箴言 26

26 ¹好似夏天落雪、收割嘅時候落雨咁, 榮譽對愚昧人嚟講並唔適合。 ²好似麻雀飛嚟飛去、燕子急急咁掠過, 無緣無故嘅咒詛都唔會埋身。 ³鞭係用嚟打馬嘅,嚼環係用嚟勒驢嘅, 棍就係用嚟打愚昧人個背脊嘅。 ⁴唔好照住愚昧人嘅愚昧去回應佢,否則你自己都會變到同佢一樣。 ⁵要照住愚昧人嘅愚昧去回應佢,否則佢會自以為有智慧。 ⁶託愚昧人帶口信嘅,就好似砍斷自己對腳,又飲落暴戾咁。 ⁷愚昧人口中嘅箴言,就好似瘸腿嘅人對腳吊喺度冇用咁。 ⁸將榮譽俾愚昧人, 就好似將石頭綁喺投石帶度咁。 ⁹愚昧人口中嘅箴言, 就好似荊棘揸喺醉酒嘅人手裡咁。 ¹⁰僱用愚昧人或者隨便僱用過路人嘅,就好似射傷所有人嘅弓箭手咁。 ¹¹狗返轉頭去食自己嘔出嚟嘅嘢, 愚昧人重複佢嘅愚昧都係咁。 ¹²你見唔見到有啲人自以為有智慧呀? 愚昧人比佢仲有希望。

¹³懶惰嘅人話:「路上有隻獅子呀! 街上有隻獅子呀!」 ¹⁴門喺鉸位度轉嚟轉去, 懶惰嘅人喺張床度反嚟反去都係咁。 ¹⁵懶惰嘅人將隻手插入碟度; 連攞返上口都覺得攰。 ¹⁶懶惰嘅人自以為有智慧, 仲叻過七個識得精明回應嘅人。

¹⁷過路人插手管唔關自己事嘅爭吵, 就好似捉住隻狗嘅耳仔咁。

¹⁸好似癲佬亂射火把、 亂射箭同死亡咁, ¹⁹欺騙鄰舍嘅人, 仲要話:「我只不過係開玩笑啫!」都係咁。

²⁰冇柴,火就會熄; 冇搬弄是非嘅人,爭吵就會平息。 ²¹炭令到餘火更旺、柴令到火更猛, 好爭吵嘅人挑起紛爭都係咁。 ²²搬弄是非嘅人講嘅說話好似美味嘅小食; 直落入人嘅內心深處。

²³油嘴滑舌但係內心邪惡,就好似瓦煲外面塗上一層釉咁。 ²⁴仇敵用佢把嘴嚟偽裝,但係佢個心裡面收埋住詭詐。 ²⁵當佢講嘢好聽嘅時候,唔好信 佢,因為佢個心裡面充滿住七樣可憎嘅嘢。 ²⁶佢嘅仇恨雖然用詭詐遮掩住,但係佢嘅邪惡終會喺會眾面前暴露出嚟。 ²⁷挖陷阱嘅人自己會跌落 去,滾石頭嘅人石頭會滾返轉頭壓住佢。 ²⁸講大話嘅脷憎惡被佢壓傷嘅人, 油嘴滑舌嘅口帶嚟毀滅。