Yon moun sòt ap repete sotiz li

Prèske yon katalòg twa kalite moun. Moun fou a, yo pa ka bay li respè, ni anplwaye l, ni geri l; parese a, k ap vire sou kabann li tankou yon pòt sou gon li; ak mantè a, ki blese moun epi ki di se jwe li t ap jwe. Moun ki fouye yon twou ap tonbe ladan l.

Chapit 26.

Menm jan ak lanèj nan sezon chalè ak lapli nan sezon rekòt, onè pa fèt pou yon moun sòt. Menm jan ak yon ti zwazo k'ap voltije ou yon iwondèl k'ap plonje, yon madichon san rezon p'ap tonbe sou pyès moun. Yon fwèt pou chwal la, yon brid pou bourik la, ak yon baton pou do moun sòt yo. Pa reponn yon moun sòt dapre sotiz li, pou ou menm ou pa vin tankou li. Reponn yon moun sòt dapre sotiz li, pou li pa kwè li gen bon konprann nan je pa li. Moun ki voye yon mesaj nan men yon moun sòt koupe pye l' li menm epi l'ap bwè mechanste. Menm jan janm yon enfim pandye san itilite, se konsa yon pwovèb ye nan bouch moun sòt yo. Menm jan ak mare yon wòch nan yon fistibal, se konsa bay yon moun sòt onè. Menm jan ak yon pye pikan nan men yon tafyatè, se konsa yon pwovèb ye nan bouch moun sòt yo. Menm jan ak yon moun k'ap tire flèch ki blese tout moun, se konsa moun ki anplwaye yon moun sòt ou nenpòt moun k'ap pase. Menm jan yon chen tounen vin manje vomi li, se konsa yon moun sòt repete sotiz li. Èske ou wè yon moun ki kwè li gen bon konprann nan je pa li? Gen plis espwa pou yon moun sòt pase pou li.

Parese a di: “Gen yon lyon nan chemen an! Yon lyon nan lari a!” Menm jan yon pòt vire sou gon li, se konsa parese a vire sou kabann li. Parese a foure men l' nan plat la; sa fatige l' pou l' pote l' tounen nan bouch li. Parese a kwè li gen plis bon konprann nan je pa li pase sèt moun ki reponn avèk bon konprann.

Menm jan ak kenbe yon chen nan zòrèy, se konsa yon moun k'ap pase ki foure bouch nan yon kont ki pa pou li.

Menm jan ak yon moun fou k'ap tire bwa dife, flèch, ak lanmò, se konsa moun ki twonpe frè parèy li epi ki di: “Se jwe m'ap jwe!”

San bwa, dife etenn, epi san moun ki tripòt, kont la mouri. Menm jan chabon bay brezi ak bwa bay dife, se konsa yon moun ki renmen fè kont limen diskisyon. Pawòl yon moun tripòt tankou bon ti mòso manje; yo desann jouk nan fon zantray.

Menm jan ak yon kouch vèni ki kouvri yon kannari tè, se konsa lèv ki dous ak yon kè mechan. Yon lènmi kache sa li ye ak lèv li, men nan kè l' li kenbe twonpri. Lè li pale ak bèl pawòl, pa kwè li, paske sèt bagay degoutan plen kè l'. Menm si rayisman l' kache anba twonpri, mechanste l' ap parèt aklè devan asanble a. Moun ki fouye yon twou pral tonbe ladan l', epi yon wòch ap woule tounen sou moun ki woule l'. Yon lang k'ap bay manti rayi moun l'ap kraze, epi yon bouch ki flate pote dega.