Pswiru Asabwereza Upswiru Wace

Kudzungunuka kuli ninga ndandanda wa mitundu mitatu ya anthu. Wakupusa, ule nee asakwanisa kulemekezwa, peno kuphatiswa basa, peno kuwangiswa; mamuna wa mbwembwe, anapitukapituka pa phasa pace ninga nsuwo pa mahinji ace; na wakunyengerera, ule anapweteka mbalonga kuti akhali basi kusekera. Ule anakumba dzenje anagwa mwenemo.

Kapitulu 26.

Ninga matalala mu n'dzidzi wa dzuwa na ninga mbvula mu n'dzidzi wa kubvuna, mbiri nkhabe kuthema kuna pswiru. Ninga mbalame inapululuka peno ninga cidokodoko cinathamanga-thamanga, citemberero cakukhonda kuthema nkhabe kutsamira. Cikwapu ca kavalo, freyu ya buru, na nthonga ya misana ya apswiru. Leka kutawira pswiru mwakubverana na upswiru wace, toera iwe mwene ukhonde kukhala ninga iye. Tawira pswiru mwakubverana na upswiru wace, toera iye akhonde kukhala waluso pa maso pace ene. Ule anatumiza mphangwa kubulukira kuna pswiru, asagwanda miyendo yace ene mbamwa nyatwa. Ninga miyendo ya nyakulemala inalengalenga yapezi, ndi nsangani mu mulomo mwa apswiru. Ninga kumanga mwala mu legedu, ndi kupasa mbiri kuna pswiru. Ninga nthambi ya minga m'manja mwa nyakuledzera, ndi nsangani mu mulomo mwa apswiru. Ninga nyakupfula uta anapweteka wonsene, ndi ule anaganyira pswiru peno anaganyira m'bodzi wa anapita basi. Ninga imbwa inabwerera ku masanzi yace, tenepombo pswiru asabwereza upswiru wace. Usaona munthu waluso pa maso pace ene? Pana cidikhiro cizinji kuna pswiru kupiringana iye.

Nyaulesi asalonga: “Muli nkhalamu mu njira! Nkhalamu pakati pa nseu!” Ninga nsuwo unazungunuka pa pyakuphatanisira pyace, tenepombo nyaulesi anazungunuka pa pakugona pace. Nyaulesi asaphatisa djanja yace mu mbale; pisamunensa kuibwezera ku mulomo wace. Nyaulesi ndi waluso pa maso pace ene kupiringana anthu anomwe anatawira mwaluso.

Ninga kuphata imbwa pa makutu, ndi ule anapita mbapitiriza mu nkhani ya kundwana yakukhonda khala yace.

Ninga munthu wamisala anapfula pisonopa pya moto, miseu, na kufa, tenepombo ndi ule anapumpha ndzace mbalonga: “Ndikhacita masenseka basi!”

Pakukhonda nkhuni, moto usathima, pontho pakukhonda nyakunyoza, ntawa usamala. Ninga makala ku zinga na nkhuni ku moto, tenepombo munthu wa ntawa asagasa kundwana. Mafala a nyakunyoza ndi ninga pyakudya pyakukoma; pisafika mpaka n'kati mwenemwene mwa manungo a munthu.

Ninga cakuyetima cakukwirira mphika wa dongo, ndi milomo yakudekha pabodzi na ntima wakuipa. Nyamalwa asabisa khala yace na milomo yace, mbwenye n'kati mwa ntima wace asakoya cinyengo. Iye angalonga mwakukoma, leka kunkhulupira, thangwi pinthu pinomwe pyakunyansa pisadzala mu ntima mwace. Maseze kuida kwace kusabiswa na cinyengo, kuipa kwace kunadzaoneka pa mbungano. Ule anakumba dindi anadzagwa m'dindimo, pontho mwala unabwerera kuna ule anaukunkhulusa. Lirimi ya uthambi isaida ale inapweteka, pontho mulomo wa kurembera usabweresa kufudzika.