Aṣiwèrè a Máa Tún Ìwà Òmùgọ̀ Rẹ̀ Ṣe
Ó fẹ́rẹ̀ jẹ́ àkọsílẹ̀ oríṣi mẹ́ta. Aṣiwèrè, tí a kò lè bọlá fún, tí a kò lè gbà síṣẹ́, tí a kò sì lè wò sàn; ọ̀lẹ, tí ń yí lórí ibùsùn rẹ̀ bí ilẹ̀kùn lórí ìwákùn rẹ̀; àti ẹlẹ́tàn, tí ń ṣeni léṣe, lẹ́yìn náà tí ó sọ pé eré lásán ni òun ń ṣe. Ẹnikẹ́ni tí ó bá gbẹ́ kòtò yóò jìn sínú rẹ̀.
26 1Gẹ́gẹ́ bí yìnyín ní ìgbà ẹ̀ẹ̀rùn àti bí òjò ní àsìkò ìkórè, ọlá kò yẹ aṣiwèrè. 2Gẹ́gẹ́ bí ológoṣẹ́ tí ń fò kiri tàbí alápáǹdẹdẹ tí ń rábàbà, ègún tí kò tọ́ kì í bà lé ẹni lórí. 3Pàṣán fún ẹṣin, ìjánu fún kẹ́tẹ́kẹ́tẹ́, àti ọ̀pá fún ẹ̀yìn àwọn aṣiwèrè. 4Má dá aṣiwèrè lóhùn gẹ́gẹ́ bí ìwà òmùgọ̀ rẹ̀, kí ìwọ fúnra rẹ má bàa dà bí i rẹ̀. 5Dá aṣiwèrè lóhùn gẹ́gẹ́ bí ìwà òmùgọ̀ rẹ̀, kí ó má bàa jẹ́ ọlọ́gbọ́n lójú ara rẹ̀. 6Ẹnikẹ́ni tí ó bá fi aṣiwèrè ránṣẹ́ gé ẹsẹ̀ ara rẹ̀ kúrò, ó sì mu ìwà ipá. 7Gẹ́gẹ́ bí ẹsẹ̀ arọ tí ń kọ́rọ̀ lásán ni òwe ṣe rí ní ẹnu àwọn aṣiwèrè. 8Gẹ́gẹ́ bí dídi òkúta mọ́ kànnàkànnà ni fífún aṣiwèrè ní ọlá. 9Gẹ́gẹ́ bí ẹ̀gún ní ọwọ́ ọ̀mùtí ni òwe ṣe rí ní ẹnu àwọn aṣiwèrè. 10Gẹ́gẹ́ bí tafàtafà tí ń ṣèṣe gbogbo ènìyàn ni ẹni tí ó gba aṣiwèrè ṣiṣẹ́ tàbí tí ó gba olùrékọjá èyíkéyìí ṣiṣẹ́. 11Gẹ́gẹ́ bí ajá ṣe ń padà sí èébì rẹ̀, bẹ́ẹ̀ ni aṣiwèrè ń tún ìwà òmùgọ̀ rẹ̀ ṣe. 12Ṣé ìwọ rí ẹnìkan tí ó jẹ́ ọlọ́gbọ́n lójú ara rẹ̀? Ìrètí wà fún aṣiwèrè ju tirẹ̀ lọ.
13Ọ̀lẹ a wí pé, “Kìnnìún wà ní ọ̀nà! Kìnnìún wà ní ìgboro!” 14Gẹ́gẹ́ bí ìlẹ̀kùn ṣe ń yí lórí ìbàdí rẹ̀, bẹ́ẹ̀ ni ọ̀lẹ ń yí lórí ibùsùn rẹ̀. 15Ọ̀lẹ ri ọwọ́ rẹ̀ sínú àwo; ó sì ń rẹ̀ ẹ́ láti mú un padà wá sí ẹnu rẹ̀. 16Ọ̀lẹ gbọ́n lójú ara rẹ̀ ju àwọn méje tí wọ́n ń fọgbọ́n dáhùn lọ.
17Gẹ́gẹ́ bí dídi ajá mú ní etí ni olùrékọjá tí ó da ara rẹ̀ sínú ìjà tí kì í ṣe tirẹ̀.
18Gẹ́gẹ́ bí wèrè tí ń ta ẹ̀ṣẹ́-iná, ọfà, àti ikú, 19bẹ́ẹ̀ ni ẹni tí ó tan aládùúgbò rẹ̀ jẹ tí ó sì wí pé, “Àwàdà ni mo ń ṣe lásán!”
20Láìsí igi, iná a kú, àti láìsí olófòófó, ìjà a rọlẹ̀. 21Gẹ́gẹ́ bí èédú ti rí sí ẹ̀yín iná àti igi sí iná, bẹ́ẹ̀ ni oníjà ń dá ìjà sílẹ̀. 22Ọ̀rọ̀ olófòófó dàbí àṣàyàn oúnjẹ; ó sì ń wọ̀ sínú ikùn jìjìnnà lọ.
23Gẹ́gẹ́ bí ìpara dídán tí ń bo ìkòkò amọ̀ ni ètè dídán tí ó wà pẹ̀lú ọkàn búburú. 24Ọ̀tá fi ètè rẹ̀ bo ara rẹ̀ mọ́lẹ̀, ṣùgbọ́n nínú ọkàn rẹ̀ ni ó ti pa ẹ̀tàn mọ́. 25Nígbà tí ó bá fi pẹ̀lẹ́ sọ̀rọ̀, má gbàgbọ́ ọ̀rọ̀ rẹ̀, nítorí ohun ìríra méje ni ó kún ọkàn rẹ̀. 26Bí ó tilẹ̀ fi ẹ̀tàn bo ìkórìíra rẹ̀, ìwà búburú rẹ̀ ni a ó ṣí payá nínú àpéjọ. 27Ẹnikẹ́ni tí ó bá gbẹ́ kòtò yóò ṣubú sínú rẹ̀, òkúta a sì yí padà lu ẹni tí ó ń yí i. 28Ahọ́n irọ́ kórìíra àwọn tí ó ń pa lára, ẹnu ìpọ́nni a sì mú ìparun wá.
