Mga Panultihon 26

26 ¹Sama sa nyebe sa ting-init ug sama sa ulan sa ting-ani, ang pasidungog dili angay sa usa ka buangbuang. ²Sama sa goryon nga naglupadlupad o sa sayaw nga nagsibat paglupad, ang tunglo nga walay igong hinungdan dili modapo. ³Latos alang sa kabayo, rinda alang sa asno, ug bunal alang sa likod sa mga buangbuang. ⁴Ayaw tubaga ang buangbuang sumala sa iyang kabuang, kay kon dili mahisama ka usab kaniya. ⁵Tubaga ang buangbuang sumala sa iyang kabuang, kay kon dili magmanggialamon siya sa iyang kaugalingong mga mata. ⁶Si bisan kinsa nga magpadala ug mensahe pinaagi sa buangbuang nagputol sa iyang kaugalingong mga tiil ug nag-inom ug kapintasan. ⁷Sama sa mga paa sa bakol nga nagbitay nga walay pulos mao ang panultihon sa baba sa mga buangbuang. ⁸Sama sa paghigot ug bato sa lambuyog mao ang paghatag ug pasidungog sa buangbuang. ⁹Sama sa sampinit nga anaa sa kamot sa palahubog mao ang panultihon sa baba sa mga buangbuang. ¹⁰Sama sa mamamana nga nagsamad sa tanan mao ang tawo nga nagsuhol ug buangbuang o nagsuhol ug bisan kinsang molabay. ¹¹Maingon nga ang iro mobalik sa iyang suka, mao usab nga ang buangbuang mobalik-balik sa iyang kabuang. ¹²Nakita mo ba ang tawo nga manggialamon sa iyang kaugalingong mga mata? Mas may paglaom pa ang buangbuang kay kaniya.

¹³Ang tapulan nag-ingon, “Adunay leon sa dalan! Usa ka leon sa kadalanan!” ¹⁴Maingon nga ang pultahan molihok diha sa iyang bisagra, mao usab nga ang tapulan maglimbaglimbag diha sa iyang higdaanan. ¹⁵Gilubong sa tapulan ang iyang kamot sa panaksan; gikapoy siya sa pagdala niini pagbalik sa iyang baba. ¹⁶Ang tapulan mas manggialamon sa iyang kaugalingong mga mata kay sa pito nga makatubag nga maalamon.

¹⁷Sama sa pagkupot sa iro sa iyang mga dalunggan mao ang molabay nga manghilabot sa away nga dili iya.

¹⁸Sama sa buang nga nagpana ug nagdilaab nga mga sulo, mga udyong, ug kamatayon, ¹⁹mao usab ang tawo nga naglimbong sa iyang silingan ug nag-ingon, “Nagtiaw-tiaw lang ako!”

²⁰Kon walay sugnod mapalong ang kalayo, ug kon walay tabian mahupay ang away. ²¹Maingon nga ang uling sa baga ug ang sugnod sa kalayo, mao usab nga ang tawong palaaway magpasilaob sa panagbingkil. ²²Ang mga pulong sa tabian sama sa lamiang mga hungit; molugsong kini ngadto sa kinasuloran nga mga bahin.

²³Sama sa sinaw nga sapaw nga nagtabon sa kolon nga yutaon mao ang hamis nga mga ngabil nga may daotang kasingkasing. ²⁴Ang kaaway nagtakoban sa iyang kaugalingon pinaagi sa iyang mga ngabil, apan sa iyang kasingkasing nagtago siya ug limbong. ²⁵Kon mosulti siya nga malumo, ayaw pagtuo kaniya, kay pito ka dulumtanan ang nagpuno sa iyang kasingkasing. ²⁶Bisan ang iyang pagdumot natago pinaagi sa limbong, ang iyang pagkadaotan mabutyag diha sa katilingban. ²⁷Si bisan kinsa nga mokalot ug gahong mahulog niini, ug ang bato mobalik ngadto sa nagligid niini. ²⁸Ang bakakong dila nagdumot sa mga gidugmok niini, ug ang baba nga maulog-ulogon nagdala ug kalaglagan.