన్ని తిరిగి తన నోటి దగ్గరకు తేవడమే అతనికి అలసటగా ఉంటుంది. ¹⁶వివేకంగా జవాబిచ్చే ఏడుగురికంటె, సోమరి తన దృష్టికి తానే ఎక్కువ జ్ఞానిగా ఎంచుకుంటాడు.

¹⁷చెవులు పట్టుకుని కుక్కను లాగడం ఎలాగో, తనకు సంబంధం లేని కలహంలో జోక్యం చేసుకునే దారినపోయేవాడు అలాగే.

¹⁸మండుతున్న కొరవులను, బాణాలను, మృత్యువును విసిరే వెర్రివాని వలె, ¹⁹తన పొరుగువాణ్ణి మోసగించి, "నేను వేళాకోళం చేస్తున్నానంతే!" అని చెప్పేవాడు అలాగే.

²⁰కట్టెలు లేకుంటే అగ్ని ఆరిపోతుంది, కొండేగాడు లేకుంటే కలహం చల్లారుతుంది. ²¹నిప్పులకు బొగ్గు, అగ్నికి కట్టెలు ఎలాగో, కలహప్రియుడు పోరును రగిలించడం అలాగే. ²²కొండేగాని మాటలు రుచికరమైన ముద్దల వంటివి; అవి కడుపులో లోతైన భాగాలలోకి దిగిపోతాయి.

²³మట్టికుండను కప్పే మెరుపు పూత ఎలాగో, దుష్ట హృదయంతో కూడిన నున్నని పెదవులు అలాగే. ²⁴శత్రువు తన పెదవులతో వేషం వేసుకుంటాడు, కానీ తన హృదయంలో కపటాన్ని దాచుకుంటాడు. ²⁵అతడు దయగా మాట్లాడినప్పుడు, అతణ్ణి నమ్మకు; ఎందుకంటే ఏడు హేయకార్యాలు అతని హృదయాన్ని నింపి ఉన్నాయి. ²⁶అతని ద్వేషం కపటంతో దాగి ఉన్నప్పటికీ, అతని దుష్టత్వం సభలో బయటపడుతుంది. ²⁷గొయ్యి త్రవ్వేవాడు దానిలోనే పడతాడు, రాయిని దొర్లించేవానిమీదికే ఆ రాయి తిరిగి దొర్లుతుంది. ²⁸అబద్ధమాడే నాలుక తాను నలగగొట్టేవారిని ద్వేషిస్తుంది, ముఖస్తుతి చేసే నోరు నాశనాన్ని కలిగిస్తుంది.